Itre Edromë
26 Tune la kiona ngöne la ijine hedredrei, memine la mani ngöne la ijine menu,
Tha ijije kö tro la hmo a kapa la iatruny.
2 Tha kolo kö a kötre menu la waco, maine sesë la fifikë,
Ketre tun, tha kolo kö a traqa menu la hnëjin nge pë pe nyipi kepin.*
3 Thatraqane la hos la wameuc, thatraqane la boliko la ibirit,
Nge ame la jia, ke thatraqane la ju ne la itre hmo.
4 The sa kö kowe la hmo thenge la aqane menu i angeic,
Matre tha tro kö eö a ceitu me angeic.
5 Sa jë kowe la hmo thenge la aqane menu i angeic,
Matre tha tro kö angeic a nyi ka inamacan.
6 Tune la atr ka sijasija la lue ca i angeic, me akötrë angeice kö*
Celë hi pengöne la atr ka ahnithe la itre ewekë i angeic kowe la hmo.
7 Tune la lue ca ka genyi* ne la peje ca,
Celë hi pengöne la edromë ngöne la që ne la itre hmo.
8 Ame la troa atrune la ketre hmo,
Ke ceitune hi memine la etë hna oth ngöne la trehle.
9 Tune la feja ka ithiny ngöne la ime ne la ka hmo hnei kahaitr,
Celë hi pengöne la edromë ngöne la që ne la itre hmo.
10 Tune la atr ka pehna menu me eatrën la nöjei atr,
Celë hi pengöne la atre thue huliwa kowe la hmo, maine kowe la itre atr ka tro e cahu.
11 Tune la kuli ka bëeke hmaca kowe la hna hmitra,
Ketre atr ka hmo a kuca hmaca la huliwa i angeic ka ngazo.
12 Hane hë eö öhne la atr ka nyi ka inamacan?
Loi ju kö elany la hmo hui angeic.
13 Önine la ka geny: “Hetre neköi liona ngöne la gojeny,
Ketre liona nyipine la traon!”
14 Tune la qëhnelö hna fe me thinge lapaan,
Kolo fe a ujë agö hnene la geny hune la ili i angeic.
15 Ame la atr ka geny, angeic a li iwanakoime kowe la trepe xen,
Ngo goi kucakuca fe angeic troa abëekëne hmaca kowe la që i angeic.
16 Kola mekun hnene la ka geny ka hape
Inamacane kö angeic hune la 7 lao atr ka sa cememine la atrehmekun.
17 Tune la atr ka ea la lue hnagenyë ne la kuli
Celë hi pengöne la atr ka tro, nge ka elëhni menu pine la ifekë jolen.
18 Tune la atr ka menu ka hna la itre neköi jo ka mel, me itre ane pehna hna mecin
19 Celë hi pengöne la atr ka elo angazon memine la atre lapa easenyi angeic, me hape, “Eni lo a ihnyima!”
20 Ame ngöne la gaa pë sinöe, kola pi la eë,
Nge ame ngöne la gaa pë silitrengathoi, kola pë iwesitrë.
21 Tune la itre wanalep ne sinöe hune la itre wanalep ka mel, memine la sinöe hune la eë,
Celë hi pengöne la atr ka iwesitrë lapaa, angeic a ipicon* la iwesitrë.
22 Ame la itre trengewekë ne la ka silitrengathoi, ke ceitu me xen ka hnyapa;*
Hne së hna ulum nge ka uti meköt kowe la itrengenan.
23 Tune la kola pele silevan la ketre sine inege
Celë hi pengöne la itre trengewekë ka menyik hna qaja hnene la hni ka ngazo.*
24 Ame la ka methinëne la itre xan, ke angeic a juetrëne lai hnene la ukeineqë i angeic,
Ngo angeic a akökötrene la thoi e kuhu hni i angeic.
25 Ka mingöming la itre trengewekë i angeic, ngo the mejiune kö koi angeic,
Ke ej e kuhu hni i angeic la 7 lao ewekë hna methinën.*
26 Ame la iaö, ke ej a juetrëne la imethinë,
Tro ha mama la thiina ka ngazo i angeic ngöne la icasikeu.
27 Tro kö la atre si hnaop a kei e kuhu hnin,
Maine tro la ketre atr a ukune la ketre etë, tro hmaca kö ej a bëeke troa tranyi angeic.
28 Ame la thinem ka thoi, ej a methinëne la itre hnen ej hna akötrën,
Nge ame la që ka qaja aloine thoin, ej a axulune la akötr.