Deuteronomi

24 “Maine tro la trahmany a faipoipo memine la ketre föe, nge tha hnimi nyëne hë hnei angeic, ke hnei angeic hna öhne la ketre ewekë ka ngazo thei nyën, tro hë angeic a cinyianyin thatraqai nyën la ketre tusi ne triji föe matre hamë nyën, me helë nyën qa ngöne la hnalapa i angeic. 2 Nge e tro nyën a tro qa ngöne la hnalapa i angeic, ijiji nyëne hë troa föen la ketre trahmany. 3 Ngo maine troa methinë* nyën hnene la hnaaluene trahmany, nge tro angeic a cinyianyin thatraqai nyën la ketre tusi ne triji föe matre hamë nyën, me helë nyën qa ngöne la hnalapa i angeic, nge maine tro la trahmany cili a mec, 4 tha tro kö lo pane föi nyën, ene lo ka pane helë nyën, a xomi nyëne hmaca troa föi angeic, ke ase hë angeice lo adronyi nyën, nge ewekë lai ka sis qëmekei Iehova. Tha tro kö eö a lö fë la ngazo ngöne la nöj hnei Iehova Akötresi ö hna hamën nyine edrö i ö.

5 “Tha tro kö la nekö trahmany ka xötrei faipoipo a tro troa isi, nge tha tro kö a thue huliwa i angeic. Tha tro kö angeic a huliwa koi ca macatre, ngo tro pe angeic a lapa hnalapa me amadrinëne la föi angeic.

6 “Tha tro kö eö a xom nyine hatrene ti gufa,* lo nyine emoth göi troa ahmudrohmudro qitr, memine lo etë nyine amudromudron, ke jëne mele ne la atre lai.

7 “Maine kola öhne laka, hnene la ketre atr hna kötre fë la trejin me angeic qa Isaraela, me qanangazo nyën, me salemë nyën, tro ha meci la atre cili. Qa i ö troa apatrene la ngazo qaathei ö.

8 “Maine troa mama la meci lepera,* qa i ö troa kuca asë la hna qaja hnene la itre atre huuj ne Levi. Thupëne kö troa kuca thenge la hnenge hna ahnithe koi angatr. 9 The thëthëhmine kö lo hnei Iehova Akötresi ö hna kuca koi Miriama, lo epuni a tro qa Aigupito.

10 “Maine tro eö a hamëne la ketre ewekë kowe la atre lapa ezi ö, tha tro kö eö a lö kowe la uma i angeic, matre xome la ewekë hnei angeic hna amë nyine hatrene ti gufa. 11 Tro eö a cil e kuhu qëhnelö, nge qanyine pë hë la atre sipo, troa traqa fë koi ö la hatrene ti gufa. 12 Nge maine ka pë ewekë la atre cili, tha tro kö eö a meköle fë la hatrene ti gufa i angeic. 13 Ngo loi e tro pe eö a canga hamëne hmaca la hatrene ti gufa i angeic, ngöne la kola lö la jö. Tro pë hë angeic a meköle fë la iheetre i angeic me amanathithi ö; nge tro hë Iehova Akötresi ö a jele meköti ö.

14 “Tha tro kö eö a iji madran la atr ka huliwa nge ka pë ewekë, ngacama ketre trejine ju hë me eö, maine ketre trenyiwa pena ka lapa ngöne la nöje i ö, me ngöne la itre traone* i ö. 15 Ngo loi e tro pe eö a canga nyithupe i angeic qëmeken troa lö la jö, ke pëkö ewekë i angeic, nge jëne mele i angeice hi lai, wanga treije jë angeice koi Iehova Akötresi ö, nge hetre ngazo i ö jë.

16 “Tha tro kö a humuthe la itre kem, pine la ngazo ne la itre nekön. Nge ketre, tha tro kö a humuthe la itre nekön, pine la ngazo ne la itre kem. Ngo tro hi a humuthe la atr, pine la sipu ngazo i angeic.

17 “Tha tro kö eö a atriane la aqane amekötin la trenyiwa ka lapa thei ö, memine la nekön hna mecitrij hnei kem. Nge tha tro kö eö a xome la iheetre ne la sine föe nyine hatrene ti gufa. 18 The thëthëhmine kö laka, eö ekö la ketre hlu e Aigupito, nge hnei Iehova Akötresi ö hna itö eö. Celë hi kepin matre, eni a upi ö troa kuca la itre ewekë cili.

19 “Maine tro eö a menuëne la hlapa i ö, nge thëthëhmine pë hë eö la ketre uke qitr, the bëeke hmaca kö troa xom. Ngo nue pi pë hë kowe la trenyiwa ka lapa thei ö, me kowe la nekön hna mecitrij hnei kem, me kowe la sine föe, matre tro Iehova Akötresi ö a amanathithine la nöjei huliwa i ö asë.

20 “Maine tro eö a menuëne la itre wene oliv, the alua traqa kö troa jumejume la itre picin. Ngo nue pi pë hë la itre wen ka lapa pe kowe la trenyiwa ka lapa thei ö, me kowe la nekön hna mecitrij hnei kem, me kowe la sine föe.

21 “Maine tro eö a menuëne la hnënge vine i ö, the bëeke hmaca kö troa huje la itre wene rezë ka lapa pe. Ngo nue pi pë hë kowe la trenyiwa ka lapa thei ö, me kowe la nekön hna mecitrij hnei kem, me kowe la sine föe. 22 Nge the thëthëhmine kö laka, eö ekö la ketre hlu e Aigupito. Celë hi kepin matre, eni a upi ö troa kuca la ewekë cili.