Ieremia
23 “Ekölöhini la itre atre thupë mamoe ka ihumuth me aisaijen la itre mamoe hnenge hna axöj!” öni Iehova.
2 Hane hi la hna qaja hnei Iehova, Akötresi Isaraela, göne la itre ka thupëne la nöje i nyidrë: “Hnei epuni hna aisaijene la itre mamoeng; isa tro hë angatr, ke tha hnei epuni kö hna thupë angatr.”
“Celë hi matre, tro ni a të koi epun pine la itre huliwa i epun ka ngazo,” öni Iehova.
3 “Tro hë ni a abëekën la itre mamoeng ka mele pe qa ngöne la nöjei nöj hna aisaije angatr kow; tro ni a bëeke sai angatr kowe la hnë axöji angatr. Nge tro hë angatr a hnaho atruny me mana. 4 Eje hi, tro ni a iën thatraqai angatr la itre ka thupë mamoe, matre thupë angatre hnyawa. Tha tro hmaca kö angatr a xou me meci hnei xou, nge pëkö ala cas ka troa patr,” öni Iehova.
5 “Dreng!” öni Iehova. “Tro ha traqa la drai ne tro ni a axulun koi Dravita la ketre ziin* ka meköt. Tro hë la ketre joxu a mus me atreine thelewekë; tro angeic a isigölin la meköt me thiina ka meköt ngöne la nöj. 6 Ngöne la ijine i angeic, tro ha amele Iudra nge tro Isaraela a mele tingeting. Nge tro ha hë angeic ka hape: Iehova La Meköti Së.”
7 “Ame pe,” öni Iehova, “tro ha traqa la ijine tha tro hmaca kö angatr a hape: “Maine nyipici laka, ka mele Iehova, atre amelene la nöje Isaraela qa Aigupito!’ 8 Ngo tro pe angatr a hape: “Maine nyipici laka, ka mele Iehova, atre xom me abëekën la itre matra ne la itre nekö i Isaraela qa kolopi, me qa ngöne la itre xaa nöj hnei nyidrë hna aisaije angatre kow.’ Nge tro hë angatr a lapan la sipu zi i angatr.”
9 Maca göne la itre perofeta:
Kola akötre la hning.
Kola hmengöhmengön asë la itre juneng.
Ceitung me atre ka hnaitö
Tune la atr ka hmo hnei waina,
Pi Iehova me pine la itre trengewekë i nyidrë ka hmitrötr.
10 Ke tiqa ha la nöj hnene la itre ka nyixetë;
Pine la hna ejine la nöj, angatre ha hnëmec
Nge qaqacile hë la itre hnë axö öni ka tru.
Ka ngazo la aqane ujë i angatr, nge angatr a huliwan menun la mus i angatr.
11 “Ke pui ngazo* hë la itre perofeta me itretre huuj.
Öhne hë ni la aqane iakötrë i angatr, nge goi traqa fe hë ngöne la umang,” öni Iehova.
12 “Celë hi matre, tro ha ucic me mit la gojenyi angatr;
Tro ha uku angatr, nge tro hë angatr a kei.
Ke tro ni a axulune koi angatre la akötr
Ngöne la macatre ne troa ihnyingë me angatr” öni Iehova.
13 “Hnenge hna öhne la ketre ewekë ka sis thene la itre perofeta ne Samaria.
Angatr a perofeta ngöne la ëje i Baala,
Me amenu Isaraela nöjeng.
14 Nge hnenge hna öhne la itre ewekë ka sis thene la itre perofeta ne Ierusalema.
Angatr a nyixetë lapa, nge angatre pe hi a mele thoi;
Angatr a sajuëne* la itre atr ka ngazo,
Nge tha mano kö angatr iakötrë.
Ame koi ni, ceitui angatr asë hi me Sodroma,
Eje hi, ceitune hi la itre atrene la traon me Gomora.”
15 Haawe, hane hi la hna qaja hnei Iehova joxu ne la itre trongene isi e hnengödrai, göne la itre perofeta:
“Tro ni a thue a i angatre feja ka haitr
Me thue ime i angatre tim hna apoizinën.
Ke hnene la itre perofeta ne Ierusalema hna amejëne la iamenumenu, matre hna haöth la nöj asë.”
16 Hane hi la hna qaja hnei Iehova joxu ne la itre trongene isi e hnengödrai:
“The drenge kö la hna perofetan hnene la itre perofeta.
Angatr a iaö* epun.
Sipu mekuna i angatre kö la hnei angatr hna meköl goeën me qaja,
Ngo tha qaathei Iehova kö.
17 Tha mano kö angatre qaja kowe la itre ka methinë ni ka hape,
‘Öni Iehova: “Tro epuni a mele tingeting.”’
Nge angatr a qaja kowe la itre ka kei thenge la hni i angatr ka pi hun ka hape:
‘Pë jë kö akötr ka troa traqa koi epun.’
18 Ke drei la ka sine la itre sipu sinee i Iehova
Matre öhne me dreng la trengewekë i nyidrë?
Drei la ka wangatrun la trengewekë i nyidrë matre drenge hnyawa?
19 Drei ni ju! Tro ha hnahna catr la wenge eny qaathei Iehova;
Tune la udreli, tro ej a lepe la he ne la itre atr ka ngazo.
20 Tha tro kö a puje la elëhni i Iehova
E tha pane hnëkëne kö nyidrë me eatrën la itre mekuna i nyidrë.*
Ngöne la itre drai ne la pun, tro hë epuni lai a trotrohnine hnyawa.
21 Ngacama tha hnenge kö hna upe la itre perofeta, ngo hnei angatre pe hna nyenyap.
Ngacama tha hnenge kö hna ithanata koi angatr, ngo hnei angatre pe hna perofeta.
22 Ngo maine itre sipu sineenge ju angatr,
Tro hë angatr a qaja kowe la nöjeng la itre trengewekëng
Me xatuan la nöjeng troa nuetrij la aqane ujë i angatr ka ngazo, me itre huliwa i angatr ka iakötrë.”
23 “Hapeu, Akötresie hmekuje hi ni la eni a lapa ezi epun?” öni Iehova. “Nge tune kaa e nanyi hë ni, tha Akötresieti hmaca kö ni?”
24 “Atreine kö la atr troa zae ni matre tha tro kö ni a öhnyi angeic?” Öni Iehova.
“Hetre ewekë kö e koho hnengödrai me e celë fen hnenge hna tha öhn?” Öni Iehova.
25 “Hnenge hna drenge la itre trengathoi hna qaja hnene la itre perofeta ngöne la ëjeng. Öni angatr: ‘Hnenge hna pu! Hnenge hna pu!’ 26 Tro la itre perofeta a qeje trengathoi uti hë eu? Angatr a perofetan la itre sipu mekuna i angatr ka iaö.* 27 Jëne la itre pu hnei angatr hna iqajakeun, angatr a thele tro la nöjeng a thëthëhmine la ëjeng, tune lo aqane thëthëhmine la ëjeng hnene lo itre qaaqaa i angatr pi Baala. 28 Epi tro la perofeta ka pu a qaja la pu i angeic! Ngo qa ne la atr ka hetrenyi la trengewekëng troa qaja hnyawan.”
“Nemene la ka ceitu thene la jez memine la itin?” Öni Iehova.
29 “Hapeu, tha ceitu kö la trengewekëng memine la eë, me tune la hama ne lepe fao ka thë la etë?” Öni Iehova.
30 “Celë hi matre, tro ni a nyithupen kowe la itre perofeta ka xome la itre trengewekëng qaathene la itre xaa perofeta, matre troa sazen,” öni Iehova.
31 “Tro ni a nyithupene kowe la itre perofeta ka qaja hnene la thineme i angatr ka hape: ‘Hane hi la hnei nyidrëti hna qaja!’” Öni Iehova.
32 “Tro ni a nyithupene kowe la itre perofeta ka perofetane la itre pu ka thoi, me qaja agön itre ej, me amenune la nöjeng hnene la itre trengathoi i angatr, me aqane sipu selë i angatr,” öni Iehova.
“Ngo tha hnenge pe hna upi angatr, nge pëkö hnenge hna ahnithe koi angatr. Matre pëkö ca eloi i angatr kowe la nöje ce,” öni Iehova.
33 “Maine tro la nöje ce, maine ketre perofeta, maine ketre atre huuj a hnyingë eö ka hape: ‘Nemene la ehnefe* i Iehova?’ Tro hë eö a sa ka hape: ‘“Epuni hi la ehnef! Eje hi, tro ni a apatrenetriji epun,” öni Iehova.’ 34 Nge maine tro la ketre perofeta, maine ketre atre huuj, maine ketre atr pena a qaja ka hape: ‘Hane hi la ehnefe i Iehova!,’ tro hë ni a nyithupene koi angeic me fami i angeic. 35 Hane hi la hnei epuni hna isa hnyingëne kowe la sinee i epun, me trejin me epun: ‘Nemene la hna sa hnei Iehova? Nge öni Iehova ka hapeu?’ 36 Ngo the ithanatane hmaca kö la ehnefe i Iehova, ke itre trengewekë i epun isa ala cas la ehnef: hnei epuni hna saze la itre trengewekë ne la Akötresie ka mel, Iehova joxu ne la itre trongene isi e hnengödrai, Akötresi së.
37 “Tro eö a qaja kowe la perofeta ka hape: ‘Nemene la hnei Iehova hna sa koi ö? Nge öni Iehova ka hapeu? 38 The qaja hmaca kö ka hape: “Hane hi la ehnefe i Iehova!” Ke öni Iehova: “Pine eö qaja ka hape: ‘Ehnefe i Iehova la trengewekë celë,’ ngacama hnenge lo hna wathebo eö troa hape: “Hane hi la ehnefe i Iehova!,” 39 haawe, tro hë ni a ee eö draië me trij ananyi ö memine la traon hnenge hna hamë eö me itre qaaqaa i ö. 40 Eje hi, tro ni a axulune la hmahma ka epine palua koi ö, memine la ithaipië hna thatreine thëthëhmin epine palua.”’”