Amosa
3 “Nöje Isaraela fe, drenge ju la hna qaja hnei Iehova göi epun,
Itre hnenge hna thapa qa Aigupito:
2 ‘Epuni casi hi la hnenge hna atre nyipine la nöjei nöj e celë fen.
Celë hi matre, tro ni a ameköti epun pine la itre ngazo i epun.
3 Hapeu, tro kö a ce tro la lue atr e tha hnei nyidroti kö hna isapui?
4 Tro kö la liona a ho hnine la hnaxulu e pëkö tha ne ej?
Tro kö la neköi liona a ho qa ngöne la göhnene ej e pëkö hnen ej hna ea?
5 Tro kö a ea la waco e tha hna ami thethi kö e kuhu hnadro?*
Tro kö a fetra la elepetr e pëkö tha?
6 Maine kola ufi trutru ngöne la traon, tha tro kö a hmengöhmengöne la itre atr?
Maine kola traqa la ketre akötr ngöne la traon, ke tha qaathei Iehova kö lai?
7 Ke tha tro kö Iehova Joxu Ka Sisitria a kuca la ketre ewekë
E tha hna pane qaja kö la aja* i nyidrë kowe la itre hlue i nyidrë, itre perofeta.
8 Hna ho la liona! Drei pe kö la ka troa tha xou?
Hna ithanata hnei Iehova Joxu Ka Sisitria! Drei pe kö la ka troa tha perofeta?’
9 ‘Qaja jë hune la itre ita ne thup hna eköhagen e Asedoda
Me hune la itre ita ne thup hna eköhagen e Aigupito.
Qaja jë ka hape: “Icasikeu jë hune la itre wetr e Samaria;
Goeëne jë la aqane catrehnine la zikoziko e cili
Memine la aqane qenatrekënö nyipi angatr.
10 Ke thatreine kö angatre kuca la ka meköt,” öni Iehova
“Lo itre ka nyialien la itre ita ne thupe i angatr hnene la itre ewekë hna thapa qa ngöne la hna iakötrë.”’
11 Matre hane hi la hna qaja hnei Iehova Joxu Ka Sisitria:
‘Tro la ithupëjia a cile kanoth la nöj,
Tro angeic a thapa la trengecatre i ö,
Me atrekënö la itre ita ne thupe i ö hna eköhagen.’
12 Hane hi la hna qaja hnei Iehova:
‘Tune la atre thupë mamoe a thapa la lue ca maine sine hnangenyë ngöne la që ne la liona,
Celë hi aqane troa thapa la nöje Isaraela,
Lo itre ka lapa e Samaria hune la itre göhnë ka lolo me ili ka mingöming.’*
13 ‘Drenge ju nge hmekëne ju la itre matra i Iakobo,’ öni Iehova Joxu Ka Sisitria, me Akötresie ne la itre trongene isi e hnengödrai.
14 ‘Ke ame ngöne la drai ne tro ni a amekötin la nöje Isaraela pine la itre icilekeu* i angeic,
Tro fe ni a ameköti angeic pine la itre ita ne huuj e Bethela;
Tro ha lep axecien la itre jian ne la ita ne huuj nge tro itre ej a mala e kuhu hnadro.
15 Tro ni a apatrene la uma thatraqan la ijine hnötr me uma thatraqan la ijine hedredrei.’
‘Tro ha lep apatrene la itre uma hna kuca hnei jian ne elefa,
Nge tro ha patre la itre uma ka tru,’* öni Iehova.”