Isaia
66 Hane hi la hna qaja hnei Iehova:
“Theronenge la hnengödrai, nge ihnadro la tane la lue cang.
Matre ekaa la uma nyine tro epuni a xupe thatraqai ni?
Nge ekaa la hnë manong?”
2 “Itre huliwa ne la lue imeng la nöjei ewekë cili,
Nge celë hi kepin matre traqa pi la nöjei ewekë asë cili,” öni Iehova.
“Hane hi la pengöne atr hnenge hna troa goeën,
La atr ka ipië me akötr, nge ka hmengöhmengöne* troa drenge la trengewekëng.
3 Ceitune hi la atre humu kau memine la ka humu atr.
Ceitune hi la atre huujëne la mamoe memine la ka ela la nyinawa i kuli.
Ceitune hi la atre tro fë ahnahna memine la ka tro fë la madra i puaka!
Ceitune hi la atre tro fë libanu memine la ka amanathithin jëne la hna kuci haze.*
Hnei angatr hna sipu iën la itre jë i angatr,
Nge angatr a madrin kowe la itre ewekë ka sis.
4 Tro hë ni a iëne la itre aqane troa nyithupene koi angatr,
Nge tro ni a axulune la itre ewekë hnei angatr hna xouen.
Ke ame lo eni a hë, pëkö atre ka sa;
Ame lo eni a ithanata, pëkö ala cas ka dreng.
Hnei angatre pala hi hna kuca la ngazo qëmekeng,
Me iën troa kuca la hnenge hna methinën.”
5 Drenge ju la hna qaja hnei Iehova, epun itre ka hmengöhmengön* pine la trengewekë i nyidrë:
“Kola qaja hnene la itre trejin me epun ka imethinë,
Lo itre ka upetriji epun pine la ëjeng ka hape: ‘Atrunyi Iehova jë!’
Ngo tro hë nyidrëti* a mama, nge tro epuni a madrin,
Nge angatre hi la itre ka troa hmahma.”
6 Kola iluilu qa ngöne la traon, nge kola nyi mejen qa ngöne la Uma Ne Hmi!
Celë hi meje i Iehova, nyidrëti a nyithupene kowe la itre ithupëjia me nyidrë.
7 Hnaho pi ngacama tha cile pala kö la upune.
Hnahone pi la nekö trahmany ngacama tha traqa pala kö la akötr.
8 Hapeu, hane fe kö së drenge la ewekë ka tune lai?
Hane fe kö së öhne la itre ewekë cili?
Tro kö a hnahone la ketre nöj ngöne hi la ca drai?
Tro kö a aca tro hnahone la itre atren?
Ame pe, tha traqa pala kö lo itre pane akötr, nge ase hë Ziona hnahone la itre nekö i eahlo trahmany.
9 “Hapeu, tro kö ni a sawa la medreng troa mala nge kola ha hnaho nyën?” öni Iehova.
“Tro kö ni a sawa la medreng troa mala nge hnenge pe hna anyimenyimën la ijine hnaho?” önine la Akötresi ö.
10 Ce madrine jë epuni me Ierusalema, ce sue madrine jë me angeic, epuni asë itre ka hnimi angeic.
Ce sue madrine jë me angeic, epuni asë itre ka treije pi angeic,
11 Ke tro epuni a ije la thi i angeic, nge tro ha aupunyi epun me ameji epun,
Nge tro epuni a iji atrun, me madrine la elolo i angeic.
12 Ke hane hi la hna qaja hnei Iehova:
“Eni a seluthe la tingeting hun ej, tune la hneopegejë
Memine la lolo ne la itre nöj, tune la kola di.
Tro hë epuni a iji thi, nge tro ha xepi epun,
Nge tro ha ati epun hune la lue iwatingöneca.
13 Tune la thin ka aupune la nekö i eahlo,
Tro pala hi ni a aupunyi epun;
Nge tro ha aupunyi epun göi Ierusalema.
14 Tro hë epuni a öhne lai, nge tro ha madrine la itre hni i epun,
Tro ha egöcatr la itre june i epun tune la haö ka pepeija.
Nge tro Iehova a amamane la mene* i nyidrë kowe la itre hlue i nyidrë,
Ngo trengehni i nyidrëti pe kowe la itre ithupëjia me nyidrë.”
15 “Ke tro Iehova a traqa kösë eë,
Nge tro la itre ikatre i nyidrë a tune la udreli,
Matre nyithupen kowe la itre ithupëjia me nyidrë hnene la elëhni atraqatre i nyidrë,
Me ameköti angatr hnene la itre ukahlokine eë.
16 Ke jëne la eë memine la taua i nyidrë,
Tro Iehova a amekötine la nöjei atr* asë;
Nge nyimutre la itre hnei Iehova hna troa humuth.
17 “Ame la itre ka ahmitrötrë angatr me apuiloinyi angatr, matre lö ngöne la itre hlapa tröne la ka ej e nyipin,* me itre ka öni puaka, me itre ewekë ka sis, me itre aji, tro ha apatrenyi angatr asë,” öni Iehova. 18 “Atre kö ni la itre huliwa i angatr, me itre mekuna i angatr. Celë hi matre, eni a traqa troa icasinekeune la itre atr qa ngöne la nöjei nöj me qene hlapa, nge tro hë angatr a traqa troa goeëne la lolong.”
19 “Tro ni a amë thei angatr la ketre hatren, nge tro ni a upe la itre xaa atr ka mele pe, kowe la itre nöj ka tha hane kö drei mejeng, me öhne la lolong, ene Tasesa, me Pula, me Luda, (itre nöj ne la itre ka huji pehna), me Tubala, me Heleni, me itre hnapet e gaa nany. Nge tro hë angatr a cainöjëne la lolong nyipine la itre nöj.
20 Tro angatr a tro fë la itre trejine me epun qa ngöne la itre nöj asë, kowe la wetreng ka hmitrötr e Ierusalema. Troa traqa sai angatr nyine ahnahna koi Iehova hune la itre hos, me itre ikatr, me itre ikatr hna thing, me itre miul, me itre kamela ka nyinyape catr,” öni Iehova. “Tro ha tune la angetre Isaraela ka tro fë la itre ahnahna i angatr, ngöne la ketre trengene ka hmitrötr kowe la Uma i Iehova.”
21 “Tro ni a xome la itre xan nyine atre huuj, me itre xan nyine atre Levi,” öni Iehova.
22 “Ke tro ha cile hut qëmekeng la hnengödrai ka hnyipixe, memine la fene hnengödrai ka hnyipixe,” öni Iehova, “ketre tun, tro ha cile huti la itre matra i epun, me ëje i epun.”
23 “Nge qaane la ketre treu ka hnyipixe uti hë la ketre treu ka hnyipixe,
Me ketre sabath uti hë la ketre sabath, tro ha traqa la nöjei atr asë troa thili qëmekeng,” öni Iehova.
24 “Nge tro hë angatr a goeëne la itre ngönetrei ka meci ne la itre ka icilekeu me eni;
Ke tha tro kö a meci la itre wanak hui angatr,
Nge tha tro kö a pi la eë ka dreuthetriji angatr,
Nge tro hë angatr a tune la ewekë hna sisine hnei nöjei atr.”*