Salamo

28 Iehova fe Giting, nyipëti hi la hnenge hna majemine hën;

The drei simine kö la eni a ithanata.

Maine tro nyipëti a lapa thaup,

Tro hë ni a tune la itre ka uti kowe la hnaop.*

 2 Drenge ju la itre xëweng la eni a sipo ixatua koi nyipë

Me li ime draië kowe la hnahag ka co ne la uma ne hmi i nyipë.

 3 The ce xomi ni kö memine la itre atr ka ngazo, lo itre ka kuca la ewekë ka qali,

Itre ka qeje tingeting kowe la itre ka lapa ezi angatr, ngo hetre ngazo pe e kuhu hni i angatr.

 4 Nyithupene jë koi angatr thenge la itre huliwa i angatr,

Me thenge la itre thiina ka ngazo i angatr.

Nyithupene jë koi angatr thenge la itre huliwa ne la itre ime i angatr,

Ene la hnei angatr hna kuca.

 5 Ke tha wangatrune kö angatr la itre huliwa i Iehova, memine la huliwa ne la lue ime i nyidrë,

Tro hë nyidrëti a thë triji angatr.

 6 Epi troa atrunyi Iehova,

Ke hnei nyidrëti hna drenge la eni a sipo ixatua.

 7 Iehova la trengecatreng me petreng;

Ka mejiune la hning koi nyidrë.

Hnei nyidrëti hna xatua ni, nge kola madrine la hning,

Celë hi matre tro ni a atrunyi nyidrë hnene la nyimang.

 8 Iehova la trengecatrene la nöje i nyidrë;

Nyidrëti la hnapo ka catr, ka traqa fë la iamele* ka tru kowe la hnei nyidrëti hna iën.