Isaia

61 Eje hung la ua i Iehova Joxu Ka Sisitria,

Ke hnei Iehova hna ië ni matre cainöjëne la maca ka loi kowe la itre ka ipië.

Hnei nyidrë hna upi ni troa atuthe la itre eatr ne la itre ka awe,

Me qaja kowe la itre hna akalabusin laka, tro ha nue angatr

Me kowe la itre hna oth laka, tro ha fe catrën la luemeke i angatr,

 2 Me qaja amamane la macatre ne utipine* i Iehova

Memine la drai ne tro la Akötresi së a nyithupen,

Matre aupun asë la itre ka treij,

 3 Me nyipiine la itre ka hnëmeci Ziona,

Me amë hune la he i angatr la hnathaip hnane la hnatresij,

Me oel ne madrin hnane la hleuhleu,

Me iheetr nyine atrun hnane la hni ka kucakuca.

Nge tro ha ati ëje i angatr, itre sinöe ka tru ne la meköt,

Lo hna traan hnei Iehova, matre atrunyi* nyidrë.

 4 Tro angatr a xupe hmaca la itre uma hna akeine ekö;

Tro angatr a acile hmaca la itre götran hna apatren ekö,

Me xupe hmaca la itre traon hna apatrenetrij,

Lo itre götran hna tha lapan qaan ekö.

 5 “Tro la itre trenyiwa a traqa me nyidrawane la hnënge öni i epun,

Nge tro la itre trenyiwa a eënyi koi epun, me eënyi vin koi epun.

 6 Ame epun, tro ha ati ëje i epun, itre atre huuje i Iehova;

Tro angatr a hë epun, itre hlue ne la Akötresi së.

Tro epuni a xeni la itre ewekë ka loi ne la itre nöj,

Me selëne troa kepe thangane la itre mo i angatr.

 7 Tro la nöjeng a kapa la lue thupen, hnane la hmahma,

Nge tro hë angatr a sue madrine la edrö i angatr, hnane la ithaipië.

 8 Ke ame ni Iehova, eni a ajane la meköt;

Eni a methinëne la atrekënö memine la ewekë ka tha meköti kö.

Tro ni a hamën la thupei angatr thenge la nyipici,

Nge tro ni a kuca me angatr la isisinyikeu ka epine palua.

 9 Tro ha hlemu la itre matra* i angatr thene la itre xaa nöj

Me itre nekö i angatr thene la nöjei atr.

Tro la itre ka öhnyi angatr a wangatrehmekun laka,

Angatre hi la itre matran hnei Iehova hna amanathithin.”

Ke hnei nyidrë hna heetrë ni hnene la itre iheetr ne iamele;*

Hnei nyidrëti hna hakuthi ni hnene la iheetr ka qea* ne la meköt,

Tune la trahmanyi ka faipoipo nge ka atu he tune la atre huuj,

Me tune la jajiny ka faipoipo nge ka thaip.

11 Ke tune la ihnadro ka aciane la itre feja

Me tune la hlapa ka aciane la itre feja hna jum,

Tro fe Iehova Joxu Ka Sisitria a aciane la meköt

Memine la nyine iatruny qëmekene la nöjei nöj asë.