Pane Tus Samuela
17 Hnene la angetre Filisiti hna acasine la itre sooce* i angatr troa isi. Angatr a ce uti pi e Soko, ketre traon ne Iudra. Nge angatr a acile jë la hna lapa ne la itre sooc i angatr, nyipine Soko me Azeka, e Efesi-damim. 2 Nge hnei Saulo me itre sooce i Isaraela, hna acile la lapa i angatr ngöne la hnathup* e Ela. Angatr a cile xötrë troa isi me angetre Filisiti. 3 Kola thawa luë angatr hnene lai hnathup. Angetre Filisiti a cil ngöne la ketre wetr, nge angetre Isaraela ngöne la ketre wetr.
4 Ame hna xulu pi la ketre sooc ka catr qa ngöne la lapa i angetre Filisiti. Goliatha la ëjen, nge atre Gatha. Nge kola easenyi koi köni* met la eqean. 5 Angeic a petrë itrapetre kopa, me heetrë imano hnei iheetre kopa. Nge ame la ehacen ej, tre 57 kilo. 6 Nge hetre nyine he june ca kopa ngöne la lue waca i angeic. Nge ngöne la ju i angeic la ketre jo kopa. 7 Nge ceitu hi la eisaisane la tane jo i angeic, memine la inehe ne sili maano. Nge 600 sekel* la ehacene la mekene jo fao i angeic. Nge ca trahmanyi ka tro qëmeke i angeic, nge ka xututhe trongëne la jo i angeic. 8 Nge ame hë la Goliatha a cil, öni angeic koi angetre Isaraela: “Hnauëne la nyipunieti a cile xötrë troa isi? Eni hi la atre Filisiti, nge epuni la itre hlue i Saulo. Ngo iëne jë thei epuni la ketre atr ka troa isi me eni. 9 Nge e traqa jë angeic ngaa ni me humuthi ni, tro hë huni a itre hlue i epun. Ngo e traqa ju ni ngaa angeic me humuthi angeic, tro pë hë epuni a nyihlue i eahun.” 10 Nge önine hmaca jë lai atre Filisiti ka hape: “Enehila, eni a hë isi kowe la itre sooc i angetre Isaraela. Upi angeice jë koi ni, matre fenesi pi!”
11 Ame la Saulo me itre sooce i angetre Isaraela a dreng la hna qaja hnene lai atre Filisiti, angatr a ixoueny.
12 Dravita la ketre nekö i Iese, atre Eferatha e Bethelema ne Iudra. Ala 8 lao nekö i Iese trahmany. Nge ngöne la ijine Saulo a joxu, qatre hë Iese. 13 Hnene la köni pane nekö i Iese hna ce tro me Saulo troa isi. Eliaba la ka tru, Abinadab la hnaaluen, nge Sama la hnaakönin. 14 Dravita la wene puhnen, nge thei Saulo lo köni mama i angeic ka tru.
15 Ngöne la ijine cili, Dravita a huliwa koi Saulo, ngo hnei angeic hna majemine bëek a tro Bethelema, troa thupëne la itre mamoe ne la keme i angeic. 16 Nge ngöne la 40 lao drai, e nöjei hmakanyi me hej, hnene la atre Filisiti hna alemi, me cil qëmeken la angetre Isaraela troa hë isi.
17 Ngöne la ketre drai, öni Iese koi Dravita nekö i angeic: “Xome jë la ca efa* qitr hna dreudreuth, memine la 10 lao falawa celë, nge canga tro fë jë kowe la itre mama i eö ngöne la hna isi. 18 Hamëne pi la 10 lao sine fromaz* celë kowe la tane isi. Nge wange ju ka hape, tune kaa itre mama i eö. Thupene lai, bëeke fë nuvele i angatre jë koi ni.” 19 Nge itre nekö i Iese a ce cil me Saulo, me itre xa sooc ne Isaraela ngöne la hnathup* e Ela, matre troa isi me angetre Filisiti.
20 Dravita a canga ilë jë, me ahnith la itre mamoe koi ketre. Angeic a sa trengetreng ju me tro, tune lo hna qaja hnei Iese. Ame la angeic a traqa ngöne la hna lapa ne la itre sooc, itre sooc a uti kowe la hnë isi me isueny. 21 Matre hnene la angetre Isaraela, me angetre Filisiti hna isa cil troa isi. Nge kola iqëmekekeu la lue trongene isi. 22 Ame hnei Dravita hna ahnithe la trengetrenge i angeic kowe la atre thupë trengetreng, nge angeic a nyinyape pi kowe la hna isi. Nge Dravita a canga hnyingë nuvelën la itre mama i angeic.
23 Dravita pala kö a hnyingë nuvel, nge fetra pi hi lo sooc ka catr, hna hëne ka hape, Goliatha, atre Gatha. Angeic a xulu qa ngöne la itre xötre sooc i angetre Filisiti, nge angeic a qaja hmaca jë la itre trenge ithanata ka akötr, nge drenge ju hi Dravita. 24 Matre ame hë la angetre Isaraela a öhnyi Goliatha, kötre bëeke hmaca ju hi angatr hnei xou. 25 Öni angatr: “Öhne hi epuni la atre ce? Angeic a traqa troa thele isi me itre sooce i Isaraela. Nge tro la joxu a atrenamone la atre humuthi angeic. Nge tro fe nyidrëti a hamëne koi angeic la sipu nekö i nyidrë jajiny, nge tha tro hmaca kö la fami ne la keme i angeic a kuië mani hna athip, maine kuci huliwa i joxu.”
26 Öni Dravita jë hi kowe la sooc ka cil ezi angeic ka hape: “Troa hamë nemen kowe la ka humuthe la atre Filisiti celë, me apatrene la hmahma thei Isaraela? Ke drei la atre celë tha hna xötrehatren,* matre thele isi me itre sooc ne la Akötresie ka mel?” 27 Matre itre sooc a qaja hmaca jë lo hna sisiny hnei joxu, nge angatr a nyixane me hape: “Hane hi la hna troa kapa hnene la atre humuthi angeic.” 28 Matre ame hë la Eliaba, lo mama i Dravita a drei angeic e ithanata me itre sooc, elëhni jë hi angeic. Öni Eliaba: “Eö a ue celë? Drei pë hë la ka thupëne la itre neköi mamoe ngöne la gaa qaqacil? Atre hi ni ka hape, eö e celë ke eö a pi tru, nge ka ngazo la itre mekuna i eö. Eö a pi wai isi.” 29 Sa jë hi Dravita ka hape: “Nemene la ngazong? Eni hi la a hnying!” 30 Dravita a xei jë koi ketre, me hnyingëne hmaca lo hnying, nge casi pala hi la aqane sa.
31 Ngo hetre ka drenge la hna qaja hnei Dravita, matre angatr a qajaqaja jë koi Saulo. Nge Saulo a upi ketre jë troa thei Dravita. 32 Öni Dravita jë hi koi Saulo ka hape: “The tro pi kö ketre a pë trengecatr hnene lai atre Filisiti. Ke joxung, tro ni a isi me angeic.” 33 Ngo sa jë hi Saulo ka hape: “Tha ijiji hmunë kö troa isi memine la atre Filisiti, ke nekönatr pala kö hmunë. Nge ame angeic, ka sooce* hë angeic qaane lo kola thöth.” 34 Ngo öni Dravita: “Joxung, ame thei kaka, ka thupë mamoe ni. Nge ngöne la ketre drai, hna traqa la ketre liona, me thapa la mamoe. Nge ngöne la ketre ijin, hna tune fe hnene la bea. 35 Matre hnenge hna huzu nyidro, me lep, me thapa la mamoe qa hnine la që i nyidro. Nge ame lo nyidroti a cile koi ni, hnenge hna ea catrëne la lue enaj i nyidro, me humuthi nyidro. 36 Hnenge hna humuthi nyidroti asë, liona me bea. Nge tro fe la atre Filisiti hna tha xötrehatren* a hane tui nyidro, ke hnei angeic hna thele isi memine la itre sooc ne la Akötresie ka mel.” 37 Thupene lai, öni Dravita: “Tro kö Iehova, atre amele ni qaathene la liona me bea, a amele ni qaathene lai atre Filisiti.” Matre öni Saulo: “Nga tro jë, nge epi tro Iehova a ce me eö.”
38 Saulo a heetrë Dravita jë hnene la iheetr ne isi i nyidrë, me ati itrapetre kopa hune la he i Dravita, me heetrëne la imano hnene la imano kopa. 39 Thupene lai, Dravita a acatrene jë la taua i Saulo kowe la beletre i angeic, me tupathe troa tro. Ngazo pe, thatreine kö Dravita tro, ke tha majemine kö angeic heetrë iheetr ne isi. Matre öni angeic koi Saulo: “Tha ka majemi kö ni kowe la itre ewekë celë, nge thatreine kö ni tro.” Matre Dravita a una pi la iheetr ne isi. 40 Nge Dravita a xome pi la sine tö i angeic, me uti kowe la hneopegejë troa iën la 5 lao neköi wene etë ka jijia, me amë hnine la watreng ne thupë öni. Nge Dravita a tro ju kowe la atre Filisiti memine la trehle i angeic.
41 Nge kolo pala hi a easenyi trootro lai atre Filisiti, nge kola tro pa la atre ajö jia ne isi i angeic. 42 Nge ame hë la kola öhnyi Dravita hnene lai atre Filisiti, angeic a hnyimasai Dravita, ke nekönatr, nge ka ucici lolo la iqëmeke i nyën. 43 Matre önine lai atre Filisiti ka hape: “Kuli ni matre tro hmunë a traqa fë sine usis?” Angeic a eji Dravita jë ngöne la ëjene la itre haze i angeic. 44 Nge öni angeice jë hi koi Dravita ka hape: “Trohemi, nge tro ni a thuane la itre waco, me itre öni wael hnene la ngönetrei eö.”
45 Dravita a sa jë ka hape: “Eö a traqa koi ni me taua, me lue jo, ngo eni a tro koi eö ngöne la ëje i Iehova, joxu ne la itre trongene isi e hnengödrai, Akötresie ne la itre sooc ne Isaraela, lo hnei eö hna hë isi kow. 46 Enehila, tro Iehova a nue eö koi ni, nge tro ni a humuthi eö, me thupa la nyinawa i eö. Enehila, tro ni a thuane la itre waco me itre öni wael hnene la ngönetrei ne la itre sooc ne Filisiti. Nge tro la itre atr e cailo fen a atre laka, hetre Akötresi Isaraela. 47 Nge tro la nöjei atr e celë* a trotrohnine laka, tha Iehova kö a amelen hnei taua me jo, ke isi i Iehova la. Nge nyidrëti hi la ka iëne la atre huun. Nge tro kö nyidrëti a nue epun koi hun.”
48 Nge hnene la atre Filisiti hna tro koi Dravita. Nge Dravita a canga nyinyape pi kowe la hna cil hnei itre ithupëjia, matre troa itronyi memine lai atre Filisiti. 49 Dravita a xome pi la ketre wene etë qa hnine la watrenge i angeic, me tha trehlene lai atre Filisiti. Nge hnene la wene etë hna eatrën me lö hnine la göpadri i angeic, ene pe, kei pi hi angeic, me tro pa i që e kuhu hnadro. 50 Celë hi aqane ngaane Dravita la atre Filisiti hnei trehle me wene etë. Matre ngacama pëkö taua i Dravita, ngo hnei angeice hna humuthe lai atre Filisiti. 51 Nge matre xecie ka hape, meci hnyawa ha, hnei Dravita hna nyinyape kowe lai atre Filisiti, me të hui angeic, me hule la taua qa hnine la itrengen, me thupa la he i angeic. Matre ame hë la kola öhn hnei angetre Filisiti laka, meci hë lo atre ka catr, angatr a ikötrenyi pi.
52 Qa ngöne lai, mejë jë hi la itre trahmanyi ne Isaraela me Iudra. Angatr a sue me huzune la angetre Filisiti qaane la hnathup, uti hë la itre qëhnelö ne Ekerona. Ala nyimu la angetre Filisiti hna humuth, nge kola imekölenyi la itre ngönetrei ka mec ngöne la gojenyi ne Saraim, uti hë e Gatha me Ekerona. 53 Nge thupene la hna pane huzune la angetre Filisiti, hnene la angetre Isaraela hna bëek, me thapa la itre mo qa hnine la hna lapa ne la itre sooc i angetre Filisiti.
54 Dravita a xome pi la he i Goliatha, me lö fë e Ierusalema. Ngo ame la itre jia ne isi ne la atre Filisiti, Dravita a amë ju hnine la itate i angeic.
55 Ngo ame lo Saulo a goeë Dravita e nyinyap kowe lo atre Filisiti, hnei angeice hna hnyingë Abinera, lo tane la itre sooc ka hape: “Nekö i drei la?” Matre hnei Abinera lo hna sa ka hape: “Joxu, eni a nyipici koi nyipë, thatre kö ni.” 56 Nge hnene la joxu hna upi Abinera me hape: “Pane thele jë, nge qaja jë koi ni ka hape, nekö i drei nyën.” 57 Matre ame hë la Dravita a ase isi memine lo atre Filisiti, hnei Abinera hna thei angeic, me tro sai angeic koi Saulo. Nge Dravita a xometrongëne la he ne la atre Filisiti. 58 Öni Saulo jë hi: “Nekö i drei hmunë neköng?” Sa jë hi Dravita ka hape: “Eni la nekö ne la hlue i nyipë, Iese, atre Bethelema.”