Pane Tus Samuela
9 Hetre ketre atr qa Beniamina ka trenamo catr, Kiso la ëjen. Angeice la ketre matra i Abiela, lo nekö i Zero, nekö i Bekorath, nekö i Afia qa Beniamina. 2 Hetre nekö i angeic, Saulo la ëjen. Ketre nekö trahmanyi lai ka mingöminge catr, nge pëkö ka mingöminge tui angeic e Isaraela. Nge qaane la lue hnaiape i angeic uti hë la he, qea catre kö angeic hune la nöjei atr.
3 Ame hë la kola patre la itre boliko i Kiso, keme i Saulo, öni Kiso jë hi koi Saulo ka hape: “Pane tro jë memine la ketre hlu, nge tro epon a thel agöne la itre boliko.”* 4 Matre hnei Saulo me hlue i angeic hna Eferaima thenge, ngöne la itre hugit, nge thupene lai, hnei nyidroti hna Salisa thenge. Ngo tha öhne kö nyidroti la itre boliko. Nyidroti a trongëne jë la nöje Salim, ngo patre kö itre ej. Matre nyidroti a trongën asë jë la zi i angetre Beniamina, ngo patre pala hi itre ej.
5 Nge ame hë la nyidroti a traqa e Zuf, öni Saulo jë hi kowe la hlu: “Jë fe, nyiso hmaca a bëek, wanga tro pena ha kaka a hnehengazo pi nyiso hune la itre boliko.” 6 Ngo önine la hlu: “Dreng, hetre atre i Akötresie ngöne la traone celë. Ketre atr hna metrötrën, nge ka eatre pala hi la hnei nyidrë hna qaja. Jë fe ma tro nyiso a wai nyidrë, nge ma tro jë nyidrë a köja gojenyi nyiso.” 7 Ngo sa jë hi Saulo ka hape: “Maine tro nyiso a tro koi nyidrë, nemene la nyine tro nyiso a traqa fë? Pëhë falawa hnine la itre watrenge i nyiso, nge pëkö ahnahna i nyiso kowe la hlue ne la nyipi Akötresie. Nemene la itre xa hnei nyiso hna hetreny?” 8 Matre önine la hlu: “Goeën, hetrenyi ni la itre xa neköi pies sileva, nge tro ni a hamëne kowe la hlue ne la nyipi Akötresie, nge tro hë nyidrëti a amamane la gojenyi koi nyiso.” 9 (Ame ekö e Isaraela, maine kola pi hnying koi Akötresie hnene la ketre atr, tro angeic a qaja ka hape: “Jë fe, tro nyiso a wange la atre qeje pu.”* Ke ame la hna hën enehila ka hape, perofeta, hna hën ekö ka hape, atre qeje pu.) 10 Öni Saulo jë hi: “Nyipici eö, nyiso a tro.” Nyidroti a tro ju kowe la traon ne la hlue ne la nyipi Akötresie.
11 Nyidroti petre kö a nango elë kowe la traon, nge ixelë ju hi nyidro me itre nekö jajinyi ka tro troa tha tim. Matre öni nyidro: “E celë hi lo atre qeje pu?” 12 Sa jë hi angatr ka hape: “Öö, nyidrëti hë e celë, goeën hana cahmijë nyidrë. Ngo canga lolo jë, ke nyidrëti hi a traqa matre tro la nöj a tro fë huuj hune la hnë hmi gaa hmitrötr. 13 E lö hë epon kowe la traon, tro epon a öhnyi nyidrë. Ngo canga tro jë, ke tro nyidrëti a elë kowe la hnë hmi gaa hmitrötr troa xen. Nge tha tro kö la nöj a xen, e tha pane traqa kö nyidrë. Ke tro nyidrëti a pane amanathithine la huuj. Nge thupene lai, ijije hë tro la itre atr a xen. Haawe, canga elë jë, tro hë epon a öhnyi nyidrë.” 14 Matre nyidroti a elë jë. Nge ame hë la nyidroti a lö, fetra pi hi Samuela troa ixelë me nyidro, me tro sai nyidro kowe la hnë hmi gaa hmitrötr.
15 Ame lo heji qëmekene tro Saulo a traqa, ase fe hë Iehova qaja* koi Samuela ka hape: 16 “Elany, hmekune la hawa ce, tro ni a upe koi eö la ketre nekö trahmany qa Beniamina. Tro eö a ië angeic troa joxu ne la nöjeng Isaraela. Nge tro angeic a amelene la nöjeng qaathene la angetre Filisiti. Ke öhne hë ni la akötre ne la nöjeng, nge traqa ha koi ni la itre treije i angatr.” 17 Matre ame hë la Samuela a öhnyi Saulo, öni Iehova ka hape: “Angeice hi lo hnenge hna qaja ka hape, ‘Tro angeic a musi kowe la nöjeng.’”*
18 Saulo a tro ju koi Samuela ngöne la qëhnelö ne la traon, nge öni angeic: “Eni a pane sipo nyipë, ekaa la hnalapa ne la atre qeje pu?” 19 Sa jë hi Samuela ka hape: “Eni hi, ngo elë pai eö jë kowe la hnë hmi gaa hmitrötr. Nge enehila, tro epon a ce xeni me eni. Nge elanyi hmakany, tro hë ni a nue eö, e ase hë ni qaja asë la hnei eö hna pi atre.* 20 Nge the hnehengazone hmaca kö la itre boliko ka patr a köni drai, ke öhne hmaca ha itre ej. Nge ewekë i drei pë hë la nöjei lolo e Isaraela? Hapeu, tha tro kö a itre ewekë i eö, me fami ne la keme i eö?” 21 Sesëkötre pi kö Saulo, matre öni angeic: “Atre Beniamina ni, lapa ka co ne la nöje Isaraela. Nge neköi nemene la faming hune la nöjei fami ne Beniamina. Matre hnauëne la nyipëti a qaja tun?”
22 Samuela a lö sai Saulo jë me hlue i angeic hnine la hnë xen. Nge nyidrëti a alapa nyidroti ju ngöne la itre göhnë ka tru. Nge ma ala 30 lao trahmanyi ka ilapany e cili. 23 Öni Samuela jë hi kowe la ka kuci xen ka hape: “Awe jë lo mitr hnenge hna hamë eö, lo hnenge hna upi eö troa pane amë acon.” 24 Matre hnene la atre kuci xen hna xome la inaean, me atë qëmeke i Saulo. Nge öni Samuela: “Kola amë qëmekei eö la hna hnëkëne koi eö. Öni jë, ke hna amë acon koi eö, thatraqane la ijine celë. Ke öninge lo, ‘hetre atr hnenge hna hën.’” Haawe, ngöne la drai cili, hnei Saulo hna ce xeni me Samuela. 25 Thupene lai, angatr a ce uti pi qa ngöne la hnë hmi gaa hmitrötr kowe la traon. Nge Samuela pala hi a ithanata me Saulo ngöne la hune uma. 26 Ngöne la drai thupen, hnei angatr hna canga ihlë. Nge e kaqa ne lai, hnei Samuela hna hë Saulo me hape: “Hnëkë jë, matre tro ni a nue eö.” Saulo a canga hnëkë jë, nge angeic me Samuela a tro ju. 27 Nge ame hë la angatr a traqa kowe la ifego ne la traon, öni Samuela koi Saulo: “Pane upe jë la hlue i eö troa tro pa.” Matre hnene la hlu hna tro pa, nge öni Samuela: “Ngo ame eö, pane cile ju. Hetre maca i Akötresie nyine tro ni a qaja koi eö.”