Isaia
31 Ekölöhini la itre ka uti troa thele ixatua e Aigupito,
Me qale kowe la itre hose i angatr,
Me mejiun kowe la itre ikatr, ke ka nyimutre,
Me kowe la itretre ti hos,* ke itre ka catr angatr.
Ngo goi tha gala fe angatr kowe la Atre Ka Hmitrötr e Isaraela,
Nge tha thele Iehova kö hnei angatr.
2 Ngo ka inamacane nyidrë, nge tro nyidrëti a axulune la akötr,
Nge tha tro hmaca kö nyidrëti a bëeke kowe la hnei nyidrëti hna qaja.
Tro nyidrëti a cil kowe la itre atr ka kuca la ngazo
Me kowe la itre ka nyixölene la itre atr ka iakötrë.
3 Ame la angetre Aigupito, ke itre atre hi angatr ngo tha itre haze kö;
Ijöne hi la itre hose i angatr, ngo tha itre u ka mene kö.
Ame hë la Iehova a troa sathe la ime i nyidrë,
Ke tro ha kei la atre iamele
Nge tro ha hna la atr hna amelen;
Tro ha ce apatrenyi angatr asë.
4 Ke öni Iehova koi ni:
“Tune la liona, ene la liona ka catr nge ka ho troa thupëne la tha i nyën,
Ngöne la kola cile xötreithi nyën hnene la itretre thupë mamoe
Nge ka tha xouene kö la nine i angatr,
Memine la meje i angatr,
Ketre tun, tro fe Iehova joxu ne la itre trongene isi e hnengödrai a uti troa isigöline
la wetre Ziona memine la sasala ne ej.
5 Tune la waco ka sesë troa thupën la itre nekön, tro fe Iehova joxu ne la itre trongene isi e hnengödrai a isigöli Ierusalema.
Tro nyidrëti a isigölin me amelen ej.
Tro nyidrëti a thapa me nuamelen ej.”
6 “Isaraela fe, bëeke jë kowe la hnei* epuni hna icilekeu memin. 7 Ke ngöne la drai cili, tro hë epuni a isa nuetrije la itre haze i epun sileva ka pë alien, me itre haze gool ka pë eloin, lo hnei epuni hna kuca hnene la itre iwanakoime i epun, ke ketre ngazo lai.
8 Nge tro ha humuthe la atre Asuria hnei taua, ngo tha hnei taua i atre kö;
Tro la taua a heje thaitrë angatr, ngo tha hnei taua i atre kö.
Tro angeic a kötrene la taua,
Nge tro ha folosan la itre thupëtresij i angeic.
9 Tro ha patre la giti angeic hnene la xou atraqatr,
Nge tro la itre tane i angeic a hmengöhmengön qëmekene la hatren,” öni Iehova,
Lo atrekë ewekën la lai* e Ziona, memine la ifur e Ierusalema.