Levitiko

18 Öni Iehova hmaca jë hi koi Mose: 2 “Hape jë kowe la angetre Isaraela: ‘Iehova ni Akötresi epun. 3 Tha tro kö epuni a nyitipun la angetre Aigupito, lo nöj hnei epuni hna lapa ngön; nge tha tro kö epuni a nyitipun la angetre Kanana, lo nöj hnenge hna tro sai epuni kow. Tha tro kö epuni a xötrethenge la itre hnei angatr hna majemine* kuca. 4 Qa i epun troa kuca la itre hnenge hna amekötin, me thupëne la itre wathebong, me trongën itre ej. Iehova ni Akötresi epun. 5 Qa i epun troa thupëne la itre wathebong me itre hnenge hna amekötin; ame la atre trongën itre ej, ke tro hë angeic a mel. Iehova ni.

6 “‘Tha tro kö la ketre e epun a easenyine la ketre sipu atrene la hnalapa i angeic, matre ce meköl* memin. Iehova ni. 7 Tha tro kö eö a ce meköl memine la keme i ö, me ce meköl memine la thine i ö, ke thine i ö lai; tha tro kö eö a ce meköl me eahlo.

8 “‘Tha tro kö eö a ce meköl memine la ifëneköne la keme i ö, ke tro lai a ahmahmanyi nyidrë.*

9 “‘Tha tro kö eö a ce meköl memine la sipu xa i ö, ene la neköne la keme i ö maine thine i ö, nge maine hna hnaho angeice tui ö e kuhu hnalapa, maine e tröne pena.

10 “‘Tha tro kö eö a ce meköl memine la api i ö jajiny, lo neköne la nekö i ö trahmany maine jajiny, ke tro lai a ahmahmanyi ö.

11 “‘Tha tro kö eö a ce meköl memine la neköne ne la keme i ö memine la ketre föe, ke sipu xa i ö hi lai.

12 “‘Tha tro kö eö a ce meköl memine la sipu xa ne la keme i ö, ke sipu xa ne la keme i ö lai.

13 “‘Tha tro kö eö a ce meköl memine la sipu trejin ne la thine i ö, ke sipu trejin me eahlo hi lai.

14 “‘Tha tro kö eö a ahmahmane la trejin ne la keme i ö, ngöne la eö a ce meköl memine la föi nyidrë, ke thine i ö lai.

15 “‘Tha tro kö eö a ce meköl memine la tresi i ö, lo föene la nekö i ö; tha tro kö eö a ce meköl me angeic.

16 “‘Tha tro kö eö a ce meköl memine la ifëneköne la trejine me eö, ke tro lai a ahmahmane la trejin me eö.

17 “‘Tha tro kö eö a ce meköl memine la ketre föe me nekö i eahlo jajiny. Tha tro kö eö a xome la api i eahlo jajiny, lo neköne la nekö i eahlo trahmany maine jajiny, matre ce meköle memin, ke itre sine ne la madra i eahlo lai, nge ewekë ka sisi catre lai.*

18 “‘Tha tro kö eö a xome la trejin ne la ifënekö i ö nyine hnaaluene föe, me ce meköl me angeic, e mele pala kö la ifënekö i ö, wanga tro nyidroti a imethinë.*

19 “‘Tha tro kö eö a easenyine la föe ka pui ngazo matre ce meköl me angeic, ngöne la ijine angeic a meci föe.

20 “‘Tha tro kö eö a ce meköl memine la ifëneköne la atre lapa easenyi ö; tro hë eö a pui ngazo.

21 “‘Tha tro kö eö a huujëne la ketre nekö i ö koi Moleka,* ke tro hë eö lai a adrone la ëje ne la Akötresi ö. Iehova ni.

22 “‘Tha tro kö eö a ce meköl memine la trahmany tune la aqane ce meköl me föe, ke ewekë ka sisi catre lai.

23 “‘Tha tro kö la trahmany a ce meköl memine la ketre öni; wanga pui ngazo jë angeic. Ketre, tha tro kö la föe a cil qëmekene la ketre öni matre ce meköl memin, ke ewekë lai ka tha meköti kö qëmekei Akötresie.

24 “‘The apuingazonyi epuni kö hnene la itre ewekë cili, ke hnene la itre ewekë cili hna apuingazone la itre nöj, lo hnenge hna troa helën qëmekei epun. 25 Celë hi matre pui ngazo hë la nöj, nge tro ni a nyithupene koi angatr, nge tro hë la nöj a hmitrane la itre atre lapan ej. 26 Ngo qa i epun angetre Isaraela, me itre trenyiwa ka lapa thei epun, troa metrötrëne la itre wathebong me itre hnenge hna amekötin, nge tha tro kö epuni a kuca la ketre ewekë cili ka sis. 27 Ke hna kuca la nöjei ewekë cili ka sis hnene lo itre atrene la nöj ka pane lapan ej, matre pui ngazo hë la nöj enehila. 28 Ngo maine tha tro kö epuni a angazone la nöj, haawe, tha tro jë kö la nöj a hmitranetriji epun, tune la aqane hmitranetrije la itre nöje hnapan. 29 Nge ame la itre atr ka troa kuca la ketre ewekë ne la nöjei ewekë cili ka sis, ke tro ha lep apatrenyi* angatr qa ngöne la nöj. 30 Nge tro epun a eatrëne lo itre götrane qa i epun, ene la troa kötrene lo itre ewekë ka sis hna majemine kuca qëmekene tro epuni a traqa, matre tha tro kö a apuingazonyi epun, ke Iehova ni Akötresi epun.’”