Ezekiela
11 Thupene lai, hnene la ketre ua hna xepi ni me tro sai ni kowe la qëhnelö e koië ne la uma i Iehova, lo qëhnelö ka qëmek e koië. Nge ngöne la qene qëhnelö, hnenge hna öhne la 25 lao trahmany; Iazania nekö i Azura me Pelatia nekö i Benaia thei angatr, lo lue nekö i joxu ne la nöj. 2 Matre öni Akötresieti jë hi: “Nekö i atr, angatre hi la itre ka ce thë la ngazo me hamë eamo ka ngazo ngöne* la traone ce. 3 Öni angatr: ‘Enehila hi la ijine troa xupi uma. Ketre öl* la traon,* nge easë la itre sine mitr.’
4 “Haawe, perofetane jë la ka troa traqa koi angatr. Öi perofetane jë, nekö i atr!”
5 Ame hna huliwa theng la ua i Iehova, nge öni Akötresie: “Hape jë koi angatr: ‘Hane hi la hna qaja hnei Iehova: “Nöje Isaraela fe, nyipici hi la hnei epuni hna qaja, nge atre hi ni la hnei epuni hna mekun.* 6 Ala nyimu la ka mec ngöne la traon pi epun, nge hnei epuni hna atiqane la itre gojenyi e cili hnene la itre ka mec.”’” 7 “Haawe, hane hi la hna qaja hnei Iehova Joxu Ka Sisitria: ‘Ame la itre ka mec hnei epuni hna kuiëne trongën ngöne la traon, ke angatre hi la mitr, nge ketre öl la traon. Ngo tro kö a xomi epuni qa lai.’”
8 “‘Hnei epuni hna xouene la taua, nge celë hi la hnenge hna troa upe matre lepi epun,’ öni Iehova Joxu Ka Sisitria. 9 ‘Tro ni a xomi epun qa ngöne la traon, me nue epun kowe la itre trenyiwa, me axulune la iameköti koi epun. 10 Tro ha humuthi epun hnei taua. Nge tro ni a ameköti epun ngöne la ifego ne Isaraela, nge tro hë epuni a atre laka, Iehova ni. 11 Tha tro kö la traon a nyi öle i epun, nge tha tro kö epuni a nyi mitr. Tro pe ni a ameköti epun ngöne la ifego ne Isaraela, 12 nge tro hë epuni a atre laka, Iehova ni. Tha hnei epuni kö hna metrötrën la itre wathebong me trongëne la itre hnenge hna amekötin. Ngo hnei epuni pe hna trongëne la itre qenenöj ne la itre nöje xötreith.’”
13 Ame ju hi la eni a ase perofetane lai, ke meci pi hi Pelatia nekö i Benaia. Matre hnenge hna kei qe ipië me sue ka hape: “Ekölöhini Iehova Joxu Ka Sisitria! Tro jë kö nyipëti a apatrene la itre ka lapa pe e Isaraela?”
14 Ame hnei Iehova hmaca hna ithanata koi ni me hape: 15 “Nekö i atr, hnene la angetre Ierusalema hna qaja kowe la itre trejin me eö, lo itre ka ijije troa itö hnan, me kowe la nöje Isaraela asë ka hape: ‘Lapa ananyi Iehova pi. Zi së la nöj, ke edrö së lai.’ 16 Celë hi matre qa i ö troa qaja koi angatr ka hape: ‘Hane hi la hna qaja hnei Iehova Joxu Ka Sisitria: “Hnenge hna ananyi angatr e cailo fen, me aisaije angatr ngöne la itre nöj. Ngo tro ni a tune la hnë hmi koi angatre koi hnepe ijine hi, ngöne la itre nöj hnei angatre hna tro kow.”’
17 “Qa ngöne lai, tro eö a qaja koi angatr ka hape: ‘Hane hi la hna qaja hnei Iehova Joxu Ka Sisitria: “Tro ni a acasi epun qaathene la itre nöj, nge tro ni a hë epun qa ngöne la itre nöj hna aisaije epuni kow. Nge tro ni a hamë epuni la nöje Isaraela. 18 Nge tro hmaca angatr a bëek, me apatrene la itre ewekë ka sis me itre huliwa hna methinën qa cili. 19 Eje hi, tro ni a acasine la itre hni i angatr,* me amë thei angatr la mekun ka hnyipixe; eje hi, tro ni a xometrij qa ngöne la itre ngönetrei i angatr la hni ka catr tune la etë, me hamë angatre pena la hni ka menyik tune la ijön,* 20 matre tro angatr a metrötrën la itre hnenge hna amekötin, me drengethenge me trongëne la itre wathebong. Tro hë angatr e cili a nöjeng, nge tro hë ni a Akötresi angatr.”’
21 “‘“Ngo ame pena lo itre ka xele ma nuetrije la itre ewekë ka sis me itre huliwa i angatr hna methinën, ke tro hë ni a kuca matre tro angatr a xeni pune la itre aqane ujë i angatr,” öni Iehova Joxu Ka Sisitria.’”
22 Ame hnene la itre kerubi hna xejë draië la itre iape i angatr, nge ezi angatr la itre wil, nge hui angatre la elolo ne la Akötresi Isaraela. 23 Thupene lai, hnene la elolo i Iehova hna mejë qa hune la traon me cile pena hune la wetr ngöne la götrane koië ne la traon. 24 Nge hnene la ketre u hna kepe ni me tro sai ni, jëne la ketre hna meköle goeën qaathei Akötresie, kowe la itre hna kötre fë a tro Kaledaia. Ame hna patre pi la hnenge hna meköle goeën. 25 E cili, hnenge pë hë hna porotrikën kowe la itre hna kötre fë, la nöjei ewekë hnei Iehova hna amamai ni.