Pane Tus Kowe La Angetre Korinito
9 Hapeu, tha hna nue ni kö troa kuca la ajang? Tha aposetolo kö ni? Tha hnenge kö lo hna öhnyi Iesu Joxu së? Nge tha nyipunieti kö la thangane lo huliwange koi Joxu? 2 Ngacama, ame koi itre xan, tha aposetolo kö ni, ngo aposetolo ni koi nyipunie! Ke nyipunieti hi la itre hatren ka anyipicine la hnëqang göi Joxu.
3 Ngo ame koi itre ka qeje ni, eni a sa koi angatr ka hape: 4 Ke hapeu, tha meköti* kö e tro huni a xeni me ij? 5 Nge hapeu, tha ijiji huni kö troa föene la ketre trejine föe, tune la itre xa aposetolo me itre trejine me Joxu, tui Kefa?* 6 Nge hapeu, eni hi me Banaba la lue hna wathebone troa nue la huliwa mani? 7 Drei la atr e angeic pala kö a sooc ka troa nyithupene la nöjei ewekë i angeic? Drei la atr tra vine ngo tha iji wene pe? Nge drei la atr axö mamoe ngo tha iji meleke pe?
8 Hapeu, eni kö a qaja la itre ewekë celë thenge la mekuna i atr? Tha hna qaja kö lo lai hnene la Trenge Wathebo? 9 Ke hna cinyihane lo ngöne la Trenge Wathebo i Mose ka hape: “Tha tro kö a hnöth la që ne la kau e kola wejeweje wene qitr.” Matre hapeu, itre kau la hnei Akötresieti hna akötrehnin? 10 Maine nyidrëti a amekötine lai pi së? Nyipici hna cinyihane lai nyine loi koi së, ke ame la atre ujë dro, angeic a mejiune troa menuë qitr, nge ame la atr lepelepe qitr, angeic a mejiune troa xeni wen.
11 Haawe, pine laka hne huni hna kuikuiën la itre ewekë i Akötresie koi nyipunie, hapeu, tha meköti kö e tro huni a kepe mo qaathei nyipunie? 12 Nge maine meköti tro la itre xan a kepe ewekë qaathei nyipunie, hapeu, tha meköti* kö e tro huni a kapa atrun? Ngo ame pe, tha hne huni kö hna ujë tun, eahuni pe a xomihnine la nöjei ewekë, matre tha tro kö a ajolëne la maca ka loi göi Keriso. 13 Nge hapeu, thatre kö nyipunie laka, itre trene hnëqa ka hmitrötr a xome la itre xen ne la uma ne hmi, nge itretre nyihlu ngöne la ita ne huuj a kapa la itre xa ewekë hna huujën ngön? 14 Ketre, hnene la Joxu hna amekötin kowe la itre ka cainöjëne la maca ka loi, troa mel hnene la maca ka loi.
15 Nyipici, tha hnenge kö hna hane kapa la ketre ewekë celë. Ngo tha eni kö a cinyihane lai matre tro ni a hane kapa, ke ka loi ju kö la tro ni a mec. Xele ni e luzi pi la ewekë nyine selë ni! 16 Haawe, ame la eni a cainöjëne la maca ka loi, tre tha göi tro kö a selë ni, ngo hnëqange kö lai. Eje hi, hnëjine hë ni e tha qaja kö ni la maca ka loi! 17 Matre, e tro ni a kuca qa kuhu hning, hetre thupeng; ngo e tro ni a kuca nge tha ajange kö, hnëqange kö lai. 18 Haawe, nemene hö la thupeng? Troa tro fë gufane la maca ka loi, matre tha tro kö ni a imusinë la eni a cainöjëne la maca ka loi.
19 Ke ngacama tha hlue ne la ka ala nyimu kö ni, ngo hnenge hna nyihluene la ka ala nyim, matre ahmalane la hni ne la ka ala nyim. 20 Matre, ame koi angetre Iudra, hnenge hna tune la atre Iudra, matre ahmalane la hni i angetre Iudra; ame koi itre ka lapa fene la wathebo, hnenge hna tune la itre ka lapa fene la wathebo, ngacama tha eni kö fene la wathebo, ngo matre ahmalane la hni ne la itre ka lapa fene la wathebo. 21 Nge ame kowe la ka pë wathebo, hnenge hna tune la ka pë wathebo, ngacama hetre wathebong qëmekei Akötresie, nge eni fene la wathebo i Keriso, matre ahmalane la hni ne la itre ka pë wathebo. 22 Ame kowe la itre ka kucakuca, hnenge fe hna hane kucakuca, matre ahmalane la hni ne la itre ka kucakuca. Haawe, hnenge hna isine troa xome la nöjei pengön asë, thatraqane la nöjei atr asë, matre amelene la itre xan. 23 Eni a kuca asë la nöjei ewekë cili pine la maca ka loi göi troa ce thawa me itre xan.
24 Nge hapeu, thatre kö nyipunie ka hape, ame ngöne la iwaja, ala nyimu la itre ka nyinyap, ngo ala casi hi la ka kapa la thupen? Haawe, nyinyape jë matre kapa pi nyipunie la thupen. 25 Nge ame asë hi la itretre nyinyap, angatr a isa xomehnöthe la nöjei ewekë asë, ke nyipici, aja i angatr troa kapa la korona ka troa hnyiqetr. Ngo ame easë, easë pe a isine kowe la korona ka tha tro kö a hnyiqetr. 26 Matre hane hi la aqane nyinyapeng, tha eni kö a nyinyape menu, nge hane hi la aqane ising, eni a hna, matre tha tro kö a lepe eny. 27 Nge eni a jenge* la ngönetreing, me xomacon ej kösë hlu, matre e ase jë ni cainöje koi itre xan, tha tro kö a triji* ni pine la ketre ewekë.