Numera
19 Öni Iehova hmaca jë hi koi Mose me Arona: 2 “Hane hi la wathebo hnei Iehova hna ahnith: ‘Upe jë la angetre Isaraela troa hamë eö la kau föe ka oma, nge ka pë ethan me pë mecin, nge hna tha huliwane kö. 3 Qanyi epone pë hë troa hamën koi Eleazara atre huuj, nge tro angeic a ea la öni tröne la lapa, nge tro pë hë la ketre a humuth ej qëmekei Eleazara. 4 Thupene lai, tro Eleazara atre huuj a xome la sin ne la madra hnene la iwanakoime angeic, me a 7 lao thathan hmekune la hnë lö ne la itat ne icasikeu. 5 Nge tro ha dreuth la kau föe qëmekei angeic, tro ha dreuth la ikupein, me ijön, me madra, me agetrin ej. 6 Tro pë hë la atre huuj a xome la sinöe arasi, me uke hisop,* me imaano ka palulu, me kuiën kowe la eë hna dreuth la kau föe. 7 Ase jë hi lai, tro la atre huuj a wasine la itre iheetre i angeic me sië* tim. Thupene lai, ijiji angeice hë troa tro kowe la lapa; ngo tro pala kö angeic a pui ngazo uti hë e hej.
8 “Nge ame la atre dreuth la kau föe, ke tro angeic a wasin la itre iheetre i angeic ngöne la tim, me sië tim. Ame pe, tro pala kö angeic a pui ngazo uti hë e hej.
9 “Tro pë hë la ketre trahmany ka pui loi a jeköth la hnatresij ne la kau föe, me amë tröne la lapa ngöne la gaa pui loi; tro la nöje Isaraela a thupën la hnatresij cili, ke thatraqane la tim nyine apuiloin. Celë hi huuj ne ngazo. 10 Nge tro pë hë la atre jeköth la hnatresij ne la kau föe, a wasine la itre iheetre i angeic, ngo tro pala kö angeic a pui ngazo uti hë e hej.
“‘Hane hi la wathebo ka cile hut, thatraqane la angetre Isaraela me itre trenyiwa thei angatr: 11 Ame la atre ketr la ngönetrei ka mec,* ke tro angeic a pui ngazo koi 7 lao drai. 12 Ngöne la hnaakönine drai, tro angeic a apuiloinyi angeic hnei tim, nge tro pë a jele pui loi angeic ngöne la hna 7 ne drai. Ngo e tha hnei angeice kö hna apuiloinyi angeic ngöne la hnaakönine drai, ke tha tro kö a jele pui loi angeic ngöne la hna 7 ne drai. 13 Ame la atre ketr la ngönetrei ka mec, nge tha hna apuiloinyi angeice kö, ke angeice lai a pë metrötr kowe la uma maano i Iehova; tro ha apatrene la atre cili qaathene la angetre Isaraela. Pine laka, tha hna thatha angeice kö hnene la tim ne apuiloin, ka pui ngazo pala hi angeic. Tha patre kö qaathei angeic la pui ngazo.
14 “‘Hane hi la wathebo kowe la atr ka mec hnine la itat: Ame la nöjei atr asë ka lö hnine la itat maine ka lapa hnine la itat, tro angatr a pui ngazo koi 7 lao drai. 15 Nge ame la nöjei trengen hna fe nge ka pë thingen, ke ka pui ngazo. 16 Nge ame la ka ketr la atr hna humuth hnei taua ngöne la hlapa, maine ngönetrei ka mec, me itre jun atr, me hua, tro angeic a pui ngazo koi 7 lao drai. 17 Nge ame göne la atr ka pui ngazo, troa nei wamine hnatresij ne la huuj ne ngazo hnine la ketre trengen, me fii timin. 18 Nge tro la atr ka pui loi a xome la uke hisop, me hnea ngöne la tim, me thathane la itat, me nöjei trengen asë, me nöjei atr asë ka lapa e hnin, memine la atre ketr la itre jun, me atre hna humuth, me ngönetrei ka mec maine hua. 19 Nge tro fe la atr ka pui loi a thathan la atr ka pui ngazo hnei tim, ngöne la hnaakönine drai me hna 7 ne drai, nge e cili, tro ha jele pui loi angeic ngöne la hna 7 ne drai; thupene lai, qa ne la atr ka pui ngazo troa wasine la itre iheetre i angeic me sië tim, nge tro hë angeic a pui loi e hej.
20 “‘Ngo maine ka pui ngazo la atr, nge tha hnei angeice kö hna apuiloinyi angeic, ke troa apatrenyi angeic qa ngöne la nöj, pine angeic tha ahmitrötrën la uma ne hmi i Iehova. Pine laka, tha hna thatha angeice kö hnei tim ne apuiloin, haawe, ka pui ngazo pala kö angeic.
21 “‘Celë hi wathebo ka cile hut thatraqai angatr: Ame la atr ka thathane la tim nyine apuiloin, ke tro angeic a wasine la itre iheetre i angeic. Nge ame la atre ketr la tim nyine apuiloin, tro angeic a pui ngazo uti hë e hej. 22 Nge ame la nöjei ewekë asë hna troa ketr hnene la atre pui ngazo, ke troa pui ngazo. Nge ame la atr ka troa ketr itre ej, ke troa pui ngazo uti hë e hej.’”