Iobu
13 “Nyipici, öhne hë ni hnei luemekeng la itre ewekë cili,
Nge drenge hë la lue hnangenyëng nge trotrohnine hë ni.
2 Nge atre fe hi ni la itre ewekë hnei epuni hna atre;
Nge tha ka sisitria kö epun hui eni.
3 Pi tro kö ni a ithanata kowe la Ka Tru Trenge Men;
Nge ajange kö troa qejepengöne ej koi Akötresie.
4 Ngo epuni a silitrengathoi ni;
Nge epuni la itre droketre ka pë hnënyöngön.
5 Maine hnei epuni ju hna lapa thaup,
Ke hatrene hi la inamacan i epun.
6 Pane drenge ju la aqane qejepengöne ni,
Nge hnangenyëne ju la aqane isigöline ni.
7 Hapeu, tro kö epuni a ithanata ngöne la ëje i Akötresie cememine la tria,
Me nyi qene qaja i nyidrë fë la trenge iaö?
8 Hapeu, tro kö epuni a nyixöle i nyidrë,
Me isigöline la nyipi Akötresie?
9 Maine tro nyidrëti a waipengöi epun, tro kö a jele meköti epun?
Nge hapeu, tro kö epuni a iaö nyidrë tune la kola iaöne la atr?
10 Nge maine ngöne la gaa sihngödr epuni a ië hna hnim
Haawe, tro hë nyidrëti lai a ameköti epun.
11 Nge hapeu, tha tro kö epuni a xouene la elolo i nyidrë?
Nge tha tro kö a cilaxomi epuni hnene la itre huliwa nyine xouen, ka xulu qaathei nyidrë?
12 Ame la itre trengewekë ka inamacan i epun, kösë itre edromë ne hnatresij;
Nge ame la itre ithanata* i epun, ke ka kaqakaqa tune la itre hag hna kuca hnei dro ka fedr.
13 Lapa thaupe ju qëmekeng matre tro ni a ithanata.
Nge wange pi pë hë la ka troa traqa koi ni!
14 Nge hnauëne laka eni a thele mec*
Me xolouthe la meleng?
15 Nge maine tro nyidrëti a humuthi ni, tro pala kö ni a itreqe;
Nge tro ni a isigöli ni qëmeke i nyidrë.
16 Nge tro hë nyidrëti a amele ni,
Ke tha ijije kö tro la atr ka tha metrötrë* Akötresie a cile qëmeke i nyidrë.
17 Haawe, drenge hnyawa ju la hnenge hna qaja;
Nge hnangenyëne ju la trengewekëng.
18 Goeën! Ase hë ni hnëkëne la nyine tro ni a qaja ngöne la hnakotr;
Nge atre hi ni laka, nyipici la hnenge hna qaja.
19 Matre drei la ka troa isi me eni?
Nge maine tro ni a lapa thaup, ke tro hë ni a mec!*
20 Ngo Akötresieti fe, eni a pane sipo nyipë la lue ewekë,
Matre tha tro kö ni a zae qëmeke i nyipë:
21 Pane ananyine pi qaatheng la ime fao i nyipë,
Nge epi tha tro kö ni a hmengöhmengön hnene la xou qaathei nyipë.
22 Pane ithanata jë koi ni, nge tro hë ni a sa,
Maine pena, pane nue ni pi troa ithanata, nge tro hë nyipëti a sa koi ni.
23 Ke nemene la itre ngazong me itre triang?
Pane amamai ni jë la itre triang memine la ngazong.
24 Nge hnauëne laka nyipëti a xele ma wai ni
Me goeë ni ceitu me ketre ithupëjia?
25 Nyipëti kö a thel troa axouene la ketre drön hna ufe enyin
Me weje huzune la jez ka qaqacil?
26 Ke nyipëti pala hi a cinyianyine la itre ewekë ka akötr nyine upezö ni,
Nge nyipëti a të koi ni la itre ngazo hnenge hna kuca ekö lo eni a nekö trahmany.
27 Ase hë nyipëti alöne la lue cang ngöne la inehe ne iaxösisi,*
Me waipengöne la itre jëng,
Me xötrethenge la itre thupacang.
28 Nge ame la atr,* ej a hnyiqetr tune la ewekë ka pi,
Me tune la iheetr hna xuj hnene la itre neköi öni.