Isaia
5 Eni a pi nyima kowe la hniminang
Me nyima kowe la hnenge hna hnim me hnënge vine i angeic.
Ame hune la sasala, hetrenyi angeic la hnënge vin ka cia ngöne la nyipi dro.
2 Hnei angeic hna uja dro me huletrij la itre etë.
Hnei angeic hna traa vin ka madra me lolo,
Me acili ita ne thup nyipine la hnënge vin,
Me sine la hnë weje wene vin.
Angeic a mejiun laka, tro ej a hamë wene ka loi,
Ngo eje pena a hamë wene ka megi.
3 “Nge enehila, angetre Ierusalema me itre trahmany ne Iudra fe,
Pane ameköti ni jë memine la hnënge vineng.
4 Nemene hmaca kö la nyine tro ni a kuca kowe la hnënge vineng
Nge ase së hë ni kuca asë?
Eni lo a lapa treqen tro ej a hamë wene ka loi,
Ngo hnauëne pena la kola hamë wene ka megi?
5 Enehila, tro hë ni a qaja koi epun
La hnenge hna troa kuca kowe la hnënge vineng:
Tro ni a fejetrij la hna traane xötreith ej,
Matre troa dreuthetrije la vineng.
Nge tro ni a thëtrije la itre hna xupi hag xötreith,
Matre troa tro waja la vineng.
6 Tro pë hë ni a nue la hnepadro celë;
Tha tro kö a thupa la itre picin me wakecan* la vin.
Tro ha cia hnitr me itre ka ithiny e cili,
Nge tro ni a wathebon la itre iaw troa maniën ej.
7 Ame la hnënge vine i Iehova Joxu ne la itre trongene isi e hnengödrai, ke nöje* Isaraela;
Itre trahmany ne Iudra la hlapa hnei nyidrëti hna hnim.
Hnei nyidrëti hna lapa treqene la meköt,
Ngo pëkö meköt;
Hnei nyidrëti hna lapa treqene la thiina ka meköt,
Ngo kolo pe a suene la ewekë ka tha meköti kö.”
8 Ekölöhini la itre ka nyixane hmaca la itre uma i angatr
Me nyixane hmaca la itre hlapa i angatr
Uti hnyawa ha la kola pë götran
Matre angatre pe hi la ka lapane la nöj!
9 Hnenge hna drei Iehova Joxu ne la itre trongene isi e hnengödrai
Lo nyidrëti a sisiny ka hape, tro la itre uma ka tru nge ka mingöming,
A tune la itre itra etë ka hleuhleu,
Me pë atren.
11 Ekölöhini la itre ka ilë e hmahmakany troa iji kahaitr,
Nge ka hlë jidr uti hë la angatr a hmo hnei waina!
12 Hetrenyi angatr la itre arp, me itre xaa nyine elo miuzik ka hetre filen,
Me itre itrapë, me itre ihoho, me waina ngöne la angatr a feet;
Ngo tha semesinene kö angatr la huliwa i Iehova,
Tha öhne kö angatr la huliwa ne la lue ime i nyidrë.
13 Tro ha kötre fë la nöjeng
Ke pëkö hnei angatr hna atre;
Tro la itre trene mus a mecijiin,
Nge tro la nöj asë a meci hnei pi ij.
14 Celë hi matre, isaisa catre hë la Hua*
Nge hnene ej hna fe angangan la që ne ej;
Eje hi, tro la emingömingö* i Ierusalema, me itre ka iluilu, me itre ka feete lapaa
A uti kow ej.
15 Tro hë la atr a thil,
Tro ha thaipië angeic,
Nge tro ha aipiëne la luemeke ne la ka pi tru.
16 Tro ha atrunyi Iehova joxu ne la itre trongene isi e hnengödrai, hnene la iameköti i nyidrë;
Tro la nyipi Akötresie Ka Hmitrötr a ahmitrötrë* nyidrë hnene la thiina ka meköt.
17 Nge tro la itre neköi mamoe a xen, kösë angatre kö ngöne la götran hnë xen i angatr;
Tro la itre trenyiwa a xeni ngöne la itre götran hna apatrenetrij, lo hna amë la itre öni hna ithuane hnyawan.
18 Ekölöhini la itre ka hule la menu i angatr memine la itre eno ne iaö
Nge ka hule la ngazo i angatr memine la itre eno ne ikatr,
19 Lo itre ka qaja ka hape: “Epi tro Akötresieti a anyimenyimëne la huliwa i nyidrë;
Epi tro ej a canga traqa matre öhne jë hun.
Epi troa eatre la aja* ne la Ka Hmitrötr e Isaraela
Matre atre jë hun!”
20 Ekölöhini la itre ka qaja ka hape, ame la loi ke ngazo, nge ame la ngazo ke loi,
Me itre ka aceitunëne la lai me melöhlem, nge melöhlem me lai,
Me itre ka nyihnane la ka hnyapa hnei ka haitr, nge ka haitr hnei ka hnyapa!
21 Ekölöhini la itre ka mekun laka, ka inamacan angatr
Lo itre ka sipu jele lai he angatr!
22 Ekölöhini la itre ka catre troa iji waina
Nge ka atreine kuci pengönëne la kahaitr,
23 Memine la itre ka jele mekötine la atr ka ngazo göi thupen*
Nge ka cipan la meköt kowe la atr ka meköt!
24 Tune la kola dreuthe la jez hnei eë
Memine la kola hnökötre la haö ka qaqacil nyipine la itre ukahlokine eë,
Tro ha hnyiqetre la itre iwaane i angatr,
Nge tro ha ufe enyine la itre iengen i angatr tune la so ne dro,
Ke hnei angatr hna thipetrije la wathebo* i Iehova joxu ne la itre trongene isi e hnengödrai
Me methinëne la trengewekë ne la Ka Hmitrötr e Isaraela.
25 Celë hi matre, kola palulu la elëhni i Iehova kowe la nöje i nyidrë,
Nge tro nyidrëti a xejë la ime i nyidrë me lepi angatr.
Tro ha hmengöhmengön la itre wetr,
Nge tro la itre ngönetrei i angatr ka mec a tune la itre salite e cahu gojeny.
Qa ngöne lai, tha patre kö la elëhni i nyidrë,
Ngo hna saathe pala hi la ime i nyidrë troa lep.
26 Hnei nyidrëti hna acil la ketre hatren* kowe la ketre nöj gaa nany;
Hnei nyidrëti hna qej, matre hën la itre atr ka lapa ngöne la ketre can la fene hnengödrai;
Hana cahmijë e angatr, nyimenyime catr angatr!
27 Pëkö ka kucakuca thei angatr me kei.
Pëkö ka pi meköl me hmulizië.
Tha kala kö la itre beletre i angatr,
Nge tha xecie fe la itre otrene butre i angatr.
28 Hna xöl asë la itre ane pehna i angatr,
Nge hna wenë* la itre pehna i angatr.
Ame la itre itine wanakoca ne la itre hose i angatr, ke ceitu me etë ka ixöj,
Nge ame la itre wiil ne la itre ikatre i angatr, ke ceitu me wene.
29 Ame la aqane ho i angatr, ke kösë liona;
Angatr a ho kösë itre neköi liona.*
Tro hë angatr a nyihneulil me heje la tha i angatr
Me heje trongën, nge pëkö ka troa amelen ej.
30 Ngöne la drai cili, tro angatr a ulili kow ej
Tune la aqane uliline la hnagejë.
Ame la itre ka troa goeëne la nöj, tro hë angatr a öhne la melöhlem hna xouen;
Nge goi tro fe a ajidrine la lai hnene la itre iaw.