Salamo
Thatraqane la atre jumi traem; nyine nyima ngöne Gitith.* Salamo ne la itre nekö i Kora.
84 Iehova fe, joxu ne la itre trongene isi e hnengödrai,
Mingöminge catr* la uma maano i nyipë ka tru!
2 Tru catre la ajang,
Eje hi, ajane catre ni,
Troa lö ngöne la itre ikur ne la uma i Iehova.
Kola nyima madrine kowe la Akötresie ka mel hnene la hning memine la ngönetreing.
3 Goi öhne fe la waco la uma i angeic e cili
Nge fifikë a kuca thatraqai nyëne kö la ketre trengene waco,
Nyine tro nyën a thupëne la itre nekö i nyën
Ezine la ita ne huuje ka sisitria i nyipë, Iehova joxu ne la itre trongene isi e hnengödrai,
Joxung me Akötresing!
4 Haawe, madrine la itre ka lapa ngöne la uma i nyipë!
Angatr pala hi a atrunyi nyipë. (Sela)
5 Madrine la itre atr ka öhnyi trengecatr thei nyipë,
Nge itre hni i angatr a ajan troa tro ngöne la itre gojeny ne la uma i nyipë.
6 Ame la angatr a thupa la hnathup ne la itre sinöe Baka,
Angatr a goeën ej tune la ketre qeqe ne tim;
Nge itre pane mani a atiqan* ej hnei manathith.
7 Tro hë angatr a hetre trengecatr la angatr a tro;
Angatr a isa mama qëmekei Akötresie e Ziona.
8 Iehova fe, Akötresie ne la itre trongene isi e hnengödrai, drenge ju la thithing;
Akötresi Iakobo fe, pane hnangenyëne ju. (Sela)
9 Akötresieti fe, me petre hun,*
Pane goeëne ju la iqëmek ne la hnei nyipëti hna iën.
10 Eje hi, loi la ca drai hnine la itre ikur ne la uma i nyipë, hune la 1 000 lao drai ngöne la itre xaa götran!
Hnenge hna iën troa cil qëmeken la hnë lö ne la uma ne la Akötresing
Hune la troa lapa hnine la itre itat ne la ngazo.
11 Ke jö me petre lae Iehova Akötresie;
Nyidrëti a kepe së me hamëne la lolo.
Tha tro kö Iehova a cipan la ketre loi
Kowe la itre ka* mele nyipici koi nyidrë.
12 Iehova joxu ne la itre trongene isi e hnengödrai,
Madrine la atre mejiune koi nyipë.