Isaia
1 Hna meköle goeën hnei Isaia* nekö i Amoza göi Iudra me Ierusalema, ngöne la itre ijine i Uzia, me Iotham, me Ahaza, me Hezekia, itre joxu ne Iudra:
2 Hnengödrai fe, drenge ju, nge ihnadro fe, hnangenyëne ju,
Ke öni Iehova:
“Ase hë ni hetrun la itre nekö trahmanyi me ini angatr,
Ngo hnei angatr hna icilekeu me eni.
3 Atre hnyawa hi la kau la atre itö nyën,
Nge atre hi la boliko la hna ami xen hnene la masetane ej;
Ngo thatre ni kö* hnei Isaraela,
Tha mama kö la inamacanene la nöjeng.”
4 Ekölö pe la nöj ka kuca la ngazo,
Lo nöje ka thue la itre ngazo,
Matran atr ka ngazo thiina, me itre nekönatr ka qenatrekënö!
Hnei angatr hna nuetriji Iehova;
Tha hnei angatre kö hna metrötrëne la Ka Hmitrötr e Isaraela;
Hnei angatr hna trotriji nyidrë.
5 Pine laka epuni pala hi a icilekeu, ekaa hmaca jë la hna troa lepi epun?
Wezipo asë hë la he,
Nge akötr asë hë la hni.
6 Qaane la hnatrapaca uti hë la he, pëkö ca ka loi.
Hetre eatr, me gaa jatr, me itre kakötr
Tha hna nyinyine* kö me peleth, maine amenyiken hnei oel.
7 Ase hë apatrene la nöje i epun.
Ase hë dreuthetrij la itre traone i epun.
Itre trenyiwa a xome la nöje i epun qëmekei epun.
Ceitun ej memine la ihnadro hna angazon hnene la itre trenyiwa.
8 Hna nuetrij la nekö jajinyi ne Ziona tune la ketre titaxapo ngöne la hnënge vin,
Tune la ketre ihmelekap ngöne la hlapa kokob,*
Tune la ketre traon hna cile xötreith hnene la itre ithupëjia.
9 Maine tha hnei Iehova ju, lo joxu ne la itre trongene isi, hna nuamelen la itre xan,
Ke tro hë huni a tui Sodroma,
Nge tro huni a tui Gomora.
10 Itre joxu* ne Sodroma fe, drenge ju la trengewekë i Iehova.
Angetre Gomora fe, hnangenyëne ju la wathebo* ne la Akötresi hun.
11 Öni Iehova ka hape: “Nyine ue la itre huuje i epun?
Xele hë ni ma wang la itre mamoe trahmany hnei epun hna tro fë nyine huuj ne dreuth asë,* memine la girisine la itre öni hna ithuane hnyawan,
Nge pëkö ca madrineng kowe la madra ne la itre neköi kau, me itre neköi mamoe, me itre nani trahmany.
12 Epuni a traqa troa mama qëmekeng,
Ngo drei la ka upi epun,
Troa waja trongëne la itre ikureng?
13 Loi ju hë hna traqa fë la itre huuj ne wene feja* ka pë alien.
Ka sisi koi ni la itre nyine dreu ka pui loi i epun,
Me itre treu ka hnyipixe, me itre sabath, me itre icasikeu i epun.
Cane mething la epuni a icasikeu troa hmi, nge epuni pe a kuci haze.
14 Ka sisi koi ni la itre treu ka hnyipixe, me itre feete i epun.
Ketre ehnef ka tru koi ni;
Thatreine hë ni troa xomihnine lai.
15 Ame la epuni a xejë draië la lue ime i epun,
Eni a thele hna goe.
Epuni a anyimua thith,
Ngo xele ni ma dreng;
Si madra ha la itre ime i epun.
16 Sie pi, nge ahmitrötrë epuni ju;
Xometrije pi qëmekeng la itre huliwa i epun ka ngazo;
Loi ju hë hna kuca la ngazo.
17 Inine jë troa kuca la loi, nge thele jë la meköt,
Hajine jë la atre iangazo,
Isigöline jë la nekön hna meci trij hnei kem,*
Nge xatuane jë la sine föe.”
18 Öni Iehova ka hape: “Trohemi matre tro sa iloi.
Ngacama ka madra palulu* ju hë la itre ngazo i epun,
Tro hë itre ej a wië tune la kiona;
Ngacama ka madra ju hë itre ej tune la imaano ka palulu,
Tro hë itre ej a tune la drela ka wië.
19 Maine tro epuni a hmalahnin me dreng,
Ke tro hë epuni a xeni la itre ewekë ka loi ne la nöj.
20 Ngo maine xele kö epuni ma dreng nge epuni a icilekeu,
Tro ha apatrenyi epun hnei taua,
Ke ase hë Iehova qaja.”
21 Ekölöhini, föe ne gojenyi hë lo traon ka mele nyipici ekö!
Lo ka tiqa hnene la meköt;
Lo hna lapan hnene la thiina ka meköt,
Ngo enehila, itre ka humu atre pe hi e cili.
23 Itre joxu i ö a pi hun me ce xöle me itre atrekënö.
Angatr a isa aja mani hna hamën juetrën me nyenyape thele ahnahna.
Tha angatre kö a xomi mekun ka meköt kowe la hna meci trije hnei kem,*
Nge tha angatre kö a isigöline la sine föe.
24 Qa ngöne lai, öni Iehova lo nyipi Joxu ne la itre trongene isi,
Lo ka trene men e Isaraela ka hape:
“Haawe! Tro hë ni a apatrene la itre ka methinë ni,
Nge tro hë ni a nyithupen kowe la itre ithupëjiang.
25 Tro ni a nyithupene* koi ö,
Tro ni a ahmune la itre sikori i ö tune la sope ne was,
Nge tro ni a xometrije la itre engazo i ö.
26 Tro ni a acile hmaca la itre atre amekötin i ö tun ekö
Me itre atresi i ö tune lo xötrei.
Thupene lai, tro ha ati ëje i ö Traon Ne La Meköt me Lapa Ka Mele Nyipici.
27 Tro hmaca ha itö Ziona hnene la meköt,
Nge tro ha itöne la nöj ka bëeke hmaca, hnene la thiina ka meköt.
28 Tro ha ce lep apatren la itre ka icilekeu me itre ka kuca la ngazo,
Nge tro ha apatrene la itre ka nuetriji Iehova.
29 Tro hë angatr a hmahma pine la itre sinöe ka catr hnei epuni hna ajan,
Nge tro epuni a hmahma pine la itre hlapa* lo hnei epuni hna iën.
30 Ke tro hë epuni a tune la ketre sinöe ka tru nge ka fitre drön,
Me tune la hlapa ka pë timin.
31 Tro la atr ka catr a tune la eunyin,*
Nge tro la huliwa i angeic a tune la malepene eë;
Tro ha ce dreuthi nyidro,
Nge pëkö ka troa apin.”