Atre Cainöj

7 Ka loi ju kö la troa hlemu loi* hune la nyipi oel, memine la drai ne mec hune la drai ne hnaho. 2 Ka loi ju kö la troa tro kowe la hna hnëmec hune la hna feet, ke e cili hi la pun kowe la nöjei atr. Nge loi e tro la itre ka mel a wangatrune lai. 3 Ka loi ju kö la troa hleuhleu hune la troa hnyima, ke tro hë lai a nyipi atr thupene la hna pane akötr. 4 Ame la hni ne la itre ka inamacan, ke eje ngöne la hna hnëmec. Ngo ame la hni ne la itre hmo, ke eje ngöne la hna feet.*

5 Ka loi ju kö la troa dreng la ihaji ne la ka inamacan, hune la nyima ne la itre ka hmo. 6 Ke ceitune hi la aqane hnyima ne la hmo, memine la aqane kuqakuqa ne la itre ka ithiny hna dreuth fene la öl; ketre ka gufa fe la ewekë cili. 7 Ngo ijije hi tro la ka inamacan a ujë tune la hmo, hnene la itre ewekë ka ajolë angeic. Nge ijije hi troa iaöne la hni, hnene la mani hna hamën juetrën.

8 Ka loi ju kö la pun ne la ketre ewekë hune la qaan. Ka loi ju kö la troa atreine itreqe hune la troa pi tru. 9 The canga dreng akötrëne kö, ke celë hi pengöne la itre hmo.*

10 The qaja kö ka hape: “Hnauëne laka, ka loi ju kö ekö hune enehila?” Ke tha ka inamacane kö la aqane hnyinge celë.

11 Ame la kola kepe edrö hnene la atr ka inamacan, ke ewekë ka loi lai nge nyine loi kowe la itre ka mel. 12 Ke kola thupë së hnene la inamacan tune la kola thupë së hnene la mani. Ngo hane hi la esisitriane la atrehmekun: Ej a thupën la mele ne la atr ka inamacan.

13 Goeëne ju la huliwa ne la nyipi Akötresie. Drei la ka atreine amekötin la hnei nyidrëti hna aqalin? 14 Ngöne la ijine loi, kuca jë la loi,* nge ngöne la ijine akötr, mekune ju laka, Akötresie la qaane la lue ijine cili, matre tha tro kö la itre atr a atre la ka troa traqa elany.

15 Ame ngöne la meleng ka gufa, öhn asë hi ni. Qaane ju hi la atr ka meköt nge ka mec ngöne la meköt i angeic, uti hë la atr ka ngazo ka mel aqeany ngacama ka ngazo pe angeic.

16 The nyi ka meköti kö, nge the nyi ka inamacane kö. Hnauëne la tro eö a aluzi ö kö? 17 Tha tro kö a ngazo catre menu la thiina i ö, nge the ujë kö tune la hmo. Ke hnauëne laka, tro eö a canga mec nge tha ijine pala kö? 18 Loi e troa xolouthe la pane ihaji* nge tha tro kö a nue la hnaaluen;* ke ame la atre xoue Akötresie, angeic a trongëne lue ej asë.

19 Hnene la inamacan, matre catre kö la ka inamacan hune la 10 lao atr ka catr ngöne la traon. 20 Ke pëkö atr ka meköt e celë fen ka kuca pala hi la loi, nge ka tha hane kö kuca la ngazo.

21 Ketre, the wangatrune kö la hna qaja hnei itre xan, wanga drenge jë eö la kola eji* ö hnene la hlue i ö; 22 ke atre hnyawa hi la hni i ö ka hape, hnei ö fe hna anyimua ejine la itre xan.

23 Ngacama ka inamacane ni, ngo hnenge fe hna hane melëne lai, me qaja ka hape: “Eni a hane pi inamacan.” Ngazo pe, tha ijijinge kö. 24 Thatreine kö troa trotrohnin la itre ewekë cili, ke ka jui pala ha. Matre drei la ka atreine trotrohnin? 25 Hnenge hna upe la hning troa atrepengön, me wang, me thel la inamacan memine la qaane la itre ewekë cili. Nge hnenge fe hna upe la hning troa trotrohnine la ethanyine la aqane ujë ne la itre hmo, memine la engazone la aqane ujë ne la itre ka menu. 26 Ame hnenge hna öhn la ewekë celë: Hmaloi ju kö la mec hune la föe ka tune la ifile ne xöle öni, nge ceitune hi la hni i eahlo memine la itre ifile ne nyi ie, memine la lue ime i eahlo me itre cein ne kalabus. Tro eahlo a ea la atr ka kuca la ngazo, ngo tro pe kö a mele la atr hna hnim hnene la nyipi Akötresie.

27 Önine la atre acasin: “Hane hi la hnenge hna öhn. Hnenge hna waipengöne hnyawa la nöjei ewekë, ase jë hi ketre matre ketre, uti hë la kola xeci e kuhu hning la ketre mekun, 28 ngo ame la ewekë hnenge pala hi hna thel, ke tha öhne kö ni. Ngöne la 1 000 lao atr, hnenge hi hna öhne la ca trahmany ka meköt. Ngo pëkö föe ka meköt hnenge hna öhn. 29 Hane pe hi la hnenge hna öhn: Hnene la nyipi Akötresie hna xupe la itre atr ka meköt, ngo hnei angatre pë hë hna isa kuci mekun.”