Amosa

 2 ‘Kei hë Isaraela, lo nyipi jajiny;*

Thatreine hë angeice cil.

Hna nuetriji angeic ngöne la nöje i angeic;

Pëkö ka atreine amejë angeice hmaca.’

‘Ame la traone ka tro troa isi memine la ala 1 000, ke tro pe hi a bëek memine la ala 100;

Nge ame la ka tro memine la ala 100, ke tro pe hi a bëek memine la ala 10.

 5 The tro kö a tro Bethela,

The tro kö a tro Gilegala, nge the tro sasaithe kö la ifego ne tro Beresabe,

Ke tro ha kötre sai Gilegala kowe la ketre nöj,

Nge tro ha patre hnei Bethela.*

 6 Bëeke hmaca jë koi Iehova matre mele pi epun,

Wanga tro nyidrëti a traqa tune la eë kowe la fami i Iosefa,

Tro nyidrëti a dreuthetriji Bethela, nge pëkö ka atreine troa apin.

 7 Epuni a nyihnane la meköt hnene la ewekë ka haitr,

Nge epuni a trij e kuhu hnadro la meköt.

 8 Ame la atre xupe la itre fini wëtresij ne Kima* me Kesil,*

Lo atre saze la menihao kowe la lai e hmakany,

Lo atre amitine la lai tune la jidr,

Lo atre hëne la itre timi ne hnagejë

Matre trotro pi hune la ihnadro,

Ke Iehova la ëje i nyidrë.

 9 Tro nyidrëti a apatrene la atr ka catr,

Tro nyidrëti a thëtrij la itre ihag atraqatr.

10 Itre atre cili a xele ma wang la itre ka haji angatr ngöne la qëhnelö ne la traon,

Nge methi angatr la itre ka qaja la nyipici.

11 Pine laka, epuni a upe la ka pë ewekë troa nyithupene la dro hnei angeic hna eënyin

Me thapa la itre wene feja i angeic nyine hotr,

Haawe, tha tro hmaca kö epuni a lapane la itre uma hnei epuni hna xupe hnei etë

Me ij la nyipi waina qa ngöne la itre vin hnei epuni hna traan.

12 Ke atre hi ni laka, nyimutre la itre icilekeu thei epun

Nge tru catre la itre tria i epun

Epuni a qanangazone la atr ka meköt,

Epuni a kapa la manie hna hamën juetrën,

Nge epuni a cipane la meköti kowe la itre ka pë ewekë ngöne la qëhnelö ne la traon.

13 Celë hi matre, tro la itre ka inamacan a lapa thaup ngöne la ijine cili,

Ke ketre ijine akötr.

14 Kuca jë la loi, ngo tha ewekë ka ngazo kö,

Matre mele pi epun.

E cili, tro Iehova Akötresie ne la itre trongene isi e hnengödrai a ce me epun,

Tune lo aqane qaja i epun.

15 Methinëne jë la ngazo, nge hniine jë la loi,

Epi troa hune la meköt ngöne la qëhnelö ne la traon.

Maine jë, tro Iehova Akötresie ne la itre trongene isi e hnengödrai

A kapa la itre matra i Iosefa ka mele pe.’

‘Tro ha itreijenyi ngöne la itre götrane gaa tru atr,

Nge ngöne la itre gojenyi asë, tro ha qaja ka hape, “Ekölöhini! Ekölöhini!”

Tro angatr a hëne la itre ka eënyi troa hnëmec

Memine la itre atr hna nyithupen troa treij, matre treije latresi.’

17 ‘Ngöne asë hi la itre hlapa vin, tro ha treije latresi;

Ke tro ni a tro nyipi ö,’ öni Iehova.

19 Tro ej a tune la atr ka kötrene la liona me itronyi me bea,

Nge ame la angeic a bëeke koi hnalapa me hujane la ngöne uma, kola heji angeic hnei un.

20 Hapeu, tha tro kö la drai i Iehova a tune la jidr, ngo tha tune kö la lai?

Tha tro jë kö lai a mit, me tha lualai?

21 Eni a methinëne me sisine la itre feete i epun,

Nge tha madrine hë ni kowe la epunepunene la itre icasikeu i epun ka hmitrötr.

22 Ngacama tro ju hë epuni a tro fë huuje ne dreuth asë me itre ahnahna,

Ngo tha tro kö ni a madrin;

23 Hmanono hë ni hna drenge la itre nyima i epun;

Nge loi e tha tro kö ni a dreng la itre arp* i epun,

24 Loi e troa neni la thiina ka meköt tune la tim,

Me meköt, tune la jë ne tim ka tha ae kö.

25 Nöje Isaraela fe, hnei epuni kö hna hane tro fë huuj me ahnahna koi ni

Ngöne la 40 lao macatre ne mele epuni ngöne la hnapapa?

26 Ngo enehila, tro epuni a xometrongë Sakuth joxu i epun, me Kiuna,*

Itre idrola hnei epuni hna xup, lo wëtresij ne la haze i epun,

27 Nge tro ni a kötre sai epuni kowe la nöje gaa nanyi thupe i Damaseko,’ öni Iehova Akötresie ne la itre trongene isi e hnengödrai.”