Itre Edromë
3 Neköng, the thëthëhmine kö la hnenge hna ini* ö,
Nge drengethenge ju la itre hnenge hna amekötin hnene la hni i ö ka pexej,
2 Ke jëne itre ej, tro ha nyimu drai i ö
Me nyimu macatre ne mele eö, nge tro fe hë eö a tingeting.
3 The nue kö la loi thiina* me mele nyipici* troa trotriji ö.
Othe ju lue ej ngöne la nyinawa i ö;
Cinyanyine ju ngöne la wenethëhmi i ö;
4 E cili, tro ha mama ka hape, ka atreine waiewekë eö
Tro ha kepe eö hnei Akötresie me itre atr.
6 Meku nyidrëti jë ngöne la itre huliwa nyine tro eö a kuca,
Nge tro pena nyidrëti a amekötine la itre jë i ö.
7 The nyi ka inamacane kö.
Xoue Iehova jë pe, nge ujë jë qa ngöne la ngazo.
8 Celë hi drösinöe kowe la ngönetrei* i ö
Me nyine aegöcatrene la itre june i ö.
9 Atrunyi Iehova jë hnene la itre ewekë i ö ka sisitria,
Memine la itre pane wen* hnei ö hna menuën;*
10 Tro ha tiqa gala la itre hnë ami xen i ö,
Nge tro ha neni gala la itre hnë ami waina* ka hnyipixe i ö.
11 Neköng, the trije kö la ihaji i Iehova,
Nge the sisine kö la iameköti i nyidrë,
12 Ke Iehova a hajine la itre hnei nyidrëti hna hnim,
Tune la kem ka hajine la nekö hnimina i nyidrë.
13 Madrine la atre öhne la inamacan
Memine la atr ka atreine waiewekë;
14 Ke ka loi ju kö la troa kapa la inamacan, hune la troa kepe sileva,
Nge ka loi ju kö la troa hetre inamacan, hune la troa hetre gool.
15 Sisitria kö ej hune la itre korai;*
Pëkö hnei ö hna ajan ka atreine wej la esisitrian ej.
16 Ngöne la ime maca ne ej la itre drai ka nyimutre;
Ngöne la ime mi ne ej la trengamo me iatruny.
17 Ka lolo la itre jën ej,
Nge ka tingeting asë la itre hmene gojenyin ej.
18 Eje la ketre sinöe ne mel kowe la itre ka ea catrën ej,
Nge tro ha jele madrine la itre ka xolouthe catrën.
19 Hnei Iehova hna xupe la ihnadro cememine la inamacan.
Hnei nyidrë hna acile hutine la hnengödrai cememine la atreine waiewekë.
20 Jëne la atrehmekune i nyidrë, hna thawaluën la itre timi ka jui
Nge kola hnemuhnem qa ngöne la itre iaw ne hnengödrai.
21 Neköng, the thëthëhmine kö itre ej.*
Thupëne ju la atreine huliwa inamacan, memine la atreine thelewekë;
22 Tro itre ej a hamë mele i ö
Me thaipine la nyinawa i ö;
23 Tro hë eö a tro tingeting ngöne la gojeny i ö,
Nge tha tro kö a thë la waca i ö.
24 Ame la eö a troa meköl, ke pëkö hnei ö hna troa xouen;
Nge ame la eö a troa saaju, ke tro ha hnyapa la trenge pi meköle i ö.
25 Tha tro kö eö a hnehengazone la itre ewekë ka asesëkötrë eö me axouenyi ö
Memine la wene ka troa lepe la itre atr ka ngazo.
26 Ke tro Iehova a hamë eö la mejiun;
Tro nyidrëti a thupëne la waca i ö qa ngöne la nöjei theth.
27 The cipane kö la loi kowe la itre ka aja ixatua
E ijiji ö hi.*
28 The qaja kö kowe la ka lapa easenyi ö ka hape: “Pane tro jë; qanyi ö hmaca pë hë elany, matre tro ni a hamë eö la ketre ewekë,”
Ngo atreine hi ö hamën enehila.
29 The mekune kö troa akötrëne la atre lapa easenyi ö
Nge angeice pe a mele tingeting ezi ö.
30 The iwesitrë kö memine la ketre trahmany, nge pë pe kepin
Nge pëkö ngazo hnei angeic hna kuca koi ö.
31 The piine kö la atr ka iakötrë
Nge the xome kö la itre thiina i angeic,
32 Ke methi Iehova la atr ka nyinyithiina,
Ngo nyidrëti a nyi sineene la itre atr ka meköt.
33 Iehova a ahnëjinëne la hnalapa ne la atr ka ngazo,
Ngo nyidrëti a amanathithine la uma ne la atr ka meköt.
34 Ke nyidrëti a hnyima fë la itre ka ihnyimasai,
Ngo nyidrëti a kapa la itre ka ipië.
35 Tro la itre ka inamacan a kapa la iatruny,
Ngo itre hmo a ajane la itre ewekë ka iahmahmany.