Ieremia
19 Hane hi la hna qaja hnei Iehova: “Tro jë kowe la atre xupi inege matre itöne la ketre trengene tim hna xupe hnei dro. Nge ce tro jë me itre xaa qatr ne la nöj, me itre xaa qatr thene la itretre huuj. 2 Nge tro jë kowe la Hnathupe Ne La Nekö i Hinom,* ka ej ngöne la Qëhnelö Ne La Atre Xupi Inege. E cili, tro hë eö a qaja la macang. 3 Tro eö a qaja koi angatr ka hape: ‘Drenge ju la trengewekë i Iehova, epun itre joxu ne Iudra, me angetre Ierusalema! Hane hi la hna qaja hnei Iehova joxu ne la itre trongene isi e hnengödrai, lo Akötresi Isaraela:
“‘“Tro ni a axulune la akötr kowe la götrane ce, nge tro ha sesëkötre ngazo* hnene la itre ka troa drei mejen. 4 Ke hnei angatr hna nuetriji ni me angazon la götrane ce. Hnei angatr hna tro fë huuj e cili kowe la itre xaa haze, lo hnei angatr, me itre qaaqa i angatr, me itre joxu ne Iudra hna thatre. Nge hnei angatr hna atiqane la götrane ce, hnene la madra ne la itre ka pë engazon. 5 Hnei angatre hna xupe la itre hnë hmi gaa hmitrötr koi Baala, matre dreuthe la itre nekö i angatre trahmany, nyine huuje ne dreuth asë* koi Baala. Ngo tha hnenge kö hna upi angatre troa kuca lai, me ithanatane lai, nge goi tha mekune fe ni lai.”’*
6 “‘“Celë hi matre,” öni Iehova, “Dreng! Tro ha traqa la ijin tha tro hmaca kö a hëne la götrane cili ka hape, Tofet me Hnathupe Ne La Nekö i Hinom, ngo Hnathupe Ne Ihumuth. 7 Tro ni a atriane la itre mekuna i Iudra me Ierusalema ngöne la götrane ce. Nge tro ni a nue la itre atr ne la nöj kowe la taua ne la ithupëjia, me kowe la ime ne la itre ka thele troa humuthi angatr. Nge tro ni a nue la itre ngönetrei i angatr, matre troa öni hnene la itre waco me itre öni wael. 8 Tro ni a kuca matre tro la traon celë a ketre ewekë hna xouen, nge tro hë la itre atr a sisin me qej ngöne la angatr a goeën ej. Eje hi, tro la nöjei atr ka cili thenge a sesëkötre me qej, pine la aqane lep ej hnei akötr. 9 Nge tro hë ni a thue öni i angatr la ijön ne la itre nekö i angatr trahmany me jajiny. Eje hi, tro angatr asë a isa öni la itre sinee i angatr, ke tro ha cile xötreithe la traon, nge pëhë jë ne kötre i angatr. Tro ha cile kanothi angatr hnene la itre ithupëjia, me itre ka thele troa humuthi angatr.”’
10 “Nge tro hë eö a thë la trengene tim qëmekene la itre ka ce tro me eö, 11 nge tro eö a qaja koi angatr ka hape: ‘Hane hi la hna qaja hnei Iehova joxu ne la itre trongene isi e hnengödrai: “Celë hi aqane tro ni a thëtrij la nöje ce me traone ce, tune la atre thë la trengen hna kuca hnene la atre xupi inege, matre thatreine hë troa iafedrenekeun. Nge tro angatr a kelem e Tofet la itre ka mec, uti hë la troa pë göhnë.”’
12 “‘Hane hi la hnenge hna troa kuca kowe la götrane ce me itre ka lapan, matre tro la traone ce a tun e Tofet,’ öni Iehova. 13 ‘Tun e Tofet, tro ha pui ngazo la itre uma e Ierusalema, me itre uma ne la itre joxu ne Iudra, ene la nöjei hune uma hnei angatr hna tro fë huuj kowe la itre trongene isi e hnengödrai,* memine la waina nyine fii huuj kowe la itre xaa haze.’”
14 Ame hë la Ieremia a bëek qa Tofet, lo hnei Iehova hna upi angeic troa perofeta, hnei angeic hna cil ngöne la kur ne la uma ne hmi i Iehova, me hape kowe la nöj: 15 “Hane hi la hna qaja hnei Iehova joxu ne la itre trongene isi e hnengödrai, lo Akötresi Isaraela: ‘Tro ni a axulune la nöjei akötr hnenge hna perofetan kowe la traone ce, me kowe la itre hunahmi ezin, ke xele* pala hi angatre ma dreng la itre trengewekëng.’”