Iobu
42 Ame hnei Iobu hna sa koi Iehova ka hape:
2 “Atre hë ni laka, atrein asë hi nyipë
Nge pëkö ewekë hnei nyipëti hna thatreine kuca.
3 Öni nyipë: ‘Drei la ka pë atrehmekun matre juetrëne la eamong?’
Eje hi, hnenge hna ithanata, ngo tha trotrohnine pe ni la itre xa ewekë
Ke ka sisitria catre kö koi ni, nge hnenge hna thatre.
4 Öni nyipë: ‘Pane drei ni ju, ke tro ni a pane ithanata.
Tro ni a hnyinge koi ö, nge tro eö a qejepengöne koi ni.’
5 Hneng ekö hna dreng la kola qeje nyipë,
Ngo ame enehila, öhnyi nyipëti hë ni.
6 Celë hi matre, eni a qeje menu pine la itre hnenge hna qaja,
Me ietra ngöne la xaxau me hnatresij.”
7 Thupene la Iehova a ase ithanata koi Iobu, hnei Iehova hna qaja koi Elifaza atre Temana ka hape:
“Tru catre la elëhning koi ö, me kowe la lue sinee i ö, ke tha hnei epuni kö hna qaja la nyipici göi ni, tune la aqane qeje ni hnei Iobu hlueng. 8 Ame enehila, xome jë la 7 lao kau, me 7 lae nani trahmany, nge tro jë troa wai Iobu hlueng, matre tro angeic a tro fë la huuj ne dreuth asë thatraqai epun. Nge tro la hlueng a thithi sai epun, nge tro hë ni a kapa* la sipo i angeic: tha tro kö ni a nyithupen koi epun, thenge la itre ngazo i epun. Ke tha hnei epuni kö hna qaja la nyipici göi ni, tune la aqane kuca i Iobu hlueng.”
9 Ame hnei Elifaza atre Temana, me Biledad atre Sua, me Zofar atre Naamathi hna tro troa kuca la hnei Iehova hna qaja koi angatr. Nge hnei Iehova hna kapa la thithi Iobu.
10 Thupene la Iobu a ase thithi fë la itre sinee i angeic, hnei Iehova hna apatrene* la itre itupathi angeic, me hamëne hmaca la itre ewekë i angeic. Hnei Iehova hna nyixane hmaca la itre ewekë i angeic hune lo qaan. 11 Ame hna traqa asë la itre trejin me Iobu, me itre xa i angeic, me itre sinee i angeic ekö, matre ce xeni me angeic ngöne la hnalapa i angeic. Hnei angatr hna ce treij me angeic, me aupunyi angeic, pine la nöjei akötr hnei Iehova hna nue koi angeic. Nge hnei angatr hna isa hamë angeic la ca piese sileva, me ca otru gool.
12 Qa ngöne lai, tru hmaca kö la hnei Iehova hna amanathithi Iobu enehila hun ekö. Traqa koi 14 000 lao mamoe i angeic, me 6 000 lao kamela, me 2 000 lao kau, me 1 000 lao boliko föe. 13 Nge hetrenyi hmaca angeic la 7 lae nekö trahmany, me köni jajiny. 14 Hnei angeic hna ati ëjen la pane jajiny, Iemima, nge Kezia la hnaaluen, nge Kerenapuka la hnaakönin. 15 Pëkö föe ngöne la nöj ka mingöming hune la itre nekö i Iobu jajiny. Nge hnene la keme i angatr hna hamë edrö i angatr, tune la hnei Iobu hna kuca kowe la itre xa i angatr.
16 Thupene lai, hna nyixane la mele i Iobu koi 140 lao macatre, nge hnei angeice fe hna öhne la itre nekö i angeic, me itre api i angeic, uti hë la hna 4 ne xötr. 17 Ame hna meci hnei Iobu, nge qatre hë angeic, nge nyimu macatre ne mele madrin.