Pane Tusi Itre Joxu
19 Thupene lai, hnei Ahaba hna qaja koi Iezebela la nöjei ewekë hnei Elia hna kuca, me aqane humuth angeic la nöjei perofeta hnei taua. 2 Ame hnei Iezebela hna iupi fë maca koi Elia me hape: “Epi tro la itre haze a të la ngazo koi ni, e tha kuca kö ni koi ö ngöne la hawa celë, la hnei eö hna kuca kowe la itre perofeta cili!” 3 Ame hë la Elia a drenge lai, xou i angeice ju hi, matre angeic a kötre pi, me traqa e Bere-seba ngöne la nöje Iudra, nge hnei angeic hna nu e cili la hlue i angeic. 4 Ngo ame angeic, hnei angeic hna tro koi ca drai me traqa ngöne la hnapapa. Matre angeic a lapa ju fene la gaa xapo ne la sinöe ka lapalapa. Nge e cili, angeic a sipone jë troa mec, me hape: “Iehova fe thatreine hë ni! Humuthi ni pi, ke tha ka loi kö ni hune la itre qaaqaang ka meci hë.”
5 Ame hnei angeic hna meköl fene la isinöe, nge hna ketri angeic hnene la ketre angela me hape: “Mejë jë nge xeni jë.” 6 Matre ame la Elia a goe, öhne ju hi angeic ezine la he i angeic la ca falawa ka raon, hune la itre etë ka idreuth, me ca neköi trengene tim. Angeic a xeni jë me ij, me meköle hmaca ju. 7 Nge e thupen, hnene hmaca la angela i Iehova hna bëek, me ketri angeic me hape: “Mejë jë nge xeni jë, wanga tha ijije pi la trengecatre i ö, ke nanyi la gojeny.” 8 Elia a mejë jë, me xeni me ij, nge egöcatre hë angeice hna xen, matre hnei angeic hna tro koi 40 lao drai me 40 lao jidr, uti hë la angeic a traqa e Horeba, lo wetre ne la nyipi Akötresie.
9 E cili, hnei angeic hna lö ngöne la ketre ngönemenyi, me lapa e jidr. Nge ngöne la jidr öni Iehova: “Elia, eö a ue e celë?” 10 Öni Elia jë hi: “Hnenge hna huliwa catre koi nyipë Iehova, joxu ne la itre trongene isi e hnengödrai. Ngo hnei angetre Isaraela hna nuetrije la isisinyikeu i nyipë, me thëtrije la itre ita ne huuj i nyipë, me humuthe la itre perofeta i nyipë hnei taua. Matre eni casi pe hi, nge enehila, angatre fe a pi humuthi ni.” 11 Ngo öni Akötresie: “Lö pi, nge cile jë hune la wetr qëmeke i Iehova.” Nge Iehova a tro qëmeke i Elia, ame hna hnahna pi la ketre enyi ka catr, me thë la itre wetr me itre etë qëmeke i Iehova. Ngo patre kö Iehova nyipine la eny. Nge thupene la eny, traqa pi hi la ketre sa, ngo patre kö Iehova nyipine la sa. 12 Thupene la sa, hetre eë, ngo patre kö Iehova nyipine la eë. Nge thupene la eë, hna dreng la ketre nine ithanata ka menyik, nge ka ithanata hmidra. 13 Matre ame ju hi la Elia a drenge la nine ithanata, angeic a zaene ju la ialameke i angeic hnei iheetr,* nge angeic a tro pi kowe la hnë lö ne la ngönemenyi, me cil e cili. Matre hna qaja koi angeic ka hape: “Elia, eö a ue e celë?” 14 Sa jë hi Elia ka hape: “Hnenge hna huliwa catre koi nyipë Iehova, joxu ne la itre trongene isi e hnengödrai. Ngo hnei angetre Isaraela hna nuetrije la isisinyikeu i nyipë, me thëtrije la itre ita ne huuje i nyipë, me humuthe la itre perofeta i nyipë hnei taua. Matre eni casi pe hi, nge enehila, angatre fe a pi humuthi ni.”
15 Öni Iehova jë hi: “Bëeke jë, nge tro hmaca jë kowe la hnapapa e Damaseko. E traqa ha eö, ië Hazaela jë troa joxu ne Suria. 16 Nge tro fe eö a ië Iehu, api Nimesi, troa joxu ne Isaraela, me ië Elisaia nekö i Safata qa Abelamehola, troa nyihna i ö troa perofeta. 17 E tro ketre a triane la taua i Hazaela, tro Iehu a humuth. Ngo e traqa jë ketre triane la taua i Iehu, Elisaia la ka troa humuth. 18 Hetrenyi pala kö e Isaraela la 7 000 lao trahmany ka tha thili kö koi Baala, nge ka tha drem la itre idrola i angeic.”
19 Haawe, Elia a tro ju qa lai me öhnyi Elisaia nekö i Safata, a kola ujë dro memine la 24 lao kau hna isilekeun ala lu, nge Elisaia memine la lue kau tixenuë. Matre Elia a easenyi Elisaia jë, me atuthi Elisaia hnene la iheetre i angeic. 20 Elisaia a canga nue pi la itre kau, me nyinyape thenge Elia me hape: “Pane nue ni pi troa dremi kaka me nenë. Nge tro pë hë ni a xötrethenge nyipë.” Matre öni Elia: “Tro jë, bëeke jë kowe la hnalapa i ö, tha tro kö ni a sewe eö.” 21 Haawe, Elisaia a bëeke jë me humuthe la lue kau, me xome la sinöe ne isilekeun, memine la nyine uja dro, nge angeic a atrone jë la kau me thawa kowe la itre atr e cili, matre angatr a öni ju. Thupene lai, angeic a xötrethenge Elia jë, me huliwa koi nyidrë.