Salamo
Thatraqane la atre jumi traem; Salamo i Dravita, nine* “La drube föe ne kaqa ne lai.”
22 Akötresie, Akötresinge fe, hnauëne laka, nyipëti a nuetriji ni?
Hnauëne laka, nyipëti a lapa ananyi ni nge tha amele ni kö,
Ngöne la eni a sipo ixatua?
2 Akötresieti fe, tha mano kö ni hë nyipë ngöne la drai, ngo tha sa pe nyipë;
Ngöne la jidr, tha lapa thaupe kö ni.
3 Ngo ka hmitrötre nyipë,
Nyipëti a lapa* nyipine la itre nyine atrun qaathei Isaraela.
4 Hnene la itre keme hun hna mejiune koi nyipë;
Hnei angatr hna mejiun, nge hnei nyipëti pala hi hna amele angatr.
5 Hnei angatr hna sue koi nyipë, ame hna amele angatr;
Hnei angatr hna mejiune koi nyipë, nge tha hmahma kö angatr.
6 Neköi wanake ni, ngo tha ketre atre kö,
Nge hna xele ma wang hnene la itre atr, nge hna methinën hnene la nöj.
7 Kola hnyimasai ni hnene la nöjei atr ka goeë ni;
Angatr a ce hnyimasai ni, me nangenang matre qenahmo ni, me hape:
8 “Angeic a lapa treqe Iehova. Nga upi nyidrëti jë kö troa amele angeic!
Hë Akötresieti jë troa amele angeic, ke nyidrëti la ka hnimi angeic!”
9 Nyipëti la Atre xomi ni qa kuhu hni,
Me Atre aupunyi ni ngöne la lue thi nenë.
10 Hna ahnithi ni* koi nyipë qaane lo kola hnaho ni;
Nyipëti la Akötresing lo eni pala kö e kuhu hni i nenë.
11 The ananyi ni kö hnei nyipë, ke easenyi hë la akötr
Nge pëkö ketre atr ka atreine xatua ni.
12 Nyimutre la itre neköi kau trahmany ka cil xötreithi ni;
Itre kau ka catr ne Basana a kanothi ni.
13 Angatr a fe angangan la itre që i angatre koi ni,
Tune la liona ka hej angazon* la tha i nyën.
14 Hna nenge triji ni tune la tim;
Kola itria la itre juneng.
Ceitune la hning memine la sir;*
Ej a hmu e kuhu hning.
15 Qaqacile hë la trengecatreng tune la sine inege ka kaqa;
Kola fedre la thinemeng ngöne la qëng;
Nyipëti a autinyi ni ngöne la hnaop matre mec.
16 Ke itre kuli a cile xötreithi ni;
Tune la itre atr ka ngazo, angatr a easenyi ni,
Nge tune la liona, angatr a hej la lue imeng me lue cang.
17 Atreine hi ni e asë la itre juneng.
Angatr a goeë ni me goeë tili ni.
18 Angatr a ithawakeune la itre iheetreng,
Me uthi trikitrën la hna heetreng.
19 Ngo Iehova fe, the cil ananyi ni kö.
Nyipëti la trengecatreng; canga traqa pi troa amele ni.
20 Thepe ni pi qa ngöne la taua,
Nge thupëne ju la meleng qa ngöne la waca ne la itre kuli;
21 Epi thepe ni pi qa ngöne la që ne la liona me itre jian ne la kau wael;
Sa jë koi ni nge amele ni jë.
22 Tro ni a qaja la ëje i nyipë kowe la itre trejin me eni;
Nyipine la ekalesia, tro ni a atrunyi nyipë.
23 Epuni angetre xoue Iehova, atrunyi nyidrëti jë!
Epuni asë itre matra i Iakobo, qaja aloinyi nyidrëti jë!
Metrötrë nyidrëti jë, epun itre matra i Isaraela.
24 Ke tha hnei nyidrëti kö hna wangacone me sisine la hna akötrën;
Tha hnei nyidrëti kö hna tha semesine angeic.
Ame lo kola hë koi nyidrë hnene la ka akötr, hnei nyidrëti hna dreng.
25 Tro ni a atrunyi nyipë ngöne la icasikeu ka tru;
Tro ni a eatrën la hnenge hna sisiny qëmekene la itre ka xoue nyipë.
26 Tro la itre ka ipië a xeni mej;
Tro la itre ka thele Iehova a atrunyi nyidrë.
Epi tro epuni a mel* epine palua.
27 Tro hmaca la itre cane la fene hnengödrai a meku Iehova me ujë koi nyidrë.
Tro ha thil koi nyidrë hnene la itre fami ne la itre nöj asë.
28 Ke thatraqai Iehova la Baselaia;
Nyidrëti la ka mus hune la itre nöj.
29 Tro la nöjei atr ka kökötre lolo* e celë fen a xeni me thil;
Tro ha sa iwatingöneca qëmekei nyidrë hnene la itre ka uti koi xaxau;
Pëkö ka atreine troa amele angatr.
30 Tro hë la itre matra i angatr a nyihlue i nyidrë;
Tro hë la itre xötr elany a hane drei meje i Iehova.
31 Tro hë angatr a traqa me qaja amamane la thiina ka meköt i nyidrë.
Tro hë angatr a qaja kowe la itre nöj ka troa xulu la hnei nyidrëti hna kuca.