Daniela
10 Ame ngöne la hnaakönine macatre i Koreso joxu ne Peresi, hnei Daniela, lo hna hëne ka hape Beletisaza, hna meköle goeën la ketre ewekë; ka nyipici la maca cili, nge ej a qaja la ketre isi ka tru. Trotrohnine hi angeice la maca, nge hna qejepengöne pë hë la hnei angeic hna meköle goeën.
2 Ngöne la ijine cili, hneng Daniela, hna pane hnëmec koi köni wiik ka pexej. 3 Pëkö xeni ka loi hnenge hna xen; goi tha öni mitre fe ni me iji waina, me köle oelën la ngönetreing koi köni wiik ka pexej. 4 Matre ame hë la drai 24 ne la pane treu, lo eni a cil ezine la hneopegejë ka tru, hna hën ka hape Tigera,* 5 hnenge hna gala draië me öhne la ketre atr ka heetrë lino, me ca beletr gol ne Ufaz hune la gö i angeic. 6 Ceitune la ngönetrei angeic me berulo, nge ka hudrume la iqëmeke i angeic tune la samek, nge kösë uke jina la luemeke i angeic, me kopa hna ji alolone la lue im me lue ca i angeic. Nge ceitune la nine i angeic me mejene ka ala nyim. 7 Eni hmekuje hi Daniela la ka meköle goeëne lai; nge tha öhne fe kö hnene la itre trahmanyi ka ceme eni. Ngo hnei angatre pe hna hmengöhmengön me canga kötre zae.
8 Matre, eni casi pe hi. Thupene la eni a ase meköle goeëne lai, drenge ju hi ni la kola pë trengecatreng; tha tunge hmaca kö lo, nge pë hnyawa ca trengecatreng.* 9 Nge drenge ju hi ni la nine i angeic; ngo ame ju hi la angeic a ithanata, ke hnenge hna hmulizië me meköle qe ipië e kuhu hnadro. 10 E cili, hna ketri ni hnene la ketre iwanakoim me ahlë ni, matre tro ni a huja me mejë hnene la lue iwanakoimeng me lue iwatingönecang. 11 Nge öni angeice koi ni:
“Daniela fe, atr hna wangatrun,* drenge hnyawa ju la hnenge hna troa qaja koi ö. Haawe, cile jë hë, ke hna upi ni koi ö.”
Ame la angeic a qaja lai, ke eni pë hë a cile jë me hmengöhmengön.
12 Nge öni angeice hmaca jë hi: “The xou kö Daniela. Ase hë drenge la itre trengewekë i ö, qaane lo pane drai ne eö a thele troa trotrohnin, me ipië qëmekene la Akötresi ö. Kepine hi lai, matre traqa pi ni. 13 Ngo hnene la joxu ne la baselaia ne Peresi hna cile koi ni ngöne la 21 lao drai. Ame hnei Mikaela,* ketre joxu ka tru,* hna traqa troa xatua ni; nge hnenge pë hë hna lapa e cili, thene la itre joxu ne Peresi. 14 Eni a traqa troa qejepengöne koi ö la ewekë ka troa traqa kowe la nöje i ö, ngöne la itre drai ne la pun, ke tro la hna meköle goeëne cili a eatr elany.”
15 Ame ju hi la angeic a qaja lai, hnenge hna thil me lapa thaup. 16 Nge hnene la ka ceitu me atr hna ketr la qëng; matre hnenge hna fe la qëng, me qaja kowe la ka cil qëmekeng ka hape: “Joxu, hmengöhmengöne catre ni pine la hnenge hna meköle goeën, nge pëhë trengecatreng. 17 Matre tro pena ni, hlue i nyipë, a ithanata tune kaa koi nyipë Joxu? Ke eje hi, pëhë trengecatreng nge thatreine hë ni mano.”
18 Nge hnene hmaca lo ka ceitu me atr hna ketri ni, me aegöcatrenyi ni. 19 Öni angeice jë hi: “The xou kö, atre hna wangatrun!* Epi tro eö a tingeting. Catre pi, eje hi, catre pi.” Angeic pala kö a ithanata koi ni, nge egöcatre hmaca jë hi ni, matre öning: “Ithanata jë koi ni Joxu, ke ase hë nyipëti aegöcatrenyi ni.”
20 Matre öni angeice jë hi koi ni: “Atre hi ö la kepin matre eni a traqa troa wai ö? Eni hmaca la a tro troa isi memine la joxu ne Peresi; nge ame la eni hmaca a bëek, tro la joxu ne Geres a uti koi ni. 21 Ngo tro ni a pane amamai ö la itre ewekë hna cinyanyin ngöne la itus ne la nyipici. Pëkö ca ka xatua ni ngöne la itre ewekë cili, ngo Mikaela hmekuje hi, lo joxu i epun.