Numera

14 Ame hnene la nöj asë hna sue, me treije catr ngöne lai jidri cili. 2 Nge hnene la angetre Isaraela asë hna nyiqaane eetr* koi Mose me Arona, me hape: “Loi ju kö lo e tro sa mec e Aigupito maine ngöne la hnapapa! 3 Hnauëne la Iehova a tro sai së kowe la nöje ce, matre meci hnei taua? Tro la itre ithupëjia a thapa la itre föe së me itre nekö së. Ma ka loi e tro sa bëeke hmaca a tro Aigupito.” 4 Nge goi iqajakeune fe angatr ka hape: “Iëne jë së la ketre tan ka troa tro xomi së a tro Aigupito!”

5 Ame hnei Mose me Arona hna kei qe ipië qëmekene la angetre Isaraela asë ka icasikeu e cili. 6 Nge hnei Iosua nekö i Nuna, me Kaleba nekö i Iefune, lo lue xaa espio, hna kuie zezene la itre iheetre i nyidro, 7 me hape kowe la nöje Isaraela: “Ame la nöj hne huni hna trongën me waipengön, ke nöje ka lolo catr. 8 Nge maine Iehova a kepe së, tro kö nyidrëti lai a tro sai së kowe la nöje cili, nöj gaa neni gala la melek me miel, me hamën ej koi së. 9 Ngo the cile kö koi Iehova, nge the xouene kö la itre atrene la nöje cili, ke ka pë pengön* angatre koi së. Pëhë hnë zae i angatr, ke ce Iehova me easë. The xoue angatre pi kö.”

10 Ngo hnene la nöj asë hna ce mekun troa tranyi nyidroti hnei etë. Ame hna mama pi la lolo i Iehova hune la itat ne icasikeu kowe la angetre Isaraela asë.

11 Nge öni Iehova jë hi koi Mose ka hape: “Tro la nöje ce a tha metrötrë ni uti hë eu? Uti hë eu la tro angatr a tha mejiune koi ni, ngacama hnenge hna kuca la itre iamamanyikeu nyipi angatr? 12 Tro hë ni a lepi angatr hnene la ketre mec ka ixötrekeu nge hna mecin, me apatrenyi angatr. Nge tro hë ni a kuca matre tro eö a ketre nöje ka tru, nge ka catre kö hui angatr.”

13 Ngo öni Mose jë hi koi Iehova ka hape: “Tro hë lai a atre hnene la angetre Aigupito, lo nöj hnei nyipëti hna thapa la angetre Isaraela qa ngön, jëne la trengecatre i nyipë, 14 nge tro hë angatr a iqajakeun ngöne la nöj. Drenge fe hë angatre laka, nyipëti Iehova la ka mama me lapa nyipine la nöje Isaraela. Nyipëti lae Iehova, nge kola cile meköti la iaw i nyipë, nge nyipëti a tro qëmekei angatr ngöne la iaw ka cile meköt e lai, me ngöne la eë ka cile meköt e jidr. 15 Matre e tro nyipëti a aca tro* humuthe la nöje ce, tro hë la itre nöj ka drenge la pengöi nyipë a hape: 16 ‘Hnei Iehova hna lep apatrene la nöje ce ngöne la hnapapa, ke thatreine kö nyidrëti tro sai angatr ngöne la nöj hnei nyidrëti hna sisinyi koi angatr.’ 17 Haawe Iehova fe, epi tro hmaca kö a tru la trengecatre i nyipë enehila, tune lo nyipëti a sisinyi ka hape: 18 ‘Ka hmitre Iehova troa elëhni, nge ka tru trenge ihnimi nyipici, nge ka nue la itre ngazo me itre tria, ngo tro kö nyidrëti a të kowe la atre kuca la ngazo, me të la ngazo ne la itre kem hune la itre nekön, ngöne la hnaakönine xötr memine la hna 4 ne xötr atr.’ 19 Epi tro nyipëti a nue la ngazo ne la nöje celë, thenge la etrune la ihnimi nyipici i nyipë, tune lo aqane nue nyipëti la ngazo ne la nöj qaan e Aigupito uti hë enehila.”

20 Matre öni Iehova jë hi: “Eni a nue la ngazo i angatr thenge la hnei ö hna sipon. 21 Nge pine laka ka mele ni, tro ha tiqa la fene hnengödrai asë hnene la lolo i Iehova. 22 Ngo ame la itre trahmanyi ka öhne la lolong, me itre iamamanyikeu hnenge hna kuca e Aigupito me ngöne la hnapapa, nge ka anyimua tupathi ni, nge ka tha drenge la hnenge hna qaja, tha tro kö la ketre e angatr 23 a hane öhne la nöj hnenge hna sisiny troa hamën kowe la itre keme i angatr. Tha tro kö la ka tha metrötrë ni a öhne la nöj. 24 Ngo pine laka, ketre pengöne kö la aqane waiewekë i Kaleba hlueng, nge angeice pala hi a drei ni, tro hë ni a tro sai angeic kowe la nöj hnei angeice hna tro kow, nge tro la itre matra i angeic a lapane la nöj. 25 Nge pine laka, angetre Amaleka me angetre Kanana a lapa ngöne la hnathup, tro epuni elanyi a bëeke hmaca kowe la hnapapa jëne la gojenyi ne tro kowe la Hnagejë Ka Palulu.”

26 Nge öni Iehova hmaca jë hi koi Mose me Arona ka hape: 27 “Tro la nöje celë ka ngazo a qeje ni uti hë eu? Drenge hë ni la aqane qeje ni hnene la angetre Isaraela. 28 Hape jë koi angatr: “Pine laka, ka mele ni,” öni Iehova, “Tro ni a kuca koi epun tune lo hnenge hna drei epuni e qaja! 29 Nge tro ha kei la itre ngönetrei i epun ka mec ngöne la hnapapa, qaane la ka 20 lao macatre a tro draië, itre hna siji ëjen nge ka qeje ni. 30 Tha tro kö la ketre e epuni a lö ngöne la nöj hnenge hna sisinyi* tro epuni a lapa ngön, ngo Kaleba hi nekö i Iefune, me Iosua nekö i Nuna.

31 “‘“Tro ni a tro fë la itre nekö i epun, lo hnei epuni hna qaja ka hape, troa kötre sai angatr, nge angatre hi la ka troa öhne la nöj hnei epuni hna thipën. 32 Ngo tro ha kei la itre ngönetrei i epun ka mec ngöne la hnapapa. 33 Tro la itre nekö i epuni trahmanyi a thupë mamoe ngöne la hnapapa koi 40 lao macatre, nge tro pë hë angatr a xeni pune la aqane tha mele nyipici* i epun, uti hë la troa kei la nöjei ngönetrei i epuni ka mec ngöne la hnapapa. 34 Nge pine laka, hnei epuni hna waipengöne la nöj koi 40 lao drai, tro hë epuni a xeni pune la ngazo i epun koi 40 lao macatre, ca drai koi ca macatre, ca drai koi ca macatre. Haawe, tro hë epuni a öhne la engazone troa icilekeu* me eni.

35 “‘“Ase hë ni qaja, Iehova ni. Hane hi la hnenge hna troa kuca kowe la nöje ce ka ngazo, lo itre ka icilekeu me eni: tro angatr a patr me mec ngöne la hnapapa celë. 36 Nge ame pena la itre trahmanyi hnei Mose hna upe troa waipengöne la nöj, lo itre espio ka qaja angazone la nöj, me ka ukune la ka ala nyimu troa qeje Mose, 37 tro hë Iehova a humuthe la itre trahmanyi cili, pine angatre qaja angazone la nöj. 38 Ngo tro pe hi a mel hnei Iosua nekö i Nuna, me Kaleba nekö i Iefune, lo lue espio ka hane tro troa waipengöne la nöj.”’”

39 Ame hnei Mose hna tro fë la itre ithanata cili kowe la angetre Isaraela, nge hnene la nöj hna itreijeny. 40 Thupene lai, hnei angatre hna canga ilë e hmakany, me mekune troa elë kowe la itre gaa draië ne la itre wetr, me hape: “Ase hë huni ngazo, ngo eahuni hë la, troa elë kowe la götran hnei Iehova hna upi hun.” 41 Ngo öni Mose jë hi: “Hnauëne laka, tha drei Iehova kö epun? Ka luzi la tronge i epun. 42 The elë kö, ke tha ce Iehova kö me epun; tro ha lepi epun hnene la itre ithupëjia. 43 Ke kola cile qëmekei epun hnene la angetre Amaleka me Kanana, nge tro hë epuni a kei hnei taua. Pine laka, ase hë epuni trotriji Iehova, tha tro hmaca kö Iehova a ce me epun.”

44 Ngazo pe, pi hune kö angatr troa elë hune la itre gaa draië ne la itre wetr, ngo lapa ju pe kö la pua ne isisinyikeu i Iehova me Mose nyipine la lapa. 45 Ame hnene la angetre Amaleka me Kanana ka lapa ngöne la itre wetr, hna ut troa lepi angatr, me weje huzu angatr uti hë Horema.