Iobu
34 Nge öni Elihu hmaca ka hape:
2 “Drenge ju la itre trengewekëng, epun itre ka inamacan;
Drei ni ju hnei epun, itre ka atrepengön asë.
3 Ke hnagenyë la ka waipengöne la itre trengewekë
Tune la kola tupathe la xen hnene la thinem.*
4 Haawe, goeëne jë së la ka meköt;
Nge ce axeciëne jë së la ka loi.
5 Ke öni Iobu ka hape: ‘Ka nyipici ni,
Ngo hnei Akötresieti hna cipane la meköti koi ni.
6 Hapeu, tro kö ni a thoi göne la aqane amekötine ni?
Tha meu kö la akötreng, ngacama pëkö ngazo hnenge hna kuca.’
7 Drei la atr ka tui Iobu,
Ka ij tune la tim la ihnyimasai?
8 Ce nyidrë memine la itre ka iakötrë
Nge nyidrëti a ce tro memine la itre ka kuca la ngazo.
9 Ke öni nyidrë: ‘Pëkö eloin
E tro la atr a amadrinë Akötresie.’
10 Qa ngöne lai, drei ni ju hnei epun itre atr ka inamacan:*
Thatreine kö la nyipi Akötresie troa iakötrë,
Nge thatreine kö la Ka Tru Trenge Men troa kuca la ketre ewekë ka ngazo!
11 Ke tro nyidrëti a nyithupen thenge la hna kuca hnene la atr
Nge tro nyidrëti a të thenge la itre thiina i angatr.
12 Eje hi laka, tha Akötresieti kö a iakötrë;
Nge thatreine kö la Ka Tru Trenge Men troa atriane la meköt.
13 Drei la ka ahnithe koi nyidrë troa musinëne la ihnadro,
Nge drei la ka acili nyidrë hune la fene hnengödrai asë?
14 Maine tro nyidrëti a waipengöi angatr,
Me xome hmaca la mel me hnamano i angatr,
15 Tro ha ce meci la nöjei atr asë,
Nge tro la itre atr a bëeke hmaca kowe la xaxau.
16 Haawe, maine hetre inamacane i nyipë;
Drenge hnyawane ju la hnenge hna troa qaja.
17 Hapeu, tro kö la ka xelene la meköt a mus?
Nge tro kö nyipëti a amekötine la atre ka catr me meköt?
18 Nge tro kö nyipëti a qaja kowe la joxu ka hape: ‘Ka pë hnënyöngöne nyipë’?
Me kowe la itre ka hlemu ka hape: ‘Itre atre ka ngazo epun’?
19 Ngo hetre ka tha ië hna hnim göi itre joxu
Nge ka tha wangatrune la trenamo hune la ka pë ewekë,*
Ke angatr asë la itre hna xup hnene la lue ime i nyidrë.
20 Ijiji angatre hi troa canga mec e hnenyipajidr;
Angatr a hmengöhmengön me meci e thupen;
Nge hna xome fe la itre atre ka catr, ngo tha hnei wanakoime i atre kö.
21 Ke luemeke i Akötresie a goeëne la thiina ne la atr,
Nge öhn asë hi nyidrëti la hnei angeic hna feke ca.
22 Pëkö melöhlem me gaa sihngödr ka ijij
Matre zae hnene la itre ka kuca la ngazo.
23 Ke tha hnei Akötresieti kö hna sa draine la atr
Matre cil qëmekene la hnakootr i nyidrë.
24 Nyidrëti a thëtrije la itre ka catr, nge tha hna pane waipengö i angatre kö
Nge nyidrëti a acile la itre xan nyine nyihna i angatr.
25 Ke atre hi nyidrëti la hnei angatr hna kuca;
Nyidrëti a lepi angatr e jidr, me apatrene triji angatr.
26 Nyidrëti a lepi angatr qëmekene la nöjei atr,
Pine la ngazo i angatr,
27 Nge pine angatr tha xötrethenge nyidrë
Me tha metrötrën la hnei nyidrëti hna kuca;
28 Nge angatr a ukune la ka pë ewekë troa sipo ixatua koi nyidrë,
Matre nyidrëti a drenge la kola treij hnene la itre ka kucakuca.
29 Ke ame la Akötresieti a lapa thaup, drei la ka atreine ameköti nyidrë?
Nge ame la nyidrëti a juetrëne la iqëmeke i nyidrë, drei la ka atreine goeë nyidrë?
Ngacama ketre nöj ju hë maine ketre atr, ngo pëkö ca ka troa öhne la iqëmeke i nyidrë,
30 Tha tro kö Akötresieti a nue la ketre atr ka pë metrötre* koi nyidrë troa joxu
Me trathethine la nöj.
31 Maine tro la ketre atr a qaja koi Akötresie ka hape,
‘Hna ahnëjinë ni, ngo pëkö ngazo hnenge hna kuca;
32 Haawe, ini ni jë la hnenge hna tha öhn;
Nge maine hnenge hna kuca la ngazo, tha tro hmaca kö ni a kuca lai.’
33 Hapeu, tro kö Akötresieti a ameköti nyipë thenge la mekuna i nyipë, nge hnei nyipëti pe hna nuetrije la mekuna i nyidrë?
Qanyi nyipëti kö troa iën, ngo tha eni kö.
Qaja jë koi ni la hnei nyipëti hna atre hnyawa.
34 Tro la itre atr ka inamacan
Ka drei ni a qaja ka hape
35 ‘Iobu a ithanata menu,
Nge pëkö wangatrehmekun ngöne la trengewekë i nyidrë.’
36 Haawe, loi e troa tupathi Iobu hnyawa*
Ke ceitune la aqane sa i nyidrë, memine la itre atre ka ngazo!
37 Nyidrëti a nyixane la ngazo i nyidrë hnei icilekeu;
Nge nyidrëti a xexe la lue ime i nyidrë qëmeke hun cememine la pi tru
Me qajangazone lapaane la nyipi Akötresie!”