Salamo
Thatraqane la atre jumi traem; nyima ngöne Ieduthun.* Salamo i Dravita.
62 Eje hi, eni a treqe Akötresie me lapa thaup.
Nyidrëti la iameleng.*
2 Eje hi, nyidrëti la giting me atre amele ni, me hnë zaeng* ka catr;
Tha tro kö ni a enijenije menu.
3 Uti hë eu la tro epuni a lep la ketre atr matre humuthi angeic?
Hna mecin epun tune la ihag ka cile ez,* me tune la ketre tra etë ka troa kei.
4 Ke angatr a ce thë matre akeinyi angeic qa ngöne la hnëqa i angeic ka tru;
Angatr a madrine fë la thoi.
Itre që i angatr a qeje manathith, ngo itre hni i angatre pe a ieji. (Sela)
5 Eje hi, eni a treqe Akötresie me lapa thaup
Ke qaathei nyidrëti la mejiuneng.
6 Eje hi, nyidrëti la giting me atre amele ni, me hnë zaeng ka catr;
Tha tro kö ni a enij.
7 Qaathei Akötresieti la iameleng me elolong.
Akötresieti hi la giting ka catr me hnapong.
8 Nöjei atre fe, mejiune ju koi nyidrë e nöjei ijin.
Nenge pi la itre hni i epun koi nyidrë.
Akötresieti la hnapo së. (Sela)
9 Ketre hnamano hi la itre nekö i atr,
Nge itre ka canga patr la itre nekö i atr.
Maine troa ce tuluthi angatr asë, ke hmaloi ju kö angatr hune la uqa ne eny.
10 The amë kö la mejiune i epun kowe la qenatrekënö
Nge the mejiun menu kö kowe la atrekënö.
Maine kola tru la itre mo i epun, ke the wangatrune kö.
11 Hnei Akötresieti hna aca ithanata, nge alua drenge ni ka hape:
Ewekë i Akötresieti la trengecatr.
12 Iehova fe, ewekë i nyipëti la ihnimi nyipici,
Ke nyipëti a nyithupene kowe la nöjei atr thenge la isa huliwa i angatr.