Salamo
Thatraqane la atre jumi traem; ngöne la nin ne la “Piny ka pë mej e gaa nany.” Mikitam* i Dravita. Ngöne la kola xomi angeic hnene la angetre Filisiti e Gatha.
56 Akötresieti fe, epi kepe ni hnei nyipë, ke itre atr a thel troa ee ni.
O drai, angatr pala hi a isi me eni me axösisi ni.
2 O drai, tha mano kö la itre ithupëjiang thele jën troa xolouthi ni;
Ala nyimu la ka isi me pi tru koi ni.
3 Ame la kola traqa la xou koi ni, ke eni a mejiun koi nyipë.
4 Eni a mejiun koi Akötresie, lo hnenge hna atrune la trengewekë,
Eni a mejiun koi Akötresie; tha tro kö ni a xou.
Nemene la hna troa kuca koi ni hnene la atr?*
5 O drai, angatr a sewe ni troa kuca la ajang;
Angatre hi a mekun troa akötrë ni.
6 Angatr a lapa zae troa lepi ni;
Angatr a goeën la itre hna feke cang,
Matre thapa la meleng.
7 Nuetriji angatre pi pine la ngazo i angatr.
Akötresieti fe, apatrene pi la itre nöj ngöne la elëhni i nyipë.
8 Hnei nyipëti hna e la itre ijin eni a tro menu.
Thiane pi la itre trenge timidrang ngöne la trengene* tim i nyipë.
Hapeu, tha itre eje kö ngöne la tusi nyipë?
9 E traqa ha la ijin tro ni a sipo ixatua, tro hë la itre ithupëjiang a kötre bëek.
Hane hi la ka xecie koi ni: Ce Akötresieti me eni.
10 Eni a mejiune koi Akötresie, lo hnenge hna atrune la trengewekë,
Nge eni a mejiune koi Iehova, lo hnenge hna atrune la trengewekë,
11 Eni a mejiun koi Akötresie; tha tro kö ni a xou.
Nemene la hna troa kuca koi ni hnene la atr?
12 Akötresieti fe, tro ni a thupëne hnyawane la itre hnenge hna sisinyi koi nyipë;
Tro ni a tro fë la itre hatrene oleng koi nyipë.
13 Ke hnei nyipëti hna thepe ni qa ngöne la mec
Nge hnei nyipëti hna thupën la lue cang, wanga kei pi ni,
Matre tro pala hi ni a tro qëmekei Akötresie, ngöne la lai ne la itre ka mel.