Zakaria

12 Maca:

2 “Tro ni a kuca matre tro Ierusalema a nyi ver ka troa akeikein la itre nöj ezin. Nge tro ha cile xötreithi Iudra me Ierusalema. 3 Ngöne la drai cili, tro ni a kuca matre tro Ierusalema a etë ka hace catr kowe la itre nöj asë. Ame asë hi la itre ka thele troa kep ej, ke tro angatr a eatr, nge tro la nöjei nöj ne la fen a ce cil koi angeic. 4 Ngöne la drai cili,” öni Iehova, “tro ni a lep axouen la itre hos asë, me ahmone la nöjei ka ti hos. Tro ni a thupëne la nöje Iudra, ngo tro pe ni a atimekëne la nöjei hos ne la itre nöj. 5 Nge tro la itre tan* e Iudra a hape: ‘Trengecatreng la itre atrene Ierusalema, jëne Iehova joxu ne la itre trongene isi e hnengödrai, Akötresi angatr.” 6 Ngöne la drai cili, tro ni a kuca matre tro la itre tan e Iudra a tune la trengen ka tiqa hnei eë nyipine la ketre ta sinöe, me tune la uke jina hnine la xötre qitr hna thupa. Tro hë angatr a dreuthetrije la nöjei nöj ezin, ngöne la götrane maca me mi. Nge tro hmaca la itre atrene Ierusalema a lapane la traone* i angatr, e Ierusalema.

7 “Tro Iehova a pane amelene la itre itat e Iudra, matre tha tro kö a mingöminge catre la itre matra* i Dravita me itre atrene Ierusalema, hui Iudra. 8 Ngöne la drai cili, tro Iehova a cilëgöline la itre atrene Ierusalema. Ngöne la drai cili, ame la ka kei* thei angatr, ke troa tui Dravita. Nge tro la itre matra i Dravita a eatrongë angatr tui Akötresie, tune la angela i Iehova. 9 Nge ngöne la drai cili, tro ni a lep apatrene la nöjei nöj ka traqa troa lepi Ierusalema.

10 “Tro ni a nue la uang kowe la hnalapa i Dravita me itre atrene Ierusalema, nge tro hë ni a kepe angatr, nge tro hë angatr a xëwe. Tro hë angatr a goeën la atr hnei angatr hna jaqan, me treije pi angeic tune la aqane treije pine la neköne ka cas. Nge tro angatr a treije latresi pi angeic, tune la aqane treije pine la pane nekön ka mec. 11 Ngöne la drai cili, tro ha treije latresi e Ierusalema, tune lo kola treije latresi e Hadaderimona, ngöne la hnathup e Megido. 12 Tro la nöj me itre lapa a isa treije latresi: lapa ne la itre matra i Dravita kö ngöne la ketre götran, nge itre föe i angatr ngöne la ketre; lapa ne la itre matra i Nathana kö ngöne la ketre götran, nge itre föe i angatr ngöne la ketre; 13 lapa ne la itre matra i Levi kö ngöne la ketre götran, nge itre föe i angatr ngöne la ketre; lapa ne la angetre Simei kö ngöne la ketre götran, nge itre föe i angatr ngöne la ketre; 14 nge tro fe a tune kowe la nöjei lapa asë ka mele pe, tro angatr a isa lapa ngöne la ketre götran, nge itre föe i angatr ngöne la ketre.