Hosea
1 Hnei Iehova hna ithanata koi Hosea,* nekö i Beeri ngöne la ijine musi ne la itre joxu ne Iudra, ene Uzia, me Iotham, me Ahaza, me Hezekia, me ngöne la ijine mus i Ieroboama nekö i Ioasa, joxu ne Isaraela. 2 Ame lo Iehova a nyiqaane ithanata jëne Hosea, öni nyidrë: “Faipoipo jë, ngo tro la föi ö a nyi föe ne gojeny,* me hnaho neköne gojeny koi ö, ke hnene la nöj hna nyi föe ne gojeny* me trotriji Iehova.”
3 Celë hi matre, hnei angeic hna xomi Gomera, nekö i Dibelaima. Nge hnei Gomera hna upune me hnahone la nekö trahmany.
4 Ame hnei Iehova hna qaja koi angeic ka hape: “Ati ëje i nyëne jë, Iezerela,* ke tha hmitre kö matre tro ni a nyithupene kowe la hnanyijoxu i Iehu, pine la itre hna humuth e Iezerela.* Nge tro hë ni a nyipune la hnanyijoxu ne la nöje* Isaraela. 5 Ame ngöne la drai cili, tro ni a hutra la tane pehna i Isaraela ngöne la hnathup e Iezerela.”
6 Ame hna upune hmaca hnei Gomera me hnaho nekö jajiny. Öni Akötresie koi Hosea: “Ati ëje i nyëne jë, Loruama,* ke tha tro hmaca kö ni a utipine la nöje Isaraela. Eje hi, tro ni a helë angatr. 7 Ngo tro pe ni a utipine la nöje* Iudra. Eje hi, eni Iehova Akötresi angatr, la ka troa amele angatr. Ngo tha tro kö ni a amele angatr hnei tane pehna, me taua, me itre hos, me itretre ti hos.”
8 Thupene la hna triji thi Loruama, hnei Gomera hmaca hna upune me hnaho nekö trahmany. 9 Matre öni Akötresie: “Ati ëje i nyëne jë, Loami,* ke tha nöjenge kö epun, nge tha tro hmaca kö ni a Akötresi epun.
10 “Nge tro la angetre* Isaraela a ala nyim, tune la itre wene ngöni ne hnagejë hna thatreine tuluth me e. Nge ame ngöne lo götrane hnenge hna qaja koi angatr ka hape: ‘Tha nöjenge kö epun,’ tro pë hë ni a hë epun: ‘Itre nekön ne la Akötresie ka mel.’ 11 Eje hi, tro ha icasinekeune la nöje Iudra memine la nöje Isaraela ngöne la cas. Nge tro angatr a ce iëne la ketre tan me tro qa ngöne la nöj, ke ketre drai ka sisitria la drai i Iezerela.