Hosea
2 “Hëne jë la itre trejin me epun: ‘Nöjeng!’
Me itre xa i epun: ‘Föe hna utipin!’
2 Upezöne jë la thine i epun, upezö eahlo jë,
Ke tha föenge kö eahlo, nge tha eni kö la föi eahlo.
Epi tha tro hmaca kö eahlo a nyi föe ne gojeny,
Epi tro eahlo a apatrene la nyixetë qa ngöne la lue thi i eahlo,
3 Wanga tro ni a unatrije la itre iheetre i eahlo,
Nge tro ni a kuca matre lapa xöe pi eahlo tune lo drai ne hnaho eahlo.
Tro ni a kuca matre tro eahlo a tune la hnapapa,
Tro ni a saze eahlo koi dro ka qaqacil,
Nge tro ni a kuca matre tro eahlo a mec hnei pi ij.
4 Tha tro kö ni a utipine la itre nekö i eahlo trahmany,
Ke angatr la itre neköne gojeny.
5 Eje hi, hnene la thine i angatr hna nyi föe ne gojeny.
Hnene la föe ka hnaho angatr hna kuca la nyine hmahman, me hape:
‘Tro ni a weje huzune la itre hanying,
Lo itre ka thuange falawa me thue timing,
Me hamë ipene mamoe, me lino, me oel, me nyine ij.’
6 Celë hi matre, tro ni a thingi jë i eahlo hnei ka ithiny.
Eje hi, tro ni a xupi tra etë,
Matre sewe eahlo troa öhnyi gojeny.
7 Tro eahlo a weje huzune la itre hanyi eahlo, ngo thatreine kö eahlo ee angatr.
Tro eahlo a thel agö angatr, ngo thatreine kö eahlo öhnyi angatr.
Tro hë eahlo a qaja ka hape: ‘Tro hmaca ni a bëek kowe la föeng,*
Ke loi ju kö la meleng ekö hun enehila.’
8 Ngazo pe, tha mekune pi kö eahlo laka, eni lo ka hamë qitr koi eahlo, me waina ka hnyipixe, me oel,
Nge eni fe lo ka hamë sileva i eahlo
Me gool, lo hnei eahlo hna atrunyi Baala memin.
9 ‘Qa ngöne lai, tro ni a bëeke hmaca me thapa la itre qitreng ngöne la ijine menu,
Memine la wainang ka hnyipixe ngöne la ijine hu wene rezë,
Nge tro hë ni a thapa la ipene mamoeng me linong ka heetrëne la ngönetrei i eahlo.
10 Enehila, tro ni a amamane la kahmitrötre i eahlo qëmekene la itre hanyi eahlo,
Nge pëkö trahmanyi ka troa atreine thepe eahlo qa ngöne la imeng.
11 Tro ni a thupatëne la madrine i eahlo,
Me itre feet, me itre treu ka hnyipixe, me itre sabath, me itre xaa feete i eahlo.
12 Tro ni a apatrene la itre vin* me itre iwacua, lo öni eahlo:
“Thupenge hi la, qaathene la itre hanying.”
Ngo tro ni a kuca matre tro itre ej a hnënge hnitr,
Nge tro pë hë lai a xen hnene la itre öni wael.
13 Tro ni a nyithupen lo itre drai ne eahlo a huuj kowe la itre hatrene i Baala,
Lo eahlo a ami otrene wanakoim me thaip, matre weje huzune la itre hanyi eahlo,
Ngo ame pë hë ni,’ öni Iehova, ‘thëthëhmi ni hë hnei eahlo.’
14 ‘Celë hi matre tro ni ahmalane la hni i eahlo:
Tro ni a tro sai eahlo kowe la hnapapa,
Nge tro ni a ithanata matre thapa la hni i eahlo.
15 Qaane ju hi lai, tro hmaca ni a hamën la itre vine i eahlo,
Nge tro la Hnathup i Akora, a tune la qëhnelö ka fe gojeny kowe la mejiun.
Tro hë eahlo a sa koi ni e cili, tune lo eahlo a nekö jajiny,
Tune lo eahlo a tro qa Aigupito.
16 Eje hi, ame ngöne la drai cili,’ öni Iehova,
‘Tro hë nyipoti a hë ni, Föeng, ngo tha Masetang hmaca kö.’
17 “Tro ni a xometrije qa ngöne la që i eahlo, la itre ëjen la itre hatrene i Baala,
Nge tha tro hmaca kö a mekune la itre ëje i angatr.
18 Ame ngöne la drai cili, tro ni a kuca thatraqane la nöjeng, la ketre isisinyikeu memine la itre öni wael,
Me itre waco ne hnengödrai, me itre öni ka wewë e celë fen.
Tro ni a xometrij qa ngöne la nöj la tane pehna, me taua, me isi,
Nge tro ni a kuca matre tro la nöjeng a meköle tingeting.
19 Tro hë ni a xomi nyipo matre föeng uti hë epine palua,
Tro ni a isine troa ujë koi nyipo cememine la meköt, me thiina ka meköt,
Me ihnimi nyipici me utipin.
20 Tro ni a isine troa mele nyipici koi nyipo,
Nge tro hë nyipoti a atre Iehova hnyawa.
21 ‘Ame ngöne la drai cili,’ öni Iehova,
‘Tro ni a kapa la sipo ne la hnengödrai,
Nge tro fe la hnengödrai a kapa la sipo ne la ihnadro.
22 Tro la ihnadro a kapa la aja ne la qitr, me waina ka hnyipixe, me oel,
Nge tro angatr asë a kapa la sipo i Iezerela.*
23 Tune la itre feja, tro ni a traa eahlo thatraqai ni hune la ihnadro,
Nge tro ni a utipine la hna tha utipin.*
Tro hë ni a qaja kowe la itre ka tha sine la nöjeng* ka hape: “Epuni la nöjeng,”
Nge tro angatr a sa ka hape: “Nyipëti la Akötresi hun.”’”