Isaia

18 Ekölöhini la nöj ne la itre neköi öni ka tru mejen*

Ngöne la götran ne la itre hneopegejë ne Aithiope!

 2 Angeic a upe la itre qeneqaja qa ngöne la hnagejë,

Hune la itre he hna can hnei rozo matre thupa la hnagejë; öni angeic:

“Tro jë epun, itre ka canga tro fë maca,

Kowe la ketre nöj ka tru matran* me ka jijia ngönetrei,

Lo nöj hna xouen ngöne la nöjei götran,

Lo nöj ka catr nge ka atreine isi

Lo nöj gaa hetre hneopegejë ka troxome la dro.”

 3 Ame epuni asë itretre lapane la fen, itre ka lapane la ihnadro,

Ame la hnei epuni hna troa öhn, ke tro ha tune la ketre hatren hune la itre wetr,

Nge ame la hnei epuni hna troa dreng, ke tro ha tune la kola ufi trutru.

“Tro ni a lapa hnyawa, me goeëne* la göhneng ka cile hut,

Tune la idreuthine la jö,

Me tune la xaxapo ngöne la idreuthine la ijine menu.

 5 Ke qëmekene troa menuëne la itre wene rezë,

Ngöne la kola ase eng, nge kola saze la itre iengen koi wene rezë ka hmedr,

Tro ha thupa la itre picin hnene la nyine xötre vin

Me thupatrij la itre hone vin.

 6 Tro ha nuetriji angatr asë kowe la itre waco ka pi öni ne la itre wetr

Me kowe la itre öni e celë fen.

Tro la itre waco ka pi öni a lapa hui angatr ngöne la ijine hedredrei,

Nge tro la itre öni a lapa hui angatr ngöne la ijine menu.

 7 Ame ngöne la ijine cili, tro ha tro fë ahnahna koi Iehova joxu ne la itre trongene isi e hnengödrai,

Hnene la nöj ka tru matran me ka jijia ngönetrei,

Lo nöj hna xouen ngöne la nöjei götran,

Lo nöj ka catr nge ka atreine isi,

Lo nöj gaa hetre hneopegejë ka troxome la dro

Tro ha tro fë la ahnahna cili, ngöne la götran hnei Iehova joxu ne la itre trongene isi e hnengödrai, hna acile la ëje i nyidrë, ene la wetre Ziona.”