Numera
25 Ame lo kola lapa e Sitima hnene la angetre Isaraela, hnene la nöj hna kuca la itre huliwa ka sis memine la itre jajiny ne Moaba. 2 Nge hnene la itre föe hna hëne la nöj troa sine la itre huuj hna tro fë kowe la itre haze i angatr, matre hnene la nöj hna nyiqaane xen me thili kowe la itre haze i angatr. 3 Qa ngöne lai, hnene la angetre Isaraela hna sine* la hmi i Baala Peora, nge hnei Iehova hna elëhni kowe la angetre Isaraela. 4 Matre öni Iehova jë hi koi Mose: “Hën asë jë la itre ka weje meken,* nge humuthi angatre pi. Thupene lai, athipe jë la itre ngönetrei i angatr qëmekei Iehova e lai petre kö,* matre lapa kötre pi la trengehni i Iehova koi Isaraela.” 5 Nge öni Mose kowe la itre ka iameköti e Isaraela ka hape: “Qa i epuni asë troa isa humuthe la itre trahmany ka lö hnine la hmi i Baala Peora.”
6 Ame hna fetra pi hnene la ketre trahmany qa Isaraela, angeic a lö fë la ketre föe ne Midiana kowe la itre trejin me angeic. Nge kola goeë angeic hnei Mose, memine la angetre Isaraela asë ka treij qëmekene la hnë lö ne la itat ne icasikeu. 7 Matre ame hë la Fineasa nekö i Eleazara, lo nekö i Arona atre huuj, a öhne lai, angeic a mejë jë nyipine la nöj me xome la jo. 8 Nge angeic a xötrethengene jë lai trahmany ne Isaraela ngöne la itate i angeic, me aca tro saane la jo ngöne la kahmitrötre ne lai trahmany ne Isaraela, me kahmitrötre ne la föe. Ame hna patre pi la akötr ka lepe la angetre Isaraela. 9 Matre traqa koi 24 000 lao atr ka mec hnene la akötre cili.
10 Öni Iehova jë hi koi Mose: 11 “Hnei Fineasa, nekö i Eleazara, lo nekö i Arona atre huuj, hna aupune la elëhning koi Isaraela, ke tha kapa kö angeice la atr ka tha mele nyipici koi ni. Haawe, tha hnenge kö hna lep apatren la angetre Isaraela, ngacama eni hmekuje hi* la nyine troa nyihluen. 12 Nge hane hi la nyine tro eö a qaja: ‘Eni a hamë angeic la isisinyikeung ne tingeting. 13 Tro ej a isisinyikeu ka cile hut göne la hnëqa ne atre huuj, thatraqai angeic me itre matra i angeic, ke tha hnei angeice kö hna kapa la atr ka tha mele nyipici kowe la Akötresi angeic, nge hnei angeic hna isine matre troa nue la ngazo* ne la nöje Isaraela.’”
14 Nge ame lo atre Isaraela hna humuth memine la föe ne Midiana, ke Zimeri, nekö i Salu, tixe ne la ketre lapa thene la angetre Simeona. 15 Nge ame lo föe ne Midiana hna humuth, ke Kozebi nekö i Zura; Zura la tixe ne la ketre lapa e Midiana.
16 Ame hë e thupen, öni Iehova koi Mose: 17 “Tro jë troa isi memine la angetre Midiana, nge humuthi angatre pi, 18 ke hnei angatr hna iaö epun hnene la haze Peora me Kozebi, neköne la tixe ne Midiana, lo xa i angatr hna humuth ngöne la drai ne akötr pine la haze Peora.”