Ieremia

33 Hna umë Ieremia pala kö ngöne la kur ne la Itre Ka Thup, nge öni Iehova hmaca koi angeic: 2 “Hane hi la hna qaja hnei Iehova Atre xupe la ihnadro, Iehova Atre eköth me acile hutin ej, lo hna hën ka hape, Iehova: 3 ‘Hë ni jë nge tro ni a sa. Pi tro ni a qaja koi ö la itre ewekë ka tru hna thatreine trotrohnin, nge hnei ö hna thatre.’”

4 “Ke hane hi la hna qaja hnei Iehova, Akötresi Isaraela, göne la itre uma ne la traone celë, me itre uma ne la itre joxu ne Iudra, lo hna thëtrij hnene la itre atr matre cile kowe la ija ne isi me taua, 5 me göne la itre ka traqa troa isi me angetre Kaledaia, me atiqane la itre götrane ce hnene la ngönetrei ne lo itre atr hnenge hna humuthe ngöne la elëhning me trengehning, lo itre ka uku ni troa nuetrije la traone ce, pine la aqane iakötrë i angatr: 6 ‘Tro hmaca ni a aegöcatren me aloin ej, eje hi, tro ni a aloinyi angatr, me hamën atrun koi angatr la tingeting me nyipici. 7 Tro ni a bëeke fë lo angetre Iudra me Isaraela hna akalabusin, nge tro ni a xupi angatre hmaca tun ekö. 8 Tro ni a ahmitrötrë angatr, matre tha tro hmaca kö angatr a hace fë la itre ngazo i angatr. Eje hi, tro ni a nue la itre ngazo me itre tria hnei angatr hna kuca koi ni, nge ka ahacenyi angatr. 9 Tro ni a madrin pine la aqane hlemu ne la traone ce. Nge tro hë la nöjei nöj a qaja aloinyi ni me atrunyi ni, la angatr a dreng la hnenge hna kuca kowe la itre hna akalabusin. Nge tro angatr a xou me hmengöhmengöne pine la nöjei loi hnenge hna troa kuca kowe la traone ce, memine la etrune tingeting hnenge hna troa hamën kow ej.’”

10 “Hane hi la hna qaja hnei Iehova: ‘Ame ngöne la götrane ce, lo hnei epuni hna troa qaja ka hape, ketre hnapapa gaa pë atr me öni, me ngöne la itre traon e Iudra, me itre gojenyi ne Ierusalema ka pë alien, gaa pë atr me öni, troa drenge hmaca 11 la kola sue me madrin, memine la nin ne la trahmany ka faipoipo me föi angeic, memine la nin ne la itre ka hape: “Olene jë koi Iehova joxu ne la itre trongene isi e hnengödrai, ke ka lolo Iehova. Ka epine palua la ihnimi nyipici i nyidrë!”’

“‘Tro angatr a tro fë huuje ne ole ngöne la uma i Iehova, ke tro ni a bëeke fë la itre atren la nöj hna akalabusin, nge tro hmaca ha a tun ekö,’ öni Iehova.”

12 “Hane hi la hna qaja hnei Iehova joxu ne la itre trongene isi e hnengödrai: ‘Ngöne la götrane ce gaa pë atren me öni, me ngöne la nöjei traone i angeic, tro hmaca a hetre hna axö öni. Nge tro hë la itre ka thupë mamoe a amanone la itre öni i angatr e cili.’

13 “‘Ngöne la itre traon hune la itre wetr, me itre traon hune la itre sasala, me itre traon e kolojë, me ngöne la nöje Beniamina, me itre götrane xötreith e Ierusalema, me ngöne la itre traon e Iudra, tro hmaca la hnënge öni a tro fene la iwanakoime ne la ka ee la etru i angatr,’ öni Iehova.”

14 “‘Drenge ju!’ öni Iehova. ‘Tro ha traqa la drai ne tro ni a eatrëne lo hnenge hna thingehnaean ka mingöming göne la nöje Isaraela me Iudra. 15 Ngöne la ijine cili me hneijine cili, tro ni a aciane koi Dravita la ketre ziin* ka meköt, nge ka troa haöthe la nöj hnene la meköt me thiina ka meköt. 16 Ngöne la ijine cili, tro ha amele Iudra, nge tro Ierusalema a mele tingeting. Nge hane hi la aqane troa hëne la traone cili: Iehova la meköti së.’”

17 “Ke hane hi la hna qaja hnei Iehova: ‘Tro pala hi a hetre atr qa ngöne la itre matra i Dravita, ka troa lapane la theron e Isaraela. 18 Nge tro pala hi a hetre atre huuj qa ngöne la tribu i Levi, ka troa cile qëmekeng, matre tro fë huuj ne dreuth asë, me huuje ne wene feja, me itre xaa huuje ju kö.’”

19 Nge öni Iehova hmaca koi Ieremia: 20 “Hane hi la hna qaja hnei Iehova: ‘Hapeu, atreine kö epuni apëne la isisinyikeung memine la lai, me isisinyikeung memine la jidr, matre tha tro hmaca kö a lai me jidr ngöne la ijine hna sa? Waea! 21 Ketre tun, pëkö ka atreine troa apatrene la isisinyikeu hnenge hna kuca me Dravita hlueng, me sewe angeic troa hetre nekön ka troa mus hune la therone i angeic. Nge pëkö ka atreine troa apatrene la isisinyikeung me itre atre huuj qaathei Levi, lo itre hlueng. 22 Tune la trongene isi e hnengödrai* hna thatreine e, me itre wene ngöni ne hnagejë, tro ni a kuca matre ala nyimu jë la itre matra i Dravita hlueng, memine la angetre Levi ka huliwa koi ni.’”

23 Nge öni Iehova hmaca jë hi koi Ieremia: 24 “Drenge fe hi eö lo hna qaja hnene la nöje ce? ‘Tro Iehova a nuetrije la lue fami hnei nyidrë hna iën.’ Angatr a thaipiën la nöjeng, nge tha angatre hmaca kö a goeë nyudren ceitu me ketre nöj.

25 “Matre hane hi la hna qaja hnei Iehova: ‘Tune la isisinyikeu hnenge hna kuca memine la lai me jidr, me itre wathebo* ne la hnengödrai me ihnadro, lo hnenge hna metrötrën, 26 tha tro pi kö ni a nuetrije la itre matra i Iakobo me Dravita hlueng. Nge pëkö ka troa sewe ni troa iëne la itre tan thene la itre matra i angeic, me acili angatr hune la itre matra i Aberahama, me Isaaka, me Iakobo. Ke tro hmaca ni a acasine lo itre hna akalabusin thei angatr, me utipi angatr.’”