Deuteronomi

4 Isaraela fe, drenge ju enehila la itre wathebo me itre hna amekötin hnenge hna ini epun troa trongën, matre mele pi epun, nge tro hë epuni a lö me thapa la nöj hnei Iehova, Akötresi ne la itre qaaqaa i epun hna troa hamë epun. 2 Tha tro kö epuni a nyixane la hnenge hna amekötin koi epun, maine apatrene la ketre sin, matre tro pala hi epuni a trongëne la itre hna amekötin hnei Iehova Akötresi epun, lo hnenge hna ahnithe koi epun.

3 “Öhne hë epuni lo hnei Iehova hna kuca göne la haze Peora: hnei Iehova Akötresi epun hna apatren nyipi epun la itre atr ka nyihlue i Baala Peora. 4 Ngo ame kö epun, itre ka lapa qal koi Iehova Akötresi epun, mele pala kö epun enehila. 5 Goeën, ase hë ni ini epun la itre hna amekötin me itre wathebo, tune lo hnei Iehova Akötresing hna ahnithe koi ni, matre tro epuni a trongën itre ej ngöne la nöj hnei epuni hna troa thapa. 6 Nge qa i epuni troa trongëne hnyawan itre ej, ke celë hi aqane ujë ne la atr ka inamacan me ka atrein, qëmekene la itre nöj ka troa drenge la itre wathebo cili. Qa ngöne lai, tro hë angatr a qaja ka hape: ‘Nyipici laka, ame la nöj ka tru celë, ke nöje ka inamacan me ka atrein.’ 7 Ke eje hi, drei la nöj ka hetre Akötresie ka thupë angatr, tune la aqane thupë së hnei Iehova Akötresi së, ngöne la easa hë nyidrë e nöjei ijin? 8 Nge drei la nöj ka tru, nge ka hetre hna amekötin me itre wathebo ka meköt, hune la wathebo hnenge hna amë qëmekei epun enehila?

9 “Ngo ame pe, wange kö nge thupëne hnyawa kö, wanga thëthëhmine pi epun la itre ewekë hnei epun hna öhn. Nge wanga patre pi qa kuhu hni i epun la itre ewekë cili ngöne la nöjei drai ne mele epun. Qa i epuni fe troa inin itre ej kowe la itre nekö i epuni trahmany, me itre api i epun. 10 Ngöne lo drai ne epuni a cil qëmekei Iehova Akötresi epun e Horeba, hnei Iehova hna qaja koi ni ka hape: ‘Icasikeune jë la nöje koi ni, matre tro angatr a drenge la itre trengewekëng, nge matre tro angatr a xoue ni e nöjei drai ne mele angatr e celë fen, nge matre tro angatr a inine la itre nekö i angatre trahmany.’

11 “Hnei epun hna easeny me icileny fene la wetr. Nge hna mel la eë hun ej uti hë e koho hnengödrai; kola miti drai, nge hetre iaw, me melöhlem. 12 Ame hnei Iehova hna ithanata koi epun nyipine la eë. Drenge hi epun la nyidrëti a ithanata, ngo pekö hnei epuni hna öhn. Epuni hi a dreng la kola ithanata. 13 Nge hnei nyidrëti hna amamai epun la isisinyikeu i nyidrë, me upi epun troa metrötrën: ene lo 10 lao Wathebo.* Thupene lai, hnei nyidrëti hna cinyianyin itre ej ngöne la lue sine etë. 14 Ngöne la ijine cili, hnei Iehova hna upi ni troa ini epuni la itre hna amekötin me itre wathebo, nyine tro epuni a trongën ngöne la nöj hnei epun hna troa thapa.

15 “Pine laka pëkö hnei epuni hna öhn ngöne lo drai ne Iehova a ithanata koi epun e Horeba nyipine la eë, haawe, wai epuni kö, 16 wanga tria pi la aqane ujë i epun ngöne la epuni a xupe la ketre idrola ceitu me ketre ewekë, maine ketre trahmanyi pena maine föe, 17 maine ketre öni e celë fen, maine ketre waco ka sesë e caha hnengödrai, 18 me nöjei öni ka wewë e kuhu hnadro, me nöjei ie ka mel ngöne la itre tim. 19 Nge ame la epuni a gala draië me goeëne la jö, me treu, me itre wëtresij —me nöjei ewekë e koho hnengödrai— the thele kö troa thil me nyihluen itre ej. Ke hnei Iehova Akötresi epun hna hamën itre ej thatraqane la nöjei nöj e cailo fen. 20 Nge epuni la hnei Iehova hna iën, me xome qa ngöne la eë ka ahmune la fao e Aigupito, matre tro epuni a sipu nöje i nyidrë, tun enehila.

21 “Hnei Iehova hna elëhni koi ni pi epun, nge ase hë nyidrëti qaja ka hape, tha tro kö ni a sasaithe la Ioridrano, me lö kowe la nöje ka lolo hnei Iehova Akötresi epuni hna hamën nyine edrö i epun. 22 Eje hi, tro hë ni a mec ngöne la nöje celë. Nge tha tro kö ni a sasaithe la Ioridrano. Ngo ame epun, tro hë epuni a sasaith ej, me thapa la nöje celë ka lolo. 23 Nge wai epuni kö, wanga thëthëhmine pi epuni la isisinyikeu i epun me Iehova Akötresi epun. The xupe kö la itre idrola ka ceitu memine la nöjei ewekë hnei Iehova Akötresi epun hna wathebo epun troa nyihatren. 24 Ke ame Iehova Akötresi epun, ceitu i nyidrë me eë ka catrehnin, nge aja i Akötresie troa nyihlue i nyidrë hmekuje* hi.

25 “Nge maine hetre nekö i epuni hë, me itre api epun, nge ekö hë epuni lapa ngöne la nöj, nge ngazo hë la aqane ujë i epun, nge epuni a xupi idrola maine kuca la ketre ewekë ka ngazo koi Iehova Akötresi epun matre aelëhni nyidrë, 26 haawe eni hë la a qaja hnyawan koi epun qëmekene la hnengödrai me ihnadro laka, tro ha canga apatrenyi epun qa ngöne la nöj hnei epuni hna troa thapa, thupene la epuni a sasaithe la Ioridrano. Nge tha tro kö epuni a lapa aqeany, ke tro ha apatrenyi epun. 27 Nge tro Iehova a aisa ije epun ngöne la itre xaa nöj. Nge ala xalaithe hi thei epun la itre ka troa mel ngöne la itre nöj hnei Iehova hna troa aisa ije epun. 28 Nge e cili, tro hë epuni a nyihluene la itre haze hna kuca hnei sinö me etë, nge hna xupe hnei atr, itre haze ka tha goe kö, nge ka tha drenge kö, nge tha ka xeni kö, nge tha ka hngölëne kö.

29 “Maine qa cili tro epuni a thele Iehova Akötresi epun, nge maine tro epuni a thele nyidrë hnene la hni i epun ka pexej, me mele i epuni ka pexej, tro hë epuni a öhnyi nyidrë. 30 Nge e fenesi hë la ijine cili, tro ha atraqatre la akötre i epun. Nge ngöne la kola traqa la nöjei ewekë cili, tro hmaca epuni a bëeke koi Iehova Akötresi epun, nge tro hë epuni a drei nyidrë. 31 Ke ame Iehova Akötresi epun, Akötresie ka utipin. Tha tro jë kö nyidrëti a nuaxöji epun, me apatrenyi epun. Nge tha tro jë kö nyidrëti a thëthëhmine la isisinyikeu i nyidrë memine la itre qaaqaa i epun.

32 “Enehila, pane mekune jë lo itre drai hnapan, lo patre petre kö epun, qaane lo Akötresieti a xupe la atr e celë fen. Nge thele jë qa ngöne la ketre cane la hnengödrai uti hë la ketre, ka hape, hna hane fe kö traqa la ketre ewekë ka tru tune la? Nge hne së kö hna dreng la ketre ewekë ka tun? 33 Nge hnene kö la ketre nöje ka tui ö hna hane drenge la nine i Akötresie nyipine la eë, nge mele kö angatr? 34 Maine pena, hnei Akötresieti kö hna mekune troa thapa la ketre nöj qa ngöne la ketre nöj jëne la itre iameköti,* me itre hatren, me itre iamamanyikeu, me isi, me jëne la iwanakoime i nyidrëti ka catr, me ime ka catre* i nyidrë, me itre ewekë nyine axouen, tune lo hnei Iehova Akötresi epuni hna kuca qëmekei epun e Aigupito? 35 Ame la itre ewekë cili, ke hna amamai epun matre tro epuni a atre laka, Iehova hmekuje hi la nyipi Akötresie; nge pëkö ketre. 36 Nge qa hnengödrai, hnei nyidrëti hna nue epun troa drenge la nine i nyidrë, matre troa ameköti epun. Nge qa celë fen, hnei nyidrëti hna amamai epuni la eë atraqatr i nyidrë, nge hnei epuni hna drenge la itre trengewekë i nyidrë nyipine la eë.

37 “Pine laka, hnei nyidrëti hna hnime la itre qaaqaa i epun, me iëne la itre matra i angatr, matre hnei nyidrëti hna thepe epuni qa Aigupito qëmekei nyidrë, nge jëne la mene ka catre i nyidrë. 38 Nge hnei nyidrëti hna helëne qëmekei epun la itre nöj ka tru nge ka catre kö hui epun, matre troa thepe epun kowe la nöje i angatr, lo hna hamën nyine edrö i epun. Nge celë hi ewekë ka traqa. 39 Haawe, ame enehila, loi e tro epuni a atre me mekun laka, Iehova la nyipi Akötresie e koho hnengödrai me e celë fen, nge pëkö ketre. 40 Nge qa i epun troa trongëne la itre hna amekötin, me itre wathebo hnenge hna hamëne koi epun enehila, matre troa tro loi la mele i epun me itre nekö i epun, nge matre tro epuni a lapa aqeany ngöne la nöj hnei Iehova Akötresi epun hna troa hamë epun.

41 Nge ame ngöne la ijine cili, hnei Mose hna amë acone la köni traon ngöne la götrane koië ne la hneopegejë Ioridrano, 42 matre troa kötre mel e cili hnene la itre ka humu atr ngo tha hna thë kö, nge tha ka methinëne kö lo hna humuth. 43 Nge ame la itre traone cili ke: Bezeri ngöne la hnapapa, ngöne la itre götrane gaa draië thatraqane la angetre Reubena, me Ramotha e Gileada thatraqane la angetre Gada, me Golana ngöne la nöje Basana thatraqane la angetre Manase.

44 Celë hi itre trenge Wathebo hnei Mose hna tro fë kowe la angetre Isaraela. 45 Celë hi itre nyine amekunën, me itre hna amekötin, me itre wathebo hnei Mose hna hamëne kowe la angetre Isaraela, thupene lo angatr a tro qa Aigupito. 46 Hna traqa lai ngöne la götrane la hneopegejë Ioridrano, ngöne la hnathup qëmekene Bethe-Peora, ngöne la nöje i Sihona, joxu i angetre Amora ka lapa e Hesebona. Hnei Mose me angetre Isaraela hna lepi angeic, thupene lo angatr a tro qa Aigupito. 47 Hnei angatr hna thapa la nöje i angeic memine la nöje i Oga, joxu ne Basana, lo nöj ne la lue joxu ne la angetre Amora ngöne la götrane koië ne la hneopegejë Ioridrano, 48 qa Aroera, ngöne la xötr ezine la hnathup e Arenona, uti hë la Wetre Siona, ene Heremona, 49 memin asë la Araba ngöne la götrane koië ne la hneopegejë Ioridrano, uti hë la hnagejë ne la Araba,* fene la itre sasala ne Pisega.