Ieremia

36 Ame ngöne la hna 4 ne macatre ne mus i Iehoiakima nekö i Iosea, joxu ne Iudra, hnei Iehova hna ewekë koi Ieremia me hape: 2 “Xome jë la tusi hna ewath. Cinyanyine ju e kuhu hnine la nöjei ewekë hnenge hna qaja koi ö, qaane lo eni a nyiqane ithanata koi ö, ngöne lo ijine mus i Iosea uti hë enehila, me nöjei hnëjin hnenge hna amekötin göi Isaraela, me Iudra, me itre nöj asë. 3 Nge e tro la angetre Iudra a drenge la nöjei akötr hnenge hna mekune troa kuca koi angatr, ma tro hë angatre lai a nuetrije la itre aqane ujë i angatr ka ngazo. Nge tro hë ni a nue la itre tria me itre ngazo i angatr.”

4 Ame hnei Ieremia hna hë Baruka nekö i Neria, me upi angeic troa cinyanyin la nöjei trengewekë i Iehova hnine la tusi hna ewath. 5 Thupene lai, hnei Ieremia hna upi Baruka ka hape: “Pine laka, hna wathebo ni troa lö hnine la uma ne hmi i Iehova, 6 nga eö la ka troa tro. Tro eö a e catrëne la itre hna qaja hnei Iehova, lo hnenge hna upi ö troa cinyanyin hnine la tusi hna ewath. E jë kowe la nöj e hnine la uma ne hmi i Iehova, ngöne la drai ne angatr a tha xen. Nge tro hë la angetre Iudra ka traqa qa ngöne la itre traone i angatr a drenge la itre hnei ö hna e. 7 Nge maine jë, tro Iehova a kepe angatre hmaca, nge tro angatr a nuetrije la aqane ujë i angatr ka ngazo, ke atraqatre la elëhni me trengehni i Iehova kowe la nöje ce.”

8 Ame hnei Baruka nekö i Neria hna kuca asë la hna qaja hnei Ieremia perofeta: hnei angeic hna tro kowe la uma ne hmi i Iehova, me e catrëne la trengewekë i Iehova hna cinyanyin ngöne la tusi hna ewath.*

9 Ame ngöne la ijine mus i Iehoiakima nekö i Iosea joxu ne Iudra, ngöne la hna 9 ne treu ne la hna 5 ne macatre, hnene la itre atrene Ierusalema me itre atrene la itre traon e Iudra ka traqa e Ierusalema, hna nyiqaane tha xen qëmekei Iehova. 10 Matre hnei Baruka hna tro kowe la uma ne hmi i Iehova, ngöne la hnahag* hna hnëkën koi Gemaria nekö i Safana lo sekreter,* ngöne la kur e koho, ezine la qëhnelö ka hnyipixe ne la uma ne hmi i Iehova. Nge angeic a e catrëne jë qëmekene la nöjei atr, la itre trengewekë i Ieremia hna cinyanyin e hnine la tusi hna ewath.*

11 Matre ame hë la Mikaia nekö i Gemaria, lo nekö i Safana, a dreng la itre hnei Iehova hna qaja e hnine la tusi hna ewath,* 12 hnei angeic hna uti kowe la uma i joxu, me lö hnine la hnahage ne la sekreter. Nge e cili, kola ilapanyi la itre nekö i joxu* asë: ene Elisama lo sekreter, me Delaia nekö i Semaia, me Elenathana nekö i Akebora, me Gemaria nekö i Safana, me Zedekia nekö i Hanania, memine la itre xaa nekö i joxu. 13 Hnei Mikaia hna qajaqaja koi angatr la nöjei ewekë hnei angeice hna dreng, lo Baruka a e la tusi hna ewath* qëmekene la ka ala nyim.

14 Ame hnene la itre nekö i joxu hna upi Iehudi nekö i Nethania, nekö i Salemia, nekö i Kusi, troa qaja koi Baruka ka hape: “Xome jë la tusi hna ewath hnei ö hna e qëmekene la nöjei atr nge trohemi.” Matre hnei Baruka nekö i Neria hna xome la tusi hna ewath me tro koi angatr. 15 Öni angatre jë hi: “Pane lapa ju, nge e catrëne jë koi huni la tusi hna ewath.” Ame hnei Baruka hna e koi angatr.

16 Thupene la hnei angatr hna drenge la nöjei trengewekë hna qaja, angatr a igoeë ju me xou. Öni angatre jë hi koi Baruka: “Loi e tro huni a canga thuemacanyi joxu la nöjei trengewekë cili.” 17 Nge hnei angatr hna hnyingë Baruka ka hape: “Pane qaja jë koi huni la aqane cinyanyin eö la itre trengewekë cili. Ieremia kö la ka qaja koi ö la nyine troa cinyanyin?” 18 Öni Baruka jë hi: “Öö, angeice hi la ka qaja, nge eni la ka cinyanyin hnei akr e hnine la tusi hna ewath.”* 19 Matre önine la itre nekö i joxu koi Baruka: “Tro jë eö me Ieremia a zae, nge the qaja pi kö la hnë zae i epon.”

20 Thupene lai, hnei angatre hna amë la tusi hna ewath ngöne la hnahag hna hnëkën koi Elisama sekreter, me tro koi joxu ngöne la kur matre thuemacanyi nyidrë la nöjei ewekë hnei angatr hna dreng.

21 Ame hnei joxu hna upi Iehudi troa xome la tusi hna ewath. Thupene la angeic a ase xome la tus qa ngöne la hnahage i Elisama sekreter, hnei Iehudi hna e qëmekene la joxu me itre nekö i joxu ka cil ezin. 22 Kolo hmekune lo hna 9 ne treu,* lo joxu a lapa ngöne la uma i nyidrë thatraqane la itre ijine hnötr. Qëmekei nyidrë, kola mele la eë ngöne la hnaeë. 23 Nge ame ju hi la Iehudi a ase e la könitre maine foa lae götran, ke joxu a thupa pi la götrane cili hnene la hele ne sekreter, me kuiën ngöne la hnaeë, uti hë la kola ae la tus. Nge aqane kuca i nyidrëti lai, uti hë la kola dreuthetrij asë la tusi hna ewath. 24 Goi pë fe xouen la joxu memine la itre ka huliwa i nyidrë, la angatr a drenge la itre trengewekë cili. Pëkö ala casi thei angatr ka hane kuie zezene la itre iheetre i angatr. 25 Ngacama hnei Elenathana, me Delaia, me Gemaria hna sipo iele joxu, matre tha tro kö a dreuthe la tusi hna ewath, ngo tha drei angatre kö hnei nyidrë. 26 Ketre, hnei joxu hna upi Ieramela nekö i joxu trahmany,* me Seraia nekö i Azeriela, me Selemia nekö i Abedela, troa othi Ieremia perofeta me Baruka, lo sekreter i angeic. Eloine pe, hnei Iehova hna juetrë nyidro.

27 Thupene la joxu a ase dreuthe la tusi hna ewath ka qatreng la itre trengewekë hnei Ieremia hna upi Baruka troa cinyanyin, ke hnei Iehova hmaca hna ithanata koi Ieremia me hape: 28 “Xome hmaca jë la ketre tusi hna ewath, nge cinyanyine ju la nöjei trengewekë ka ej ngöne lo tusi hnapan, lo hnei Iehoiakima joxu ne Iudra hna dreuthetrij. 29 Nge qaja ju göi Iehoiakima joxu ne Iudra ka hape: ‘Hane hi la hna qaja hnei Iehova: “Hnei ö hna dreuthetrije lai tus, me hnying ka hape: ‘Hnauëne la eö a cinyanyin ka hape: “Tro la joxu ne Babulona a lepe la nöje ce, nge tha tro hmaca kö a hetre atr me öni”?’ 30 Qa ngöne lai, hane hi la hna qaja hnei Iehova göi Iehoiakima joxu ne Iudra: ‘Tha tro kö la ketre matra i angeic a nyihnai* angeic, me lapane la therone i Dravita. Nge tro ha nue la ngönetrei i angeic ka mec troa cinajön e lai, me lepanyi e jidr. 31 Tro ni a ihnyingë me angeic, me itre matra i angeic, me itre ka huliwa i angeic, pine la itre tria i angatr. Nge tro ni a axulune kowe la itre atrene Ierusalema me Iudra, la nöjei akötr hnenge hna perofetan koi angatr, pine angatre tha idrei.’”’”

32 Ame hnei Ieremia hna xome la ketre tusi hna ewath,* me hamën koi Baruka nekö i Neria, lo sekreter. Nge angeic a qaja ju koi Baruka la nöjei trengewekë ka ej ngöne lo tus hna dreuthetrije hnei Iehoiakima joxu ne Iudra. Nge hna nyixan hmaca kö hnene la itre xaa trengewekë ka tune la.