Levitiko

25 Nge öni Iehova hmaca koi Mose hune la Wetre Sinai, ka hape: 2 “Hape jë kowe la angetre Isaraela: ‘E traqa ha epun ngöne la nöj hnenge hna troa hamë epun, tha tro kö epuni a huliwane la ihnadro, ke sabathi Iehova lai. 3 Ngöne la 6 lao macatre, tro eö a traa feja ngöne la hlapa i ö, nge tro eö a nyidrawane la vine i ö koi 6 lao macatre, nge tro fe eö a menuëne la itre wene ne la dro. 4 Ngo ngöne la hna 7 ne macatre, tro ha nue hnyawa la ihnadro troa pane mano, ke sabathi lai koi Iehova. Nge tha tro kö eö a traa feja ngöne la hlapa i ö, nge tha tro kö eö a nyidrawane la ivine i ö. 5 Tha tro kö eö a menuëne la itre wene feja ka cia cas thupene la ijine menu, nge tha tro kö eö a menuëne la itre wene rezë hna tha nyidrawan. Troa hetre macatre ne mano ka pexej thatraqane la ihnadro. 6 Ngo ijiji ö troa xeni la itre wene ne la dro ngöne la ijine sabath, eö memine la itre hlue i ö, trahmanyi me föe, memine la hlue i ö hna nyithupen, memine la itre trenyiwa ka lapa thei ö, 7 memine la öni ka mem, memine la öni wael ngöne la nöje i ö. Nge ame asë hi la itre wene feja ka cia hune la ihnadro, ke ijije hi troa xeni itre ej.

8 “‘Tro eö a e la 7 lao macatre ne sabath, ene la troa a 7 lao e la 7 lao macatre. Matre ame la etrune la 7 lao macatre ne sabathe cili, ke traqa koi 49 lao macatre. 9 Ame ngöne la drai 10 ne la hna 7 ne treu, qa i ö troa ufi trutru; ngöne la Drai Ne Ialoinekeun, qa i ö troa ufi trutru matre troa drenge hnene la nöje i ö asë. 10 Qa i epun troa ahmitrötrën la hna 50 ne macatre, me qaja trongëne la ijine inuamacany* ngöne la nöj asë. Tro hë ej a ijine Iubeli* thatraqai epun, nge isa qa i epun troa xome hmaca la itre hnepadro i epun, me isa bëeke kowe la itre fami i epun. 11 Ame la hna 50 ne macatre cili, ke ijine Iubeli lai thatraqai epun. Tha tro kö epuni a traa feja me menuëne la itre wene feja ka cia xan nge ka lapa pe, nge tha tro kö epuni a menuëne la itre wene rezë hna tha nyidrawan. 12 Ke celë hi ijine Iubeli, nge tro ej a hmitrötr thatraqai epun. Nge tro hmekuje hi epuni a xeni la itre wene feja ka cia xan.

13 “‘Ngöne la macatre ne Iubeli, tro hmaca angatr a isa bëeke kowe la itre hnepadro i angatr. 14 Maine eö a salemën maine itöne pena la ketre ewekë ne la atre lapa easenyi ö, tha tro kö epuni a huliwa qenatrekënö. 15 Tro eö a itöne qaathene la atre lapa easenyi ö, thenge la etrune la itre macatre qaane lo Iubeli, nge tro angeic a salemëne koi ö la hlapa, thenge la itre macatre ne menuën. 16 Nge ijiji angeic troa atrune la thupen ej e tru pala kö la itre macatre, nge maine xalaithe pe hi la itre macatre, tro hë angeic a acone la thupen, ke tro angeic a salemëne koi ö, thenge la etrune hna troa menuën elany. 17 Tha tro kö la ketre e epun a huliwa qenatrekënö kowe la atre lapa easenyi angeic, ngo tro pe epun a xouene la Akötresi epun, ke Iehova ni Akötresi epun. 18 Maine tro epuni a trongëne la itre wathebong, me kuca thenge la itre hnenge hna amekötin, tro hë epuni a mele tingeting ngöne la nöj. 19 Tro la ihnadro a hamëne la itre wen ej, nge tro hë epuni a xeni mej, me lapa tingeting e cili.

20 “‘Maine epuni a isa hnyinge ka hape: “Nemene la hne së hna troa xeni ngöne la hna 7 ne macatre, e tha hne së kö hna pane eënyi me menu?” 21 Loi e tro epuni a atre laka, tro ni a amanathithi epun ngöne la hna 6 ne macatre, nge tro hë la ihnadro a hamëne la xeni ka ijij thatraqai epun koi köni macatre. 22 Nge ngöne la hna 8 ne macatre, tro epuni a eënyi ngöne la itre hlapa i epun, me xeni la itre hnei epuni hna menuëne uti hë la hna 9 ne macatre. Nge uti hë la tro epuni a menu, tro epuni a xeni la itre hnei epuni hna menuëne lo itre macatre ka ase hë.

23 “‘Tha tro kö a salemën paluane la ihnadro, ke ewekëng la ihnadro. Ke ame koi ni, itre trenyiwa epun me itre ka traqa. 24 Ngöne la nöj asë hnei epuni hna lapan, ke ame la atre salemëne la hnepadro i angeic, ijiji angeic troa itöne hmaca.

25 “‘Maine tro la atre lapa easenyi ö a pë ewekë, me salemëne la ketre götran ne la hnepadro i angeic, tro la atre itö hnan,* ene la ketre sipu sinee i angeic, a itöne hmaca lo hna salemëne hnene la trejin me angeic. 26 Maine pëkö ka troa itö hnan, nge trenamo hë angeic, nge ijiji angeic hë troa itöne hmaca la itre ewekë i angeic, 27 tro angeic a e la etrun thenge la itre macatre qaane lo angeic a salemën ej. Nge qa i angeic troa hamëne la munëne kowe la atre itö, nge tro hmaca angeic a xome la hnepadro i angeic.

28 “‘Ngo maine thatreine kö angeic troa xome hmaca la hnepadro i angeic, tro hë ej a hnepadro ne la atre itö, uti hë la macatre ne Iubeli. Nge tro hmaca a hnepadro i angeic ngöne la ijine Iubeli, ijiji angeic hmaca troa xome ej.

29 “‘Nge maine tro la ketre atr a salemëne la ketre uma ngöne la traon hna xupi hagen, ijiji angeice hmaca troa itön la uma cili ngöne la ca macatre, qaane lo drai ne salemën ej. Nge ngöne la ca macatre ka pexej, ijiji angeic troa itön eje hmaca. 30 Ngo maine tha hna itöne eje kö thupene la ca macatre ka pexej, tro hë la atre itö a xome paluane la uma ngöne la traon hna xupi hagen. Nge tro ej a edrö ne la itre matra i angeic, nge tha tro kö a nue ej ngöne la ijine Iubeli. 31 Ngo ame la itre uma ngöne la itre traon hna tha xupi hagen, tre hna aceitunëne memine la itre uma ngöne la itre hlapa, nge ijije hi troa itöne hmaca itre ej, nge tro ha nue itre ej ngöne la ijine Iubeli.

32 “Nge ame la itre uma ne la angetre Levi e hnine la itre traone i angatr, ke ijiji angatre pala hi troa itöne hmaca. 33 Maine thatreine kö la atre Levi troa itöne hmaca la uma i angeic hna salemëne ngöne la traon, ke tro ej a bëeke hmaca koi angeic ngöne la ijine Iubeli; ame la itre uma ngöne la itre traone i angetre Levi, ke edrö i angatre hi lai nyipine la angetre Isaraela. 34 Ketre, tha tro kö a salemën la itre hlapa* xötreithe la itre traone i angatr, ke edrö i angatre lai ka cile hut.

35 “‘Maine tro la ketre trejin ka lapa thei ö a pë ewekë, nge thatreine hë angeic itön la ka nyipiewekë, qa i ö troa xatua angeic tune la aqane tro eö a xatuane la ketre trenyiwa, maine ketre atr ka nyipi traqa ngöne la nöj, matre tro angeic a mel. 36 Tha tro kö eö a hën atrune la thupen koi angeic, ngo tro pe eö a xouene la Akötresi ö, nge tro ha mel la trejine me eö thei epun. 37 Tha tro kö eö a hamë mani koi angeic göi thupen, me hamë xeni koi angeic göi thupen. 38 Iehova ni Akötresi epun, atre lö sai epun qa Aigupito me hamë epun la nöje Kanana, matre mama jë laka, eni la Akötresi epun.

39 “‘Maine tro la trejin ka mele thei ö a pë ewekë, nge tro angeic a salemë angeice koi ö, ke tha tro kö eö a huliwa angeic tune la hlu. 40 Ngo tro eö a xomi angeic ceitu me atre kepe thupen, maine atre nyipi traqa ngöne la nöj. Tro angeic a nyihlue i ö uti hë la macatre ne Iubeli. 41 Thupene lai, tro hmaca angeic me itre nekö i angeic a bëeke kowe la fami i angeic. Nge tro hmaca angeic a xome la hnepadro ne la itre qaaqaa i angeic. 42 Ke itre hlueng angatr, lo hnenge hna lö fë qa Aigupito. Tha tro kö angatr a salemë angatr, tune la aqane salemëne la ketre hlu. 43 Tha tro kö eö a axösisi angeic, ngo tro pe eö a xouene la Akötresi ö. 44 Tro eö a xome la itre hlue i ö trahmanyi me föe, qa ngöne la itre nöj xötreithi epun, nge ijiji epun troa itön qa ngöne la itre nöje cili la hlue trahmanyi maine föe. 45 Nge ijiji epuni fe troa itön la itre hlu qaathene la itre nekön la itre trenyiwa ka lapa thei epun, me qaathene la itre matra i angatr hna hnahon ngöne la nöj, ke tro hë angatr a edrö i epun. 46 Nge ijiji epuni troa nue la itre hlue i epun nyine edrö ka cile hut kowe la itre nekö i epun, me huliwa angatr tune la itre hlu. Ngo ame la itre trejin me epun qa Isaraela, tha tro kö epuni a thahluë angatr.

47 “‘Ngo maine tro la ketre trenyiwa, maine ketre atr ka nyipi traqa ngöne la nöj a trenamo, nge tro la trejin me eö a pë ewekë ezine la atre cili, me salemë angeice kö kowe la trenyiwa, maine kowe la ka nyipi traqa, maine kowe la ketre atrene la fami ne la trenyiwa, 48 ijije hi troa itö angeice hmaca thupene la hnei angeic hna ase salemë angeic. Ijije hi troa itö angeice hmaca hnene la ketre trejine me angeic, 49 maine hnene la trejin me keme i angeic, maine nekö i nyidrëti pena, maine ketre sipu sinee,* maine ketre atrene la fami i angeic.

“‘Nge maine tro angeic a trenamo, ijiji angeic troa itö angeice kö. 50 Tro angeic memine la atre itö angeic a ce e la itre macatre, qaane lo angeic a salemë angeic uti hë la macatre ne Iubeli, nge tro ha athipe la thupen thenge la etrune la itre macatre. Ngöne la ijine cili, troa e la thupe i angeic, thenge la aqane e la thupene la atre huliwa. 51 Nge maine nyimutre pala kö la itre macatre qëmekene la ijine Iubeli, tro hë angeic a nyithupene la itre macatre cili. 52 Ngo maine xalaithe pe hi la itre macatre uti hë la macatre ne Iubeli, tro hë angeic a e thatraqai angeic me nyithupen la itre macatre cili. 53 Tro hë angeic a huliwa e nöjei macatre tune la atre kepe thupen. Nge tro eö a thupën, matre tha tro kö a axösisi angeic hnene la maseta i angeic. 54 Ngo maine tha ijiji angeic kö troa itö angeic thenge la itre hna amekötine celë, tro ha nuamacanyi* angeic ngöne la macatre ne Iubeli, angeic me itre nekö i angeic.

55 “‘Ke itre hlueng la angetre Isaraela. Itre hlueng angatr, lo hnenge hna lö fë qa Aigupito. Iehova ni, Akötresi epun.