Isaia
2 Hane hi la hna meköle goeën hnei Isaia nekö i Amoza göi Iudra me Ierusalema.
2 Ame ngöne la itre drai ne la pun,*
Tro ha acile hutine la wetre ne la uma i Iehova
Hune la itre he ne wetr,
Nge tro ej a sasaithe la itre sasala,
Nge tro la nöjei atr asë a elë kow ej.
3 Nge tro ha traqa la nöjei nöj me qaja ka hape:
“Jë fe, matre elë jë së kowe la wetre i Iehova,
Me kowe la uma ne la Akötresi i Iakobo.
Tro nyidrëti a ini së la itre gojeny i nyidrë,
Nge tro sa trongëne la itre jë i nyidrë.”
Ke troa xulu la wathebo* qa Ziona,
Memine la trengewekë i Iehova qa Ierusalema.
4 Tro nyidrëti a amekötine la nöjei nöj
Me hajine la nöjei atr ka ala nyimu.
Tro angatr a lepelepe la itre taua i angatr matre nyine uja dro
Me itre jo i angatr, matre nyine hele ne xötre vin.
Tha tro kö la ketre nöj a xejë la taua kowe la ketre nöj,
Nge tha tro hmaca kö angatr a inine troa isi.
5 Itre matra i Iakobo fe, trohemi,
Matre tro sa tro ngöne la lai i Iehova.
6 Eje hi, hnei nyipëti hna nuetrij la nöje i nyipë, ene la itre matra i Iakobo,
Ke tiqa ha la zi i angatr hnene la itre ewekë qa kohië;
Angatr a kuci haze tune la angetre Filisiti,
Nge nyimutre thei angatre la itre neköne la itre trenyiwa.
7 Tiqa ha la nöje i angatr hnei sileva me gool,
Nge tha nyine e kö la itre mo i angatr.
Tiqa ha la nöje i angatr hnei hos,
Nge tha nyine e kö la itre ikatre i angatr.
8 Tiqa ha la nöje i angatr hnei haze ka pë menen.
Angatr a thil kowe la hna xup hnene la lue ime i angatr,
Lo hna kuca hnene la itre hene wanakoime i angatr.
9 Kola thile la atr, me sa iwatingöneca,
Matre thatreine kö tro nyipëti a köletrije la ngazo i angatr.
10 Epi tro angatr a lö hnine la git me zae ngöne la xaxau
Ke nyine xouen la kola iamamanyi hnei Iehova
Nge nyine haine la lolo i nyidrë.
11 Tro ha aipiëne la luemeke ne la itre ka pi tru,
Nge tro ha thaipiën* la itre ka pi draië.
Iehova hmekuje hi la nyine troa atrun la ijine cili.
12 Ke thatraqai Iehova joxu ne la itre trongene isi e hnengödrai la drai cili.
Tro ha lep asë la itre atr ka pi tru nge ka pi draië ngöne la drai cili,
Lo itre atr hna wangatrune maine wangacon,*
13 Me itre arasi ne Lebanona asë ka draië me qea
Me itre alona asë ne Basana,
14 Me itre wetr asë ka tru
Me itre sasala asë ka draië,
15 Me itre ita ne thup ka draië me itre ihag ka catr,
16 Me itre he asë ne Tasesa
Me itre he asë ka mingöming.
17 Tro ha xom acone la pi tru ne la atr,
Nge tro ha thaipiën la pi draië ne la itre atr.
Iehova hmekuje hi la nyine troa atrune ngöne la drai cili.
18 Tro ha patre hnyawa la itre haze ka pë menen.
19 Nge tro angatr a lö hnine la itre ngönemenyi ne la itre git
Me ngöne la itre hnaop e kuhu hnadro,
Ke nyine xouen la kola iamamanyi hnei Iehova
Nge nyine haine la lolo i nyidrë,
Ngöne la nyidrëti a troa mejë matre troa ahmengöhmengönën la ihnadro hnei xou.
20 Ngöne la drai cili, tro la itre atr a xom la itre idrola sileva me gool ka pë menen
Lo hnei angatre hna xup matre thili kow
Nge tro angatr a trij itre ej kowe la itre öni ka ses* me itre xetiap,
21 Tro angatr a lö ngöne la itre hnaop ne la itre git
Me ngöne la itre gaa kaqa ne la itre git,
Ke nyine xouen la kola iamamanyi hnei Iehova
Nge nyine haine la lolo i nyidrë,
Ngöne la nyidrëti a troa mejë matre ahmengöhmengönën la ihnadro hnei xou.
22 Loi ju hë hna mejiun kowe la itre atr,
Ke ceitune hi la mele i angatr memine la hnamano.*
Nyine u la troa semesine angatr?