Ieremia
8 “Ngöne la ijine cili,” öni Iehova, “tro ha xome qa ngöne la itre hua, la itrapajun ne la itre joxu ne Iudra, me itrapajun ne la itre nekö i joxu, me itrapajun ne la itretre huuj, me itrapajun ne la itre perofeta, me itrapajun ne la itre atrene Ierusalema. 2 Troa amë xötrën itre ej qëmekene la jö me treu, me itre trongene isi e hnengödrai,* lo hnei angatr hna hnim, me nyihluen, me xötrethenge, me thel, me thili kow. Tha tro hmaca kö a xom me kelem la itrapajun i angatr, ngo tro pe itre ej a tune la agetrin e cahu.”
3 Hane hi la hna qaja hnei Iehova joxu ne la trongene isi e hnengödrai: “Ame asë hi la itre atrene la fami cili ka ngazo ka mele pe, lo hnenge hna isaijen ngöne la nöjei götran, ke pi tro kö angatr a mec hune la troa mel.”
4 “Nge tro eö a qaja koi angatr ka hape: ‘Hane hi la hna qaja hnei Iehova:
“Tro kö angatr a kei me tha mejë hmaca?
Maine tro ketre a pi bëek, hapeu, tha tro kö a bëek la ketre?
5 Hnauëne laka, angetre Ierusalema pala hi a mele thoi koi ni?
Angatr pala pe hi a huliwa iaö;
Xele kö angatr ma bëek.
6 Hnenge hna drenge me hnangenyëne hnyawa, ngo pëkö trenge nyipici hnei angatr hna qaja.
Pëkö ala cas ka hane ietra me hape: ‘Hnenge hna u?’
Angatr pala hi a inyitipu, tune la hos ka nyenyape troa isi.
7 Atre hi la sigony la ijine tro ej a sesë;*
Ame la piny, me fifikë, me itre xaa waco, ke itre ej a bëeke hmaca ngöne la ijine hna sa.*
Ngo ame kö la nöjeng, tha trotrohnine kö angatr la iameköti i Iehova.”’
8 ‘Hnauëne pena la epuni a qaja ka hape: “Ka inamacane hun, nge the huni la wathebo* i Iehova”?
Ke hna huliwan la peen* ka thoi* ne la itre atre cinyany* matre cinyianyine la itre trengathoi.
9 Hna ahmahmane la itre ka inamacan.
Hna traqa la xou koi angatr, nge tro ha othi angatr.
Goeën! Hnei angatr hna nuetrije la trengewekë i Iehova,
Matre ekaa pë hë la inamacane i angatr?
10 Celë hi matre, tro ni a hamëne la itre föi angatr kowe la itre xaa trahmany,
Me itre hlapa i angatr kowe la itre xaa atr;
Ke qaane ju hi la ka co uti hë la ka tru, angatr a isa huliwa qenatrekënö;
Qaane ju hi la perofeta uti hë la atre huuj, angatr a isa huliwa thoi.
11 Angatr a tupathe thoin troa aloine la mec* ne la nekö jajiny ne la nöjeng me hape:
‘Tingetinge hë! Tingetinge hë!’
Ngo pë pe tingeting.
12 Angatre kö a hmahmane la huliwa i angatr ka ngazo?
Waea, pëkö hmahma!
Goi thatre fe angatre la hmahma!
Celë hi matre, tro angatr a mala nyipine la itre ka mala ha.
Ame la eni a troa ameköti angatr, ke tro angatr a kei,’ öni Iehova.
13 ‘Ame la eni a troa acasi angatr, ke tro fe ni a apatrenyi angatr,’ öni Iehova.
‘Tha tro hmaca kö a hetre rezë hune la ivin, me wacua hune la iwacua, nge tro ha fitre la itre drön.
Nge tro angatr a aluzin lo hnenge hna hamë angatr.’”
14 “Hnauëne laka, easa lapa e ce?
Icasikeu jë së, nge lö jë së hnine la itre traon hna eköhagen matre meci e cili.
Ke tro Iehova Akötresi së a lep apatrenyi së,
Nge nyidrëti a thue ime së la tim hna apoizinën,
Ke hne së hna kuca la ngazo qëmekei Iehova.
15 Easë lo a aja tingeting, ngo pëkö loi ka traqa,
Easë lo a treqene la ijine troa aloinyi së, ngo xou pe la ka traqa!
16 Qaa Dana, drenge hi së la aqane mano catr ne la itre hos ne la ithupëjia.
Pine la aqane ho ne la itre hos i angeic,
Kola hmengöhmengön asë la nöj.
Mai angeice hë lai, angeic a apatren la nöj me itre alien ej,
Ene la traon me itre atren.”
17 “Ke tro ni a upe koi epun la itre un,
Itre un hna mecin hna thatreine amemën,
Nge tro hë itre ej a heji epun,” öni Iehova.
18 Pëkö nyin la treijeng;
Wezipo hë la hning.
19 Qa ngöne la nöj gaa nany, hetre ka sipo ixatua
Kolo nekö jajinyi ne la nöjeng:
“Tha Iehova kö e Ziona?
Maine tha e cili kö la joxu ne Ziona?”
“Hnauëne laka, angatr a aelëne la hning hnene la itre idrola i angatr hna tratraun,
Me itre haze trenyiwa i angatr ka pë alien?”
20 “Ase hë la ijine menu, nge fenesi hë la ijine hedredrei,
Ngo tha hna amele huni kö!”
21 Eni a hleuhleu, ke kola wezipo la nekö jajinyi ne la nöjeng;
Tru la akötreng.
Eni a meci hnei xou.
22 Hapeu, pëkö pomad* e Gileada?
Pëkö atr e cili ka atreine aloinyi* angeic?
Hnauëne laka, tha loi pala kö la meci ne la nekö jajinyi ne la nöjeng?