Salamo
33 Epun itre ka meköti fe, sue madrine jë göi Iehova.
Ijije hi tro la itre atr ka meköt a atrunyi nyidrë.
2 Olene jë* koi Iehova memine la arp;
Nyima jë nyine atrunyi* nyidrë memine la nyine elo miuzik ka 10 lao filen.
3 Nyimane jë koi nyidrë la nyima ka hnyipixe;
Elone hnyawa jë la itre nyine elo miuzik.
4 Ke ka meköti la trengewekë i Iehova,
Nge nyine mejiun asë la nöjei huliwa i nyidrë.
5 Nyidrëti a hnime la meköt memine la thiina ka meköt.
Hna haöthe la ihnadro hnene la ihnimi nyipici i Iehova.
6 Hna xupe la hnengödrai hnene la trengewekë i Iehova,
Me itre alien ej,* hnene la hnamano ne la që i nyidrë.
7 Nyidrëti a acasine la itre tim ne hnagejë kösë hag;
Nyidrëti a xawane la itre tim ka enienij ngöne la itre hnahag.
8 Epi tro la fene hnengödrai a xoue Iehova.
Epi tro la itre atrene la ihnadro ka ham* a atrunyi nyidrë.
9 Ke hnei nyidrëti hna ithanata, ame hna traqa pi;
Hnei nyidrëti hna amekötin, ame hna mama pi.
10 Hnei Iehova hna atriane la itre nyinyithiina* ne la itre nöj;
Hnei nyidrëti hna ajeane la itre mekuna ne la nöjei atr.
11 Ngo tro pala kö a cile hut la itre hna axeciëne* hnei Iehova epine palua;
Uti hë la nöjei xötr, la itre mekuna ne la hni i nyidrë.
12 Madrine la nöj laka, Iehova la Akötresi angatr,
Lo nöj hnei nyidrëti hna iën nyine edrö i nyidrë.
13 Iehova a goeën qa koho hnengödrai;
Öhn asë hi nyidrëti la itre nekö i atr.
14 Qa ngöne la göhnë i nyidrë,
Nyidrëti a goeëne la itre ka lapane la ihnadro.
15 Nyidrëti la Atre xupe la hni ne la nöjei atr;
Nyidrëti a waipengöne la nöjei huliwa asë.
16 Pëkö joxu hna amelen hnene la ketre trongene isi ka tru;
Tha hna amelene kö la atr ka catr hnene la sipu trengecatre i angeic.
17 Gufa kö la troa mejiun kowe la hos matre mel;
Thatreine kö troa mel hnene la trengecatre i nyën.
18 Goeën! Luemeke i Iehova a thupën la angetre xoue nyidrë,
Me itre ka mejiun kowe la ihnimi nyipici i nyidrë,
19 Matre nuamele angatr qa ngöne la mec
Me thupë angatr qa ngöne la jiin.
20 Easa lapa treqe Iehova.
Nyidrëti la iamele me petre së.
21 Madrine la itre hni së koi nyidrë,
Ke easë a mejiun kowe la ëje i nyidrë ka hmitrötr.
22 Iehova fe, epi tro la ihnimi nyipici i nyipë a lapa the hun,
Ke tro pala kö huni a lapa treqe nyipë.