Ezekiela

6 “‘Ngo maine öhne hi la atre thup la kola traqa la taua, nge tha ufi trutru kö angeic troa thuemacane la nöj, nge e tro la taua a traqa troa humuthe la ketre, haawe, tro ha humuth la atre cili pine la ngazo i angeic. Ngo tro ni a upezöne la atre thup la meci ne la atre cili.’*

7 “Ngo ame kö eö nekö i atr, ase hë ni acili ö troa atre thup kowe la nöje Isaraela: e drenge hë eö la ketre maca qa ngöne la qëng, qa i ö troa thuemacanyi angatr. 8 Maine tro ni a qaja kowe la atr ka ngazo ka hape: ‘Atr ka ngazo, tro hë eö a mec!,’ ngo tha hmekë angeice kö eö troa saze, tro hë angeic a meci pine la ngazo i angeic, ke atr ka ngazo lai. Ngo ame pena eö, tro ni a upezö eö la mec i angeic.* 9 Ngo maine tro eö a hmekën la atr ka ngazo troa saze, nge xele kö angeic, tro hë angeic a meci pine la ngazo i angeic, ngo tro pe kö eö a mel.

10 “Nge ame eö nekö i atr, hape jë kowe la nöje Isaraela: ‘Öni epun: “Hace catre la itre icilekeu me itre ngazo hun, matre kösë eahuni ha troa mec. Matre tro pë hë huni a mele tune kaa?”’ 11 Sa jë koi angatr: ‘“Maine nyipici laka, ka mele ni,” öni Iehova Joxu Ka Sisitria, “tha ka amadrinë ni kö la meci ne la atr ka ngazo; pi tro kö ni a goeëne la atr ka ngazo e saze matre mel. Bëeke jë, nge nuetrije pi la aqane ujë i epun ka ngazo! Ke hnauëne laka, tro pena ha epuni a mec, nöje Isaraela?”’

12 “Nge ame eö nekö i atr, hape jë kowe la itre nekön ne la nöje i ö: ‘Tha tro hë la emekötine la atr ka meköt a amele angeic, e tro angeic a icilekeu. Ketre tun, tha tro hë la engazon ne la atr ka ngazo a akeinyi angeic, e tro angeic a saze. Ketre mina, thatreine kö troa mel la atr ka meköt hnene la emeköti angeic, e traqa ju angeice tria. 13 Maine tro ni a qaja kowe la atr ka meköt ka hape: “Tro kö eö a mel,” ngo angeice pe a kuca la ngazo,* ke angeic a mekun laka, tro la meköt i angeic a amele angeic, ngo ame pe, tha tro hmaca kö a mekun lo itre huliwa i angeic ka meköt: tro angeic a meci pine la ngazo hnei angeic hna kuca.

14 “‘Nge maine tro ni a qaja kowe la atr ka ngazo ka hape: “Tro hë eö a mec,” ngo e thupen, angeic a nuetrije la ngazo i angeic, me kuca la meköt, me thiina ka meköt, 15 me hamëne hmaca lo itre hatrene ti gufa hnei angeic hna xom, me bëeke fë lo hna atrekënö, me metrötrëne la itre wathebo thatraqane la mel, me tha kuca la ngazo, tro hë angeice lai a mel. Tha tro kö angeic a mec. 16 Tha tro hmaca kö a mekun la itre ngazo hnei angeic hna kuca ekö. Hnene la hnei angeic hna kuca la meköt me thiina ka meköt, tro hë angeic a mel.’

17 “Ngo önine la nöje i ö: ‘Tha ka meköti kö la aqane ujë i Iehova,’ ngo aqane ujë i angatre pe la ka tha meköti kö.

18 “Maine tro la atr ka meköt a nue la itre huliwa i angeic ka meköt troa kuca la ngazo, tro hë angeic a mec pine lai. 19 Ngo maine tro la atr ka ngazo a nue la aqane iakötrë i angeic troa kuca la loi me meköt, tro hë angeic a mel hnene lai.

20 “Ngo öni epun: ‘Tha ka meköti kö la aqane ujë i Iehova.’ Nöje Isaraela fe, tro ni a ameköti epun thenge la isa aqane ujë i epun!”

21 Matre ame hë ngöne la hna 12 ne macatre thupene la hna kötre sai hun, ngöne la drai 5 ne la hna 10 ne treu, hnene la ketre trahmany ka kötre qa Ierusalema lo kola lepe la traon, hna traqa koi ni me hape: “Ase hë thapa la traon!”

22 Ngo ame lo jidr qëmeken troa traqa la atre cili, hnene la mene i Iehova hna huliwa* theng, nge hnei nyidrëti hna fe la qëng qëmeken tro la atr a traqa troa wai ni e hmakany. Matre hna fe la qëng, nge tha humu hmaca kö ni.

23 Matre hnei Iehova hna ithanata koi ni, me hape: 24 “Nekö i atr, önine la itre ka lapane la itre itra etë celë göi Isaraela ka hape: ‘Ngacama ala casi hi Aberahama, ngo hnei nyidrëti hna thapa la nöj. Ngo ame së, ala nyimu catre kö së, tro kö sa kapa la nöj!’

25 “Celë hi matre, hape jë koi angatr: ‘Hane hi la hna qaja hnei Iehova Joxu Ka Sisitria: “Epuni a ce öni la mitr me madra, me ujë kowe la itre idrola i epun ka sis,* me anenine pala hi la madra. Nge epuni pe kö a mekun troa xome la nöj? 26 Epuni a mejiune kowe la taua i epun, me kuca la itre huliwa ka sis, me nyixetë memine* la föe ne la atre lapa easenyi epun. Nge epuni pe kö a mekun troa xome la nöj?”’

27 “Hane hi la nyine tro eö a qaja koi angatr: ‘Hane hi la hna qaja hnei Iehova Joxu Ka Sisitria: “Maine nyipici laka, ka mele ni, tro ha humuthe hnei taua la itre ka lapa ngöne la itre itra etë; tro ni a thuane la itre öni wael hnene la itre ka mel ngöne la hlapa; nge tro pë hë la itre ka lapan la itre hna eköhagen me itre ngönemenyi, a mec hnei sine mec. 28 Tro ni a kuca matre hnapapa asë pi la nöj, nge tro ha nyipune la pi tru i angeic, tro la itre wetr e Isaraela a tune la itre götran hna nuetrij, nge pëhë ka troa cili thenge. 29 Nge tro hë angatr a atre laka, Iehova ni, e tro ni a kuca matre hnapapa asë pi la nöj, pine la itre ewekë ka sis hnei angatr hna kuca e cili.”’

30 “Nekö i atr, itre atrene la nöje i ö a qeje eö, ezine la itre ngöne uma me itre qëhnelö ne la itre uma. Angatr, itre trejin, a iqajakeun ka hape: ‘Jë fe matre tro sa dreng la hna qaja hnei Iehova!’ 31 Tro angatr a traqa itronyi troa lapa qëmekei ö tune la aqane kuca ne la nöjeng, nge tro angatr a drei ö, ngo tha tro kö angatr a trongën. Ke göi qaja hi la angatr a selë eö,* ngo itre hni i angatre pe a meciun la huliwa qenatrekënö. 32 Ke eje hi, ame koi angatr, ceitui ö hi me ketre nyima ne qeje ihnim, nge hna nyiman me elone hnyawa memine la nyine elo miuzik ka hetre filen. Tro asë hi angatr a dreng la hnei ö hna qaja, ngo pëkö ka troa semesinen. 33 Matre ame hë la kola eatr la itre trengewekë cili, nge tro kö itre eje lai a eatr, tro hë angatr a atre laka, hna hetre perofeta nyipi angatr.”