Ezekiela
2 Öni nyidrëti koi ni: “Nekö i atr,* cile jë matre tro ni a ithanata me eö.” 2 Ame la nyidrëti a ithanata, hnene la ua hna löthi ni, me acilë ni matre tro ni a drei nyidrë.
3 Thupene lai, öni nyidrë: “Nekö i atr, eni ha upi ö kowe la nöje Isaraela, kowe la itre nöj ka tha idrei nge ka icilekeu me eni. Uti pala hi enehila, hnei angatr me itre qaaqaa i angatr hna kuca la ngazo qëmekeng. 4 Eni a upi ö kowe la itre nekön ka icilekeu, nge ka hetre hni ka pi hun.* Nge qa i ö troa qaja koi angatr ka hape: ‘Hane hi la hna qaja hnei Iehova Joxu Ka Sisitria.’ 5 Nge ame angatr, ngacama tro ju hë angatr a dreng maine tha idrei, ke ketre nöj ka icilekeu angatr, ngo tro kö angatr a atre laka, hna traqa la ketre perofeta nyipi angatr.
6 “Ngo ame kö eö nekö i atr, the xoue angatre kö nge the xouene kö la hnei angatr hna troa qaja, ngacama eö ju hë nyipine la itre hnitr, me itre ka ithiny,* nge eö a lapa nyipine la itre sekopio. Ketre nöj ka icilekeu angatr, ngo the xouene kö la hnei angatr hna troa qaja, memine la aqane tro angatr a goeën amenyi ö. 7 Qa i ö troa tro fë la itre trengewekëng, ngacama tro ju hë angatr a dreng maine tha dreng, ke eje hi, ketre nöje lai ka icilekeu.
8 “Ngo ame kö eö nekö i atr, drei ni ju. The nyitipune kö la nöje ce ka icilekeu. Fe pi la që i ö nge xeni jë la hnenge hna hamë eö.”
9 Ame hnenge hna goeën me öhne la ketre iwanakoim hna saathe koi ni, nge e hnine la tusi hna ewath. 10 Nyidrëti a fe pi la tus qëmekeng, nge hetre ewekë hna cinyanyin ngöne la lue götran. Kolo itre nyima ne latresi,* me awe me treij.