Ezekiela
3 Nge öni nyidrëti hmaca jë hi: “Nekö i atr, xeni jë la ka ej qëmekei ö.* Xeni ju la tusi hna ewath, nge tro jë troa ithanata kowe la nöje Isaraela.”
2 Matre hnenge hna fe la qëng, nge hnei nyidrëti hna thuang la tusi hna ewath, 3 me hape: “Nekö i atr, xeni jë la tusi hnenge hna line koi ö, matre tiqa pi la hni i ö.” Ame hnenge hna xeni ju, nge kösë miel ka menyik ngöne la qëng.
4 Thupene lai, öni nyidrë: “Nekö i atr, tro jë kowe la nöje Isaraela, nge tro fë jë la trengewekëng. 5 Ke tha hna upi ö kö kowe la ketre nöj ka qaja la ketre qene hlapa hna tha trotrohnine kö, maine hna thatre pena, ngo kowe pe la angetre Isaraela. 6 Tha hna upi ö kö kowe la itre nöj ka nyimutre, nge ka qaja la itre qene hlapa hna thatre nge hna tha trotrohnin, lo ka mi koi ö. Ke maine hnenge ju hna upi ö koi angatr, ke tro hë angatre lai a dreng. 7 Ngo tha tro kö la nöje Isaraela a drei ö, ke xele kö angatre ma drei ni. Ame asë hi la angetre Isaraela, ke ume ka catre he nge ka pi tru la hni. 8 Dreng! Ase hë ni kuca matre catre kö la iqëmeke i ö hui angatr, me göbadri i ö hune la göbadri i angatr. 9 Hnenge hna aceitunën la göbadri i ö me diama, nge ka catre kö ej hune la etë ka ixöj. Ngacama ka icilekeu ju hë la nöje ce, ngo the xoue angatre kö memine la aqane tro angatr a goeën amenyi ö.”
10 Matre öni nyidrëti hmaca: “Nekö i atr, dreng asë jë la hnenge hna troa qaja koi ö, nge nyipiewekëne ju. 11 Hape jë kowe la nöje* i ö hna kötre fë. Nge ngacama drenge ju hë angatr maine tha dreng, ngo hape jë: ‘Hane hi la hna qaja hnei Iehova Joxu Ka Sisitria.’”
12 Ame hna xepi ni hnene la ua, nge drenge ju hi ni la kola ulili catr qa hutrö, kola hape: “Epi atrune la elolo i Iehova ngöne la göhnë i nyidrë!” 13 Nge drenge ju hi ni la mejene kola iketr la itre iapene lo 4 lao angela, memine la mejene la itre wil ezi angatr, memine la aqane ulil atraqatr. 14 Thupene lai, hnene la ua hna xepi ni me xomi ni, nge hnenge hna tro fë trenge elëhni me wesitr. Ame hna catre huliwa* la ua i Iehova theng. 15 Nge eni a tro ju kowe la itre hna kötre fë e Tel-Abib, lo itre ka lapa ezine Kebara, me pane lapa e cili. Hnenge hna ce lapa me angatr koi 7 lao drai, me lapa mekune lai.
16 Thupene la 7 lao drai, hnei Iehova hna ewekë koi ni me hape:
17 “Nekö i atr, ase hë ni acili ö troa atre thup kowe la nöje Isaraela: e drenge hë eö la ketre maca qa ngöne la qëng, qa i ö troa thuemacanyi angatr. 18 Maine tro ni a qaja kowe la atr ka ngazo ka hape: ‘Tro eö a mec,’ ngo tha thuemacanyi angeice kö eö, nge tha xatuane kö eö la atr ka ngazo troa nuetrije la aqane ujë i angeic ka ngazo matre mele pi angeic, tro hë angeic a mec pine la ngazo i angeic, ke atr ka ngazo lai. Ngo tro fe ni a upezö eö la mec i angeic.* 19 Ngo maine tro eö a hmekën la atr ka ngazo, nge tha saze kö angeic, tro hë angeic a mec pine la ngazo i angeic, ngo tro pe kö eö a mel. 20 Maine tro la atr ka meköt a nue la itre huliwa i angeic ka meköt me kuca la ngazo,* tro hë ni a amë qëmekei angeic la nyine akein, nge tro angeic a mec. Maine tha hmekë angeice kö eö, tro hë angeic a mec pine la ngazo i angeic, nge tha tro hmaca kö sa mekun la itre huliwa i angeic ka meköt. Ngo ame pë hë eö, tro ni a upezö eö la mec* i angeic. 21 Ngo maine ase hë eö hmekën la atr ka meköt matre tha tro kö angeic a kuca la ngazo, tro hë angeic a mel, ke hna hmekë angeic. Nge tro fe eö a hane mel hnene lai.”
22 Ame hna huliwa theng la ua* i Iehova, nge öni nyidrë: “Cile jë nge tro jë kowe la gaa papa, nge tro hë ni a ithanata koi ö e cili.” 23 Matre hnenge hna mejë me tro kowe la gaa papa, nge e cili fe la elolo i Iehova tune lo ka mama koi ni ezine Kebara. Ame hnenge hna kei qe ipië. 24 Thupene lai, hnene la ua hna löthi ni me amejë ni. Nge hnei Akötresie hna ewekë koi ni me hape:
“Tro jë troa umë ngöne la hnalapa i ö. 25 Nekö i atr, tro angatr a othi ö hnei eno, matre tha tro kö eö a hane ce tro me angatr. 26 Nge tro hë ni a kuca matre troa fedre la thineme i ö, matre tro eö a hum, nge tha tro hmaca kö eö a eetre pi angatr. Ke eje hi, ketre nöje lai ka icilekeu. 27 Ngo e tro mina ni a ewekë koi ö, tro hë ni a fe la që i ö, nge qa i ö troa qaja koi angatr ka hape: ‘Hane hi la hna qaja hnei Iehova Joxu Ka Sisitria.’ Ame la ka pi dreng, ke drenge ju, nge ame la ka xele ma dreng, ke the drenge kö. Ke eje hi, ketre nöje lai ka icilekeu.