Isaia
43 Ame enehila, hane hi la hna qaja hnei Iehova,
Atre Xupi ö Iakobo, lo atre acili ö Isaraela, ka hape:
“The xou kö, ke ase hë ni itö eö.
Hnenge hna hëne la ëje i ö.
Eö la ewekëng.
2 Maine tro eö a trongëne la itre tim, tro kö ni a ce me eö,
Nge tha tro kö a heti ö hnene la itre hneopegejë.
Maine tro eö a tro nyipine la eë, tha tro kö a dreuthi ö,
Tha tro kö eö a wel hnene la ukahlokine eë.
3 Ke Iehova ni, Akötresi ö,
Lo Ka Hmitrötr e Isaraela, lo atre Amele eö.
Hnenge hna hamë Aigupito nyine thupene mele i ö,
Me Aithiope me Seba nyine hna i ö.
4 Ke sisitria ha eö koi ni,
Hna atrunyi ö, nge eni a hnimi ö.
Celë hi matre, tro ni a hamëne la itre atr nyine nyihnai ö
Me itre nöj hnane la mele i ö.
5 The xou kö, ke ce eni me eö.
Tro kö ni a traqa fë la itre matra i ö qa koië
Nge tro ni a icasikeu eö qa kuë.
6 Tro ni a qaja kowe la götrane kolopi: ‘Nue angatre pi!’
Me kowe la götrane kolojë: ‘The cipa angatre kö.
Bëeke fë jë la itre nekönge trahmany qa gaa nany, me itre nekönge jajiny qa ngöne la itre cane la fene hnengödrai,
7 Lo itre ka xome la ëjeng
Lo hnenge hna xup matre atrunyi ni,
Lo hnenge hna eköth me kuca.’
8 Tro fë pi la nöj ka timek, ngacama ka hetre luemek,
Me itre ka sim, ngo ka hetre hnangenyëne pe.
9 Epi tro la itre nöj a icasikeu ngöne la ca götran,
Nge tro la nöjei atr a traqa itrony.
Drei e angatr la ka atrein troa qaja amamane lai?
Hapeu, atreine kö angatr qaja koi së la itre pane ewekë?*
Epi tro angatr a thele la itre temoë matre jelenyipici angatr,
Maine pena tro la itre xan a drenge me hape: ‘Ka nyipici!’”
10 “Epuni la itre temoëng,” öni Iehova,
“Eje hi, lo hlueng hnenge hna iën,
Matre tro epuni a atrepengöi ni me lapaune koi ni
Me trotrohnine laka, tha saze kö ni.
Pëkö Akötresie hna xup panën hui eni,
Nge pëkö e thupeng.
11 Iehova ni, nge pëkö xaa atre iamele.”
12 “Eni la ka thuemacan, me amelen, me qaja amaman
Lo pë petre kö haze trenyiwa thei epun.
Epuni la itre temoëng,” öni Iehova, “nge eni la Akötresi epun.
13 Ketre, tha ka saze kö ni;
Nge pëkö ka atreine thapa la ketre ewekë qa ngöne la imeng.
Drei la ka atreine sewe ni ngöne la eni a kuca la ketre ewekë?”
14 Hane hi la hna qaja hnei Iehova, lo Atre Itö Mele i epun, lo Atre Ka Hmitrötr e Isaraela, ka hape:
“Tro ni a upe koi epun la ketre atr a tro Babulona, nge tro ni a thöne la itre agö ka acatrene la itre qëhnelö,
Nge tro la angetre Kaledaia a xou me treij hune la itre he i angatr.
15 Iehova ni, lo Akötresie Ka Hmitrötr i epun, Atre Xupi Isaraela, me Joxu i epun.”
16 Hane hi la hna qaja hnei Iehova,
Lo atre fe gojeny ngöne la hnagejë
Memine la hmene gojeny nyipine la itre tim ka holehol,
17 Lo atre tro fë la ikatr me hos,
Memine la trongene isi me itre soc ka catr:
“Tro angatr a imeköleny, nge tha tro hmaca kö angatr a cil.
Tro angatr a pi, tune la kola uf apin la wik ka mel.”
18 “The mekune hmaca kö lo itre ewekë hnapan,
Nge the bëeke hmaca kö kowe la itre drai eidr.
19 Goeën! Eni a kuca la ketre ewekë ka hnyipixe;
Kolo fe hë a cia.
Tha öhne kö epun?
Tro ni a axulune la ketre hmene gojeny ngöne la hnapapa
Me itre hneopegejë ngöne la gaa qaqacil.
20 Tro ha atrunyi ni hnene la itre öni wael,
Ene la itre kuli wael me itre waco atraqatr,
Ke tro ni a axulune la tim ngöne la hnapapa,
Me itre hneopegejë ngöne la gaa qaqacil,
Matre troa ij hnene la nöjeng, lo hnenge hna iën,
21 Lo nöj hnenge hna eköth thatraqai ni
Matre tro ej a atrunyi ni.
22 Ngo tha hnei ö kö hna thithi* koi ni, Iakobo,
Ke kucakuca ha eö koi ni, Isaraela.
23 Tha hnei ö kö hna tro fë koi ni la itre mamoe nyine huuje ne dreuth asë
Tha hnei ö kö hna atrunyi ni hnene la itre huuje i ö.
Tha hnenge kö hna musinë eö troa traqa fë ahnahna koi ni,
Tha ase kö ni iele eö troa traqa fë libanu.*
24 Tha hnei ö kö hna itö rozo ka pui loi thatraqai ni memine la manie i eö,
Nge tha hnei ö kö hna amadrinë ni hnene la girisi ne la itre huuje i ö.
Ngo hnei eö pe hna ahacenyi ni hnene la itre ngazo i ö
Me akucakucanyi ni hnene la itre tria i ö.
25 Pine la ëjeng, eni la ka köletrij la itre tria* i ö,
Nge tha tro hmaca kö ni a mekune la itre ngazo i ö.
26 Isa isenyine jë së. Amekunë ni jë la itre ewekë ka traqa;
Qaja jë la mekuna i ö matre mama jë ka hape, ka nyipici ö.
27 Hna kuca la ngazo hnene la pane xötrapane i ö,
Nge hnene la itre qene qaja* i ö hna icilekeu me eni.
28 Tro hë ni a ahmahman la itre tane ngöne la gaa hmitrötr,
Nge tro ni a nue Iakobo kowe la hnëjin
Me nue Isaraela kowe la iqaqa.