Pane Tus Kowe La Angetre Korinito
16 Nge ame göi mani hna ithingë thatraqai ange ka hmitrötr, loi e tro nyipunieti a trongëne la hnenge hna amekötin kowe la itre ekalesia ne Galatia. 2 Ngöne la itre pane drai ne la wiik, loi e tro nyipunieti a isa ami mani acony, thenge la hna isa hetreny, matre tha tro hmaca kö a ithingë mani la eni a traqa. 3 Ngo e traqa ha ni koi nyipunie, tro ni a upe la itre atr hnei nyipunieti hna mejiune kow, me hna qaja aloin hnine lo tusi nyipunie, matre troa tro fë la itre ahnahna i nyipunie a tro Ierusalema. 4 Nge maine ijijinge fe troa hane tro, tro pë hë ni a ce tro me angatr.
5 Ngo tro ni a traqa koi nyipunie e ase jë ni trongëne la nöje Makedonia, ke pi tro ni a trongëne la nöje cili. 6 Nge maine jë, tro ni a pane lapa thei nyipunie uti hë fenesi la ijine hnötr. Nge tro hë nyipunieti lai a pane ce tro me eni ngöne la nöjei jëng. 7 Ke enehila, tha ajange kö tro hi sa iöhny, ke maine aja i Iehova,* eni a pane pi lapa aqeanyi me nyipunie. 8 Ngo eni pala kö la e Efeso, treqene la troa feetëne la Penetekos, 9 ke hna fe koi ni la ketre qëhnelö atraqatre göne la huliwa ne cainöj, ngazo pe, ala nyimu la itre ka icilekeu.
10 Nge e traqa pi Timoteo, kuca asë jë matre tha tro kö angeic a hetre nyine xouen nyipi nyipunie, ke tung, angeice fe a kuca la huliwa i Iehova.* 11 Haawe, the tro kö ketre a wangesixa angeic. Nge ce tro jë me angeic, matre tro angeic a traqa hnyawa koi ni, ke eni me itre trejin a treqe angeic.
12 Nge ame koi Apolo, trejin me easë, hnenge hna catre iele angeic troa wai nyipunie me itre trejin. Nyipici, tha mekuna i angeice kö troa traqa enehila, ngo e ijiji angeice pi hë, tro angeice lai a traqa.
13 Haawe, hmeke jë, cile huti ju ngöne la lapaun, hni ne trahmanyi jë, nge ange catre pi. 14 Nge loi e tro nyipunieti a kuca la nöjei ewekë cememine la ihnim.
15 Nge enehila ange trejin, eni a eamo nyipunie: Atre hë nyipunie ka hape, ame la hnalapa i Setefana, tre celë hi pane wen e Akaia, nge angatr a nu asë göi troa catre huliwa thatraqai ange ka hmitrötr. 16 Haawe, epi tro pala hi nyipunieti a drengethenge la itre atre ka tune lai, me itretre ixatua me huliwa catr. 17 Nge eni a madrine laka hnei Setefana, me Fotunato, me Akaiko hna traqa koi ni, ke tru catre la hnei angatre hna xatua ni lo patre kö nyipunie. 18 Ke hnei angatre hna akeukawane la hning, me hni i nyipunieti fe. Qa ngöne lai, nyipine jë la itre atre ka tui angatr.
19 Nge ekalesia ne Asia a upe la ibozu i angatr koi nyipunie. Nge Akula me Perisila memine la ekalesia ka icasikeu thei nyidro, a ibozu me upe la ihnimi trejin i angatr koi nyipunie. 20 Nge nöjei trejin asë a upe la ibozu i angatre koi nyipunie, me dremi nyipunie isa ala casi cememine la hni ka wië.
21 Nge enehila, eni Paulo, a sipu cinyihane troa upe la ibozunge koi nyipunie.
22 Nge maine hetre ketre atr ka tha hnimi Joxu, hnëjine hë angeic. Joxu fe, epi traqa pi nyipë! 23 Nge epi tro la ihnimi gufa i Iesu Joxu a ce me nyipunie. 24 Nge epi tro la ihniming a ce me nyipunie, itretre xötrethenge Iesu Keriso.