Salamo
96 Nyima jë koi Iehova la nyima ka hnyipixe.
Nyima jë koi Iehova, epuni asë, itretre lapane la ihnadro!
2 Nyima jë koi Iehova; atrune jë la ëje i nyidrë.
O drai, qaja trongëne jë la maca ka loi ne iamele* i nyidrë.
3 Qaja trongëne jë la lolo i nyidrë nyipine la itre nöj,
Me itre huliwa i nyidrë nyine hain nyipine la nöjei atr.
4 Ka draië Iehova, nge nyidrëti hmekuje hi la nyine atrun.
Pëkö sai nyidrë thene la itre xaa haze.
5 Ame la itre haze ne la nöjei nöj, ke ka pë pengön.
Ngo Iehova la atre xupe la hnengödrai.
6 Eje qëmekei nyidrë la esisitria me emingömingön;
Eje ngöne la uma ne hmi i nyidrë la catr me lolo.
7 Hamëne pi koi Iehova la nyine iatrun, epuni itre fami ne la itre nöj,
Hamëne pi koi Iehova la nyine iatrun, ke lolo nyidrë me catr.
8 Atrunyi Iehova jë, ke nyine atrune la ëje i nyidrë;
Traqa fë ahnahna pi, nge lö jë ngöne la itre ikur i nyidrë.
9 Thili ju* qëmekei Iehova memine la itre iheetr ka hmitrötr;*
Epuni asë, itretre lapane la ihnadro, hmengöhmengöne jë qëmekei nyidrë!
10 Qaja trongëne jë nyipine la itre nöj ka hape: “Joxu hë Iehova!
Hna acatrene la ihnadro, nge pëkö ka atreine enienijën.
Tro nyidrëti a amekötine* la nöjei atr cememine la meköt.”
11 Epi tro la hnengödrai a madrin, nge tro la ihnadro a elitrauj hnei madrin;
Epi troa ulili la hnagejë memine la itre alien ej;
12 Epi troa madrin la itre hlapa memine la nöjei ewekë asë ngön ej.
Epi troa sue madrin la nöjei sinöe ne hnitr
13 Qëmekei Iehova, ke calemi hë* nyidrë,
Calemi hë nyidrë troa amekötine la fen.
Tro nyidrëti a amekötine la fene hnengödrai* cememine la meköt
Memine la nöjei nöj ngöne la nyipici i nyidrë.