Salamo

Olene jë koi Iehova, ke ka lolo nyidrë;

Ka epine palua la ihnimi nyipici i nyidrë.

 2 Drei la ka atreine troa qaja asë la itre huliwa ka mene i Iehova?

Maine qaja trongëne la itre hnei nyidrë hna kuca nyine atrun?

 3 Madrine la itre ka huliwa nyipici,

Me ka xötrethenge pala hi la meköt.

Epi thupë ni hnei nyipë me amele ni,

 5 Matre tro ni a nyipine* la itre ewekë ka loi hnei nyipëti hna kuca kowe la itre hnei nyipëti hna iën,

Matre tro ni a madrin cememine la nöje i nyipë,

Nge matre tro ni a selë nyipë cememine la edrö i nyipë.

 6 Hne huni hna tria tune la itre qaaqaa hun;

Hne huni hna huliwa menu me kuca la ngazo.

Tha mekune hë angatr la etrune la ihnimi nyipici i nyipë,

Ngo hnei angatr hna icilekeu qëmekene la hnagejë, ene la Hnagejë Ka Palulu.

 8 Ngo pine la ëje i nyidrë, hnei nyidrëti hna amele angatr,

Matre troa amamane la mene i nyidrë.

 9 Nyidrëti a catrëne jë la Hnagejë Ka Palulu, ame hna qaqacile pi;

Hnei nyidrëti hna ea trongë angatr nyipine la itre gaa jui, kösë kola tro ngöne la hnapapa;

10 Nge hnei nyidrëti hna thepe angatr qa ngöne la ime ne la ka icilekeu

Me itö angatr qa ngöne la ime ne la ithupëjia.

11 Hna ulume la itre ithupëjia me angatr hnene la hnagejë;

Pëkö ca ka mel.*

12 Ame hnei angatr hna mejiun kowe la hnei nyidrëti hna qaja;

Hnei angatr hna nyima atrunyi nyidrë.

13 Ngo canga thëthëhmine hi angatr la hnei nyidrëti hna kuca;

Tha treqene kö angatr la eamo i nyidrë.

14 Hnei angatr hna kei thenge la itre aja ka ngazo ngöne la hnapapa;

Hnei angatr hna tupathi Akötresie ngöne la gaa pë atren.

15 Hnei nyidrëti hna kapa la itre sipo i angatr,

Ngo e thupen, hnei nyidrëti hna lepi angatr hnene la ketre akötr ka hamë mec.

16 Ngöne la lapa, hnei angatr hna zalu koi Mose

Me Arona, lo hna ahmitrötrën hnei Iehova.

17 Ame hna nganga pi la ihnadro, me ulumi Dathana

Nge hnen ej hna kelem la itre ka ce me Abirama.

18 Ame hna mele pi la eë nyipi angatr;

Hnene la ukahlokine eë hna dreuthe trije la itre atr ka ngazo.

19 Angatr a kuca jë la neköi kau e Horeba

Me thili kowe la idrola fao;*

20 Hnei angatr hna nyihnane la elolong

Hnene la ketre idrola kau ka xeni haö.

21 Hnei angatr hna thëthëhmi Akötresie, lo Atre Amele angatr,

Lo atre kuca la itre ewekë ka tru e Aigupito,

22 Me kuca la itre huliwa nyine hain ngöne la nöje Hama,

Me itre huliwa ka men ngöne la Hnagejë Ka Palulu.

23 Nyidrëti lo a troa amekötin troa apatrenyi angatr,

Ngo hnei Mose, lo hnei nyidrëti hna iën, hna ithanata koi nyidrë*

Matre lapa kötre pi la elëhni i nyidrë.

24 E thupen, hnei angatr hna methinëne la nöje ka lolo;

Tha lapaune kö angatr kowe la itre hnei nyidrëti hna qaja.

25 Tha mano kö angatr eetr fene la itre itate i angatr;

Tha drenge kö angatre la nine i Iehova.

26 Ame hnei nyidrëti hna li im me sisiny

Troa akeinyi angatr ngöne la hnapapa;

27 Hnei nyidrëti hna akeine la itre matra i angatr nyipine la itre nöj,

Me aisaije angatr ngöne la nöjei nöj.

28 Ame hnei angatr hna sine la hmi* Baala Peora,

Me xen la itre huuj thatraqane la itre ka mec.*

29 Hnei angatr hna aelëhni Nyidrë hnene la itre huliwa i angatr,

Ame hna traqa pi koi angatr la ketre mec ka ixötrekeu.

30 Ngo hna mejë hnei Fineasa troa isigöline la meköt,

Ame hna patre pi la mec ka ixötrekeu.

31 Qa ngöne lai, hnei Akötresie hna jele meköti angeic

Uti hë la nöjei xötre atr epine palua.

32 Hnei angatr hna aelëhni Nyidrë ngöne la itre tim e Meriba,*

Nge zö i angatr la kola traqa la ngazo koi Mose.

33 Hnei angatr hna aelëhni angeic,

Uti hë la angeic a ithanata menu.

34 Tha hnei angatre kö hna apatrene la itre nöj,

Tune lo hna amekötin hnei Iehova.

35 Ngo hnei angatr hna ce mel memine la itre nöj

Me xome la thiina* i angatr.

36 Hnei angatr hna nyihluene la itre idrola,

Nge ketre hnö hë lai koi angatr.

37 Hnei angatr hna huujëne la itre nekö i angatr trahmany

Me jajiny kowe la itre dremoni.

38 Hnei angatr hna anenine la madra ne la itre atr ka pë engazon,

Ene lo madra ne la itre sipu nekö i angatr trahmany me jajiny

Lo hna huujën kowe la itre idrola ne Kanana;

Ame hna ngazo pi la nöj hnene la madra hna anenin.

39 Pui ngazo hë angatr hnene la itre huliwa i angatr;

Ase hë angatr kuci ngazo* memine la itre xaa haze hnene la itre thiina i angatr.

40 Ame hnei Iehova hna elëhni kowe la nöje i nyidrë,

Nge nyidrëti ha methinëne la edrö i nyidrë.

41 Hnei nyidrëti hna anyimua nue angatr kowe la itre nöj,

Matre musinë angatr hnene la itre ka methinë angatr.

42 Hnene la itre ithupëjia me angatr hna folosa angatr,

Nge hna musinë* angatr hnene la itre ithupëjia.

43 Nyimu ijin hnei nyidrëti hna amele angatr,

Ngo hnei angatre pala hi hna icilekeu me tha idrei,

Ame hna thaipië angatre hmaca, pine la itre tria i angatr.

44 Ngo öhne hi nyidrë la aqane akötrë angatr

Nge drenge hi nyidrë la angatr a sipo ixatua.

45 Hnei nyidrëti hna mekun la isisinyikeu i nyidrë göi angatr,

Nge hnene la etrune* la ihnimi nyipici i nyidrë, hnei nyidrëti hna utipi* angatr.

46 Hnei nyidrëti hna kuca matre

Tro la itre nöj ka othi angatr a utipi angatr.

47 Iehova fe, Akötresi hun, amele huni jë,

Nge acasi huni jë qa ngöne la itre nöj

Matre tro huni a atrune la ëje i nyipë ka hmitrötr

Me qaja aloinyi nyipë ngöne la madrin.*

48 Loi e troa atrunyi Iehova, Akötresi Isaraela

Uti hë epine palua.*