Salamo
Thatraqane la atre jumi traem. Qaathei Dravita.
11 Eni a zae thei Iehova.
Hnauëne laka, epuni a qaja koi ni ka hape:
“Kötre pi tune la waco ngöne la wetre i ö!
2 Itre atr ka ngazo a hnan la itre pehna i angatr;
Angatr a atë la ane pehna i angatr hune la eno,
Matre pehnane qa ngöne la gaa mit la itre atr ka hni ka meköt.
3 Maine troa thë la itre trepene* la meköt,
Nemene pë hë la hna troa kuca hnene la itre ka meköt?”
4 Iehova ngöne la uma i nyidrë ka hmitrötr.
E koho hnengödrai la therone i Iehova.
Luemeke* i nyidrë a goeën me waipengöne la itre nekö i atr.
5 Iehova a waipengöne la atr ka meköt tune la atr ka ngazo;
Nyidrëti a methinëne la atr ka pi isi.
6 Tro nyidrëti a kuca matre trotro pi la itre hnö* hune la itre atr ka ngazo;
Edrö i angatre pë hë la eë, me gaz, memine la enyi ka idreuth.
7 Ke ka meköti Iehova; nyidrëti a hnim la itre huliwa ka meköt.
Tro hë la itre atr ka meköt a öhne la iqëmeke i nyidrë.*